عالم البنات النسائي كل ما يخص المرأة العربية من ازياء وجمال والحياة الزوجية والمطبخ
أنا أهل زوجي متعلمين كلهم دكاتره ومهندسين بس العيب اللي لاحظناه بالبدايه فيهم إن نعمة رب العالمين مو باينه عليهم بلبسهم اوعفش بيتهم ، اما أسلوبهم اكتشفناه بالاحتكاك معهم قبل الزواج بأنهم سلطاء اللسان وماعندهم ذوق بالتعامل . بالشوفه أنا أول ماشفت زوجي ابدا ماحسيت انو ده واهله حيكونوا نصيبي بس يوم قعدت معاه عجبني تفكيره وعقله انا كنت ابغى الرجل يكون عنده الدين وخلق وكرم وتعليم ومتحمل مسؤوليه وطيب ومايدخن والحمدلله مابان عكس كدا فكملنا الخطوبه وحطيت شروطي ووافق عليها ووالدي اتكلم معاه عحكاية مرتبي الخاص من شغلي بالبنك يبقى ليا ليوضحله ويضمن حقي ووافقه وقله فلوسي حق ليا وبس
المشكله الأولى ظهرت بأهل زوجي يوم زواجي كان زواجي واليوم اللي حلمت كل عمري فيه كان ابشع يوم وسببلي عقده وكرهت اراجع ذكريات هاليوم كان صعب وكله دموع مني ومن امي واخواتي بسبب أهله ابدآ ماعملوا حساب لحد واضطرت والدتي هيا اللي تستقبل المعازيم و كانوا بخانقوا المعازيم عشان بصوروا بالتليفون وهدا هما بالاساس رفضوا يحطوا وحده توقف وتاخد الجوالات عشان مايدفعولها فلوس كانوا كلهم من ام واخوات يسحبوا الجوالات بطريقه غلط وزعيق وخناق لدرجة وحده من صحباتي دخلت الحمام وقعدت تبكي وغيرهم كتير سمعوا شتايم وزعيق منهم وكان أكتر تعليق سمعتوا اني مالقيت غير هالناس وكيف هما ناس وسخه وماعندها ذوق وأخت زوجي مسحت بكرامة اختي الارض واتهمتها انها بتصورها وبتصور امها وانا اختي هدي طيبه عندها 17 سنه طلعتلي تبكي وتقولي احرجوها قدام الناس وهيا ماكانت بتصورهم وليه تصورهم !؟ الفرق بيننا إن انا واهلي مانجرح أحد وكلامنا محسوب ونمسك نفسنا وعمرنا مانسبب فضيحه أو اذى بكلمه او فعل بس هما لأ ومابانوا بطبعهم غير قبل زواجي ، غير كدا قعدوا اهله بالزواج يلملموا بالأكل بالبوفيه ويحملوه بأكياس والفضيحه إن المعازيم لسه بياكلوا وماما عزمت وأخدت والدة صديقتي للبوفيه وشافت المنظر هدا وتحرجت بس أم صديقتي من الحرج قالت انها تعشت ومشيت هدا غير انهم بالحفله وقفوا المطربه والفرقه اللي جبناها عشان بتغني اغاني مو عهواهم مع ان الحضور كان مبسوط بأغانيهم الخليجيه وبيرقصوا بس واجبرتهم يغنوا اغاني فلسطينيه ودبكه لان اصولهم مو سعوديه فلسطينين متسعودين ووقفت المطربه والقاعه جلست فتره هديت وصارمنظر غلط ومن كتر الزن وقلة الادب عالمطربه طلبت الفرقه من اختي الفلوس وقالت انها عمرها ماشافت ناس كده و مش مأمنه إنها تستنى بالفرح هذا واختي الكبيره ردت لاول مره وقالتلهم ان اهل العروسه هما اللي جايبينكم ففلوسكم معانا فاطمنوا وكملوا الحفله ، واللهي الوضع فعلا ماكان طبيعي أسلوبهم جرح الكل وفكرت إني ماتزف من اللي شفته من قلة زوق بس حماة أختي ست كبيره وعاقله طلعت عقلتني و قالتلي لو مشيتي حتغلطي لان ممكن يقولوا اللي عملوه هدا توتر زواج او اي عذر وخلاص ومايكون عليهم غلط وانتي اللي تكوني غلطانه وفعلا فكرت وقلت انا لو مشيت وكنسلت الزواج حفضل اتندم عزوجي العمر كله لانه كان كويس في الخطوبه فاستعذت من الشيطان وقرأت سورة يس وتزفيت وياليتني ماتزفيت واستغفر الله العظيم
– سافرنا لشهر العسل وأكتشفت انو مابصلي يعني يصلي الظهر العصر والباقي لأ ولما الدوره الشهريه تيجي مابصلي أبدا وراقبته كويس لأتاكد وبعدها واجهته فقلي انو كان مصدع فسألته بعد فتره طيب هل قضيت صلواتك قلي لأ وهذا طبعا عذر لانو الايام الجايه كمان ماالتزم بكل الصلوات وفي ايام ماصلاها اساسأ أنا تألمت وبكيت من الحقيقه انو مابصلي ولامبالي بالصلاه وحسيت بقرف من ناحيته وليومك هدا انا مصدومه كيف رجل عنده 29 سنه كيف حيكون اب لاطفالي وزوج لي كيف مابيعرف اهمية الصلاه بس قويت نفسي وصرت أقوله يصلي واصلي قدامه وافهمه اهميتها وكيف ربي حيباركلنا ويبارك شغله وحياته واكتشفت بعدين من سلفتي إن زوجها مايصلي وعندها بنت وولد وليها 3 سنين متزوجه وقلتلها حشكي زوجي لحماي قالتلي الأب مايصلي غير عرف وتقاليد الجمعه يلبس التوب ويروح يصلي وباقي الصلوات عالله وتصدمت لان والدي كان يقولي انا اعطيتك لهلناس عشان والده شكله دين وكبير بالسن مايدل عكدا ياعالم انا بكتب ومصدومه القيامه حتقوم كيف بهالعمر ومابصلوا وبعد رجوعنا من شهر العسل روحت عند اهله وكنت مصليه العصر بالبيت بس صليت المغرب والعشاء عندهم وماقاموا لا اخته ولا امه ولا اخوه انا حتجنن واحس نفسي غلطانه صح انا افتكر زوجي كان يصلي مع ابويا لما يشوفه بيصلي ويروح معاه المسجد بس فيه موقف رجعته بذاكرتي لما كنا نجهز مع بعض وكان بأذن العشا في السوق ومايقوم يصلي اول مره ماعلقت تاني مره تكلمت قلي مااقدر اسيبك لوحدك وكانت علي الدوره قلتله ربي يحفظني دامك سايبني للصلاه وصممت فقام صلى وفيه مره ماصلى قلي العشا طويييل بقضيه و قلتله مافي شي اسمه طويل صليه بوقته هدي كانت علامات كانت بالملكه والله انا بندم مانتبهت عليها بس قسما بالله ماخطرلي كدا حيكون
-تاني حاجه صدمتني هو إن الفندق اللي نزلنا فيه بماليزيا أعطانا كوبونات فطور مع الغرفه بعدد الايام اللي نازلين فيها وكنا بنفطر بس بينسوا ياخدوها مننا فبيوم عالمغرب قلتله إني جعانه فطلب مني لان اللغه الانجليزيه حقتي قويه أكدب عالفندق وقولهم إنا كنا صايمين وماروحنا نفطر الصباح فيجيبولنا الفطور عالمغرب انا تفجعت ورفضت وفهمته ده أكل حرام ونكذب ليه وهوا ابداا مو شايف حرمانيه باللي يسويه عارفين اش شايفه شايفه شطاره منه فعلا اتصدمت وكان عاشوراء قلتله صوم وساعتها انا حتصل
-بشهر العسل كان بيحرمني حاجات كتير تي شيرت عجبني ولا اسوره زينه كان بيرفض ووقت طلب العشا يقولي ياتبوله او حمص الاثنين لأ واكون مشتهيتهم ومره قلي حنتعشى فواكه فقلتله خيارات ناكل سيبواي او بيتزا وماكان فيه بالمنطقه بس كان فيه مطاعم تانيه كان ممكن يجيب منها بس ماجاب فوقف تاكسي ورجع واتعشى فواكه وانا زعلت و نمت بدون عشى وبعدين صارحته قلتله زعلت من هذا الموقف رد علي ان ماكان فيه مطاعم بالمنطقه بس انا شفت مطاعم ثانيه مليان غير سيبواي ولا بيتزا وماحبيت ندخل بنقاش وسكت لانو كان بامكانه بالتاكسي لو عقولته مافي مطاعم يكلمه ينزله بمطعم فلاني يجيب ساندوتشات او يجيب اي حاجه
– الاصعب من كل دا لما موبايلي وقع بالمويه وجواله كان معايا ولقيت رسايل فاضحه مع وحده بيكلمها سألتوا مين هدي قلي بنت خالي قلتله كلمها فقام غير كلامه وقال هدي علاقه سابقه اش تبغي فيها بس سحبت الجوال و شفت التاريخ طلعت مستمره واخر رسايل قبل زواجنا بشهرين فقام غير و قلي هدي مهندسه بتعملوا رسومات لشغله بالمعماريه وكانت طالبه منه فلوس عشغلها فرسم عليها الحب لانو مزنوق بالزواج ومو قادر يدفعلها وفعلا كلامه معها نصب يقولها السنه الجايه بتكوني ببيتي وكلام حب ماقول غير حسبي الله وانا تصدمت اكتر من تفكيره وتبريره اللي ماادري اش اقول فيه وتعبت نفسيتي اكتر من التفكير بالموضوع بس قفلناه بووعد منه مايعمل كده تاني
خلص شهر العسل اللي كان كله دموع وصدمات ورجعت لبيتي وفاقده الثقه بمباديء الرجال اللي ارتبطت فيه ولقيت صدمه اكتر إني اكتشفت انو مطلق كان مملك عقد قران عبنت خاله وكان فارش البيت وكل شي وقبل زواجه طلق و راحوا المحاكم مرتين وبالنهايه اطلقوا وانا كنت حموت لما اكتشفت وحلست اصرخ بالغرفه وابكي لاني صارحته قبل الزواج بقراءه فاتحتي على شخص بس ماصار نصيب وكانت فاتحه بس قلتله و حبيت اكون صادقه وهوا كذاب بنى حياته عكذب ليه وكيف حسبي الله ونعم الوكيل لا اهله قالوا لنا ولا هوا قال واعترف واتكلمنا مع بعض قبل الزواج عن زمان و اذا ارتبط بأحد في حياته او لأ وبعد الزواج بالطياره لشهر العسل فتحنا الموضوع وما جاب سيرة الخطوبه والزواج وكذب
انا اكتشفت موضوع طلاقه من اللاب توب حقه ربنا اراد اخدته اكلم اهلي لانه مبرمج فيه التانغو وسكايب و جات رساله ماسنجر تقوله مبروك و ليه ماعزمت خالك وانه مهما كان هوا كان حماه من هنا شكيت ودورت بالمستندات على السجل لقيت كلللل المحادثات مع طليقته واصحابه واكتشفت
وكتمت الموضوع عنه قلت لو فتحت فمي بإني عرفت ماحسكت كظمت غيظي
مو كفايه اللي صارلي لا زاد همي هموم يوم أمي بعد كم يوم أتصلت علي وتشتم بأخ زوجي اللي اصغر منه اللي صاير إن أخواني عزموا بزواجي صاحبهم وهوا يتيم ويعتبر امي زي امه وماشاء الله عليه الولد جميل واخ زوجي طلب رقمه من اخواني واخذه وكلمه وطلع والعياذ بالله شاذ و يبغى الولد بشي غلط وكلم ماما اللي يعتبرها امه وهوا معصب وقلها عالموضوع وارسلها المحادثات الوسخه حقت الواتس اب انا بقلبي حرقه هدا حيكون خال اولادي وبرضوا عقلي مو مستوعب يارب حسبي الله ونعم الوكيل
مو كفايه كمان زوجي مقصر رجعت من السفر ليا فتره شهرين ماطلعني ولا فسحني بس اروح بيت اختي وكمان بالعافيه وبياخدني بيت اهله واختي الكبيره استغربت إننا عرسان لانطلع نتغدا ولانتعشى برا فاتفجرت و تكلمت معاها وقالتلي ابطل اكتم حتى مامرض واموت واروح و اقوله فقمت قلتله حرام عليك مليت طلعني فسحني بيوم وبعد كلامي بكم يوم قلي حنطلع انبسطت و لبست وتكشخت واروحله المطبخ يقولي حسوي شاي كان يبغى يسويه بكاسة بلاستيك قلتله لأ بنجيب من برا فطلع وهوا معصب بالسياره وانا مو فاهمه ليه معصب فقلي إني مابحس و13 ريال اللي حيجيب فيها من برا هوا أولى فضلت اتكلم معاه قلتله احمد الله راتبك ولله الحمد 10 الالاف فيه ناس اقل انت بنعمه مو محتاج يابنات بقولي مزنوق وانه عنده دين 50 الف والدي عطاه مبلغ وساهم معاه بالزواج وليه 6 سنين يشتغل والبيت حقي ماجبت سفره اجلتها وأثثت الاساسايات يعني كيف مزنوق ولو مزنوق يخصصلي يوم واحد بالاسبوع يفسحني فيه انا عروسه حرام مليت بالبيت ويقولي ماكفاكي تفسحتي بشهر العسل يشهد الله علي ان وضع اهلي ميسورين وجاتنا فتره والدي عدى بذائقه ماديه جداا صعبه بس ماقصر علينا بالأكل والشرب هدا الرجال اخدني فسحني بسجاده عالبحر و ماعشاني بس جالسين وبطلوع الزور جاب من بارنيز وكان مضايق لاني ماخليته يسوي بالبيت وكل مابطلب منه اكله مشتهيتها مثال برجر كنج مايجيبلي يرجع ويده فاضيه اقوله عيب انا اطلب منك وتكسفني يقولي ماابغاكي تتعودي كله من برا ومن يوم مارجعت من شهر العسل وانا اطبخ ولو يجيب من برا يجيب مطاعم غريبه مو معروفه وبعدها يقابل اختي وزوجها ويقولهم ماتطبخلي غير كم مره بالاسبوع والباقي جيب من بره
قسمآ بالله انا خففت عليه وماجبت سفره لبيتي وبعض الكماليات للبيت ووافقت لاساعده قلت نجيب الاساسيات والباقي بعدين قلت اشتري رجال والباقي يتعوض وبعد الزواج ماطلبت الكثير انا طلبت طلبات بسيطه ومهمه ليا طلباتي كانت زي المطبخ فيه سلك من السقف نازل وفيه نيون ومضايقني شكل السلك اللي نازل من السقف ومن فوق الباب قلتله نشتري من ايكيا من اي مكان لنركب شي مكان السلك ابجور او شي مكان اللي بالسقف ونقطع السلك اللي فوق الباب رفض قلي عندك النور نيون اقوله طيب والسلك قلي لاتطالعي فوق ، طلبت منه علاقات لونها ابيض ماأحب الحديد قلي ماحشتري شي من نظري اشوفه تافه ومادام فيه علاقات تمشي الحال ليه نشتري حاولت افهمه ان مو كل شي ينظرله من نظرته وان اش حيكون احساسه لو طلب مني شي وقلتله ماحسويه لانه تافه وفهمته انه المسؤول عنواقص البيت وعكماليته وانا والله ماطلبت شي صعب ، وكمان كنت طالبه من شهر العسل سشوار وقلي حاضر كالعاده بس يصبرني وخلص شهر العسل ورجعنا وبعدها صممت عليه فاخدته وجبناه من نزيه ب 300 ريال مااقولكم اش سووا فييا عند اول نقاش قال انا جبتلك السشوار وماني ملزم كان المفروض جبتيه من جهازك و من مهرك وبعدها سألني عن شهر العسل وليه مااخذت فلوسي معايا واني كان المفروض اخدها سألته ليه قلي عشان تدفعي وكان المفروض اني اساهم معاه واقوله خذ هدا للرحلات وهدا مدري لايه وافتكر سألني عن الفلوس بسفرنا بس قلتله ماجبتها انا في حياتي ماخطرلي انه بداخله متوقع مني ادفع معاه اكتشفت ان تفكيرنا وطريقة تربيتنا مختلفه عندنا عيب اكبر عيب اكون مع رجال واصرف وكمان بشهر العسل بالذات هدا الرجل ولو ابغى ادفع موا هوا اللي يقول او يطلب الرجل النفقه عليه ودينا الاسلامي اختص الرجل عن المرأه بالانفاق ولو ساعدته اساعده من نفسي وهوا ياخد مني على استحياء او يعتبرها دين مو كدا ويقولي لو شرياني كنتي دفعتي وساهمتي وش هالكلام انا نفسيتي تعبت حاسه اني بتكلم معاه نفس اللغه بس مو قادره افهمه واكتشفت ان اخته بتدفع مع زوجها بالبيت والكهربا فممكن يبغاني كدا
انا بالملكه كان ياخدني عمطاعم ويصرف ماعمري حسيت بقصور غير قبل الزواج بمده بسيطه نطلع ونرجع مو دايمن نتعشى سوا عشان الوقت ويلحق يرجعني البيت وهوا يروح يكمل شغل يمكن الموقف الوحيد اللي استرجعته دحين و حصل بالملكه هوا إني خليته ياخدني عسنديان حتى احجز المسكه وقلتله لاتنزل من السياره ثواني ماكنت ابغاه ينزل حتى بسرعه احجز و ادفع العربون بس شوي وانا بتكلم عن لون الورد والستراس لقيته دخل وجلس وبعدها الرجال سوالي الفاتوره 450 ريال وطالع في زوجي قله كم بتحبوا تدفعوا عربون زوجي ماعبر الرجال وطلع جواله قعد مادري اش يسوي فيه وأنا دفعت المبلغ وعديت الموضوع بس بيني وبينكم حسيت بقلبي شي اني مع رجااال كان المفروض هوا يدفع او يعرض عالاقل
وبعد الزواج ورجوعي من السفر بشهر كانت اختي نازله السوق وكنت حنزل معاها قلي ما اشتري شي غير بعد سنتين واكتر وكيف اشتري وانا لسه مجهزه دبشي وقعد يقول إني انا واهلي واخواتي فانتازيا ومظاهر كذابه بنخلص فلوسنا عمانجو وزارا ملابس كلها صيني وبيقولي اشتري من شبرا والهرم اللي مادري فين موقعهم رديت عليه إني حفضل نفس ماتزوجتني ويوم دقيت عبابي إنت شفت لبسي وحياتي ووافقت عليها فجلس يقولي اني انا ماابغى اعيش و كيف ابغاه يحوش ويجمع فلوس ولما حسيت مافي نقاش معاه طلبت منه مصروف شهري حتى ماسمع منه كلام كل مابغى انزل السوق ولا خلي بخاطري شي قام رد علي وقلي عرفيلي المصروف وقعد يقولي مصروف ليه عشان بنام معاكي وهدا الكلام جرحني كثييير ! هوا عنده المصروف لما يكون الزوج مسافر انا صممت عرأيي وطلبت منه يسأل فيه فسأل صاحبه وقله ايوا المصروف الشهري حتى يكون بيدي واصرف منه فخصصلي 500 ريال بالشهر و50 ريال بالاسبوع بطاقة موبايلي وانا مو مقتنعه فيه بس اش اسوي سكت وبعدها يوم جا اعطاني وماقدرت اخذ منه عشان كلمته مصروف عشان بنام معاكي قلتله انها جرحتني فقام قلي انا قلتلك كدا عشان قلتيلي مو مؤدب وفعلا قلت بس اول بشهر العسل وقلتها لانه كان يشتم شتايم معيبه وبذيئه لحقون الرحلات يوم يعطوه سعر مايعجبه فقلتله هدي الالفاط تطلع منك مافيها ادب وانت مو مؤدب
أنا يابنات تكلمت مع زوجي بكل شي ماعدا موضوع طلاقه واخوه ماقلتله اني اكتشفتهم
انا دماغي حيتفجر حاسه نفسي مهمومه مو عارفه اش اسوي والدي جاي من السفر هدا الجمعه لازم تشوروا عليا وقولولي اش تنصحوني اسوي هل فيه امل بهالرجال وشخصيته وتصرفاته يتعدل انا تعبت نفسيتي
حدعيلكم ياارب حقق أماني كل من يساعدني واكتب له ولأهله كل الخير وفرج همه وحقق له سئلته وإقضي له حاجته يارب
