عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مراحب
😐 😛
حابه اقولكم قصتى .,,,, فى حملى الثاني حملت بتؤام ,,,,
وكان لى شهر ونص حامل تقريبا قالى الطبيب فيك تؤام …. وبنهايه الشهر الرابع قالى … ولد وبنت
بس مايتشابهون كل واحد بكيس …
طبعا حمدت ربى على النعمه وخليت الموضوع سرى بين وبين زوجى …
امى علمتها وانا بنهايه الثامن ,,, مع ان الكل شاك بكبر بطنى ….
مرت شهور الحمل صعبه … وانا فى الرابع كانى بثامن
حتى النفس يضيق عليك …. وكان عندى الظغط مرتفع ,,,,
وتنومت كثير بالمستشفى بسبب الظغط ,, اتنوم ايام واطلع
تنومت بالرابع
والسادس
ونهايه السابع
والتاسع كله كان تنويم وتحت الملاحظه بالمستشفى
وانا بنهايه التاسع كنت نايمه بالمستشفى ( العسكرى برياض )
جاء معى طلق .. وتباشير ولاده …
قمت من سريرى ونزلت منى مويات ,,, وظغطت على الجرس …
وجت الممرضه ,.,… وشالونى غرفه ولاده الفجر ….
جاءنى دكتور اول مره اشوفه …. لانى متابعه بالعسكرى واعرف اغلب الدكاتره لو بالاسم
هذا اول مره يمر اسمه على …
طبعا هذا الحمل الثانى لى …. قبل جبت بنت طبيعى ….
وعارفه اعراض الولاده …
وكنت مدركه وانا بغرفه الولاده انى معى ولاده من الطلق والمويات
واحس شي تحت يدف بقووه ,,,,
لبسونى ملابس الولاده وحطونى على السرير .,,,,
وحطوا الاجهزه بيدى وبطنى …
لقيت الدكتور يقرب منى ويقول :
لازم تولدين عمليه …. التؤام متشابك مع بعض
واخاف تولدين طبيعى ونظطر نشد احد منهم
لانهم مثل ما اشوف الحين بالاشعه صايرين الاثنين فوق بعض
كنهم كوره متكوره متحده …
ومع الم والوجع … والخوف على عيالى من الشد او يصير فيهم شي
وقعت على العمليه …
ودخلت غرفه العمليات الصبح بدرى …
وماشاورنى بنج كامل على طول ….
وقمت بعد يوم متخدره من البنج وكنت بغرفه الملاحظه
وقالت لى الطبيبه .. خفنا عليك لانك طولتى ماقمتى
وخفنا من دخولك بغيبوبه ….
ولدت الثلاثاء الصبح ,… وشفت عيالى الخميس…
ماكنت صاحيه افتح وارجع اغمض من جديد…
طبعا كونى قيصريه …. جلست ثمان ايام بالمستشفى بعد الولاده
وكانت اسوء ايام حياتى ….
العسكرى مستشفى الاطباء فيه ممتازين …
بس طاقم التمريض زفت ….
بعد يوم من جلوسى بغرفه الملاحظه نقلونى غرفه ….
وبدات المعاناه …. حطوا عيالى عندى….
وقالوا يالله قومى رضعى وغيرى ….
والله كنت ما اقدر اقوم من الوجع والعمليه …. وانا صاحبه وزن كبير شوى
واكيد الوزن بياثر…
وكان عيالى يبكى واحد وينام وبعدين يقوم الثانى …
وكنت اواصل طول اليوم مع هذا وهذا …
والله انى لما اطلب لهم حليب من الممرضات ماحد يجيب لى ,,,
وفى مره قام الولد يبكى جوعان …. وضربت الجرس ساعه ماحد رد
قمت نزلت من السرير حافيه … نعالى دخلتهم عامله التنظيف تحت السرير
وماقدرت اجيبهم …
ومشيت حافيه بالسيب لحد غرفه الممرضه
ودخلت عليهم وانا ابكى
والممرضه تصرخ وتقول جيبى مرافق معك يخدمك
تخيلو مانمت لى ايام
ولا اكل زين
ولا راحه
وعيالى انا الى ارضع واغير لهم
وثنين مو واحد ….
بتسالون عن اهلى ….
ولدت باجازه صيف وكل الى اعرفهم مسافرين
وعندى شغاله بس تركتها مع بنتى الكبيره بالبيت,,,
وفى يوم ولادتى الرابع شد على جمبى مكان العمليه
وقمت اصيح بعالى الصوت .,… ماحد طل على من الممرضات
وجت بعد مده وحده وصرخت بوجهى وقالت عادى … الالم عادى
حتى حبوب البنادول بشحاذه …
كنت كل يوم اطلب من الدكتور اطلع ,.,,,
تعبت خلاص
والله ياخوات ان عيالى ماروشوهم طول الثمان ايام
طلبت من الممرضات وماحد يرد على
وقالت لى ممرضه: قومى انتى مدام روشى بيبى …
انا لووقفت روشت واحد ماقدرت للثانى من التعب
والله ان المريضه الى كانت معى بالغرفه المشتركه والاده طبيعى مشاء الله
كانت تقوم احيانا باليل لما تسمع عيالى الاثنين يصحون كلهم يبون رضاعه
وانا مو قادره
ارضع واحد والثانى يصيح
ارضع واحد والثانى يستفرغ ويشرق
كانت تقوم جزاها ربى الجنه وترضع معى واحد من الصغار …
بعد ثمان ايام من العذاب والوجع والجوع والالم وكل انواع التعب
طلعت من المستشفى
ورحت البيت مع عيالى ….
بالبيت ارتحت احسن من المستشفى …
وفى يوم ولادتى العاشر
يعنى بعد ماطلعت من المستشفى بيومين
كنت جالسه على سريرى
وحسيت ببروده بجسمى…
ولما وقفت حسيت الدنيا تدور فينى …. ولقيت الشغاله حطت يدها على راسها
وقامت تصيح … مدام ,,,دم … دم
وانتبهت لثوبى لقيته كله دم من قدام
كان ثوبى مبلول دم والمكيف شغال وحسيت بالبرد
طحت على وجهى بالارض
وشالنى زوجى بعد مالفنى بشرشف وودنى الطؤارى
ودخلت وانطقيت ربع ساعه … لحد مازوجى ارتفع صوته معهم
شلون يتركونى وانا اكب دم …
دخلت القسم وكشفت على دكتوره
وكانوا بيشفون من وين الدم ….
طلع من العمليه نفسها
وسمعت الدكتوره,,,
تقول لزوجى ….
العمليه مفتوحه ….
وسمعتها بعد تقول للمرضات … انقلوها غرفه العمليات …
ودخلت غرفه العمليات للمره الثانيه
لان عمليتى انفتحت كلها …
وصدقونى للحين ماعرف السبب!!
يمكن من الايام الى قضيتها بعد ولادتى بالمستشفى وكنت اقوم وشيل عيالى
يمكن الجرح تاثر … مدرى
المهم دخلت العمليات مرتين خلال عشره ايام
تونى قايمه من بنج ودخلت بنج ثانى …
طلعت وودونى غرفه ….
وكان لى عشره ايام والاده ….
والله ياخوات قضيت بالمستشفى ثنين وثلاثين يوم ,,,
يعنى قضيت نفاسى بالمستشفى …
ليه … لان الجرح بعد الفتح التهب ,,, وفيه صعوبه ان يلتم بسهوله
وكل الدكاتره رفضوا اطلع ….
وجلست فوق الشهر بالم
والجرح مو راضى يلتم
طبعا الاكل كان زفت
وانتم عارفين الاكل له دور بشفاء الجروح …
بس الشكوى لله
وبالفتره جانى حمى نفاس وارتفاع بالحراره
وبواسير
وعذاب الله كفيل فيه …
كل هذا كوم ونفسيتى التعبانه كوم ثانى,,,
كنت طول اليل ابكى وافكر بعيالى …
وكان نسبه الهموجلوبين عندى 3 من اصل 13
والله ياخوات انى صادقه… لانى نزفت بعمليه لما انفتحت…
وكان الحل نقل دم … وجت الدكتوره كشفت على
وشافت عيونى وقالت البياض طاغى
لازم تنقلى دم …
ونقلت قربتين دم …. وسط خوف والم …
طبعا الفتره الى قضيتها بالمستشفى ماشفت عيالى…
وبعد مرور 32 يوم وانا بالمستشفى…
جاء الصبح لى دكتور سعودى …
وطلبت منه اطلع …
قالى انتظرى شوى عشان نتاكد من الجرح …
بكيت ….
قال ليش تبكين ….
قلت له : يادكتور نسيت ملامح عيالى …. لى شهر ويومين ماشفتهم
اذكرهم وعمرهم عشره ايام
هز الدكتور راسه
وقال لاحول ولا قوه الابالله
وكتب لى خروج وقال ان شاء الله الشى يفيد نفسيتك وانتبهى على نفسك
وطلعت من المستشفى ولما شفت الشمس برى غمضت بعيونى لى مده ماشفتها
كنت امشى وانا اهتز ووزنى نقص سبحان الله …
ولما دخلت البيت وشفت عيالى.,,
والله ياخوات ماعرفتهم
كبروا عن اخر يوم طحت فيه عندهم وشالونى
ولقيت زوجى يقولى…
هاه تعرفين الولد من البنت
لانهم كانوا لابسين طقم ابيض…
واخذتهم بحضنى وبكيت …
طبعا من الايام الحمدالله تحسنت ,,,
واظطريت اكل حبوب مانع لانى كرهت الحمل وجانى خوف وهلع …
والحبوب زودت وزنى
وبسبب العمليه وانفتاح العمليه مره ثانيه
خرب شكل البطن عندى
وسبحان الله حتى بشرتى تغيرت
وصرت لما اشوف نفسى بالمرايه ماعرف نفسى
كلى تغيرت
شعرى
جسمى
وبطنى
وبشرتى
يمكن الدم له دور
وانتم عارفين وحده قضت النفاس بالمستشفى
يعنى الاسبوع الاول من ولادتى كنت بالمستشفى بعذاب
مع عيالى
ورحت للبيت يومين
ورجعت من جديد بعمليه مفتوحه وجلست شهر ويومين
نفاس بالمستشفى كل شي كان عدم
اكل
نوم
ونفسيه
وطلعت من ولادتى بتؤام خربانه بمعنى الكلمه
كل عله ممكن تتخيلونها فينى
من الجوع والبرد والشمم من عطور الممرضات بالمستشفى
وممرضات اقل مايقال عنهم يهود مو اوادم …
وعرفت بعد كذا ان الحريم تعطى الممرضات بخشيش عشان تمشى معك …
والله ياخوات
جلست سنه كامله بالبيت اعتزلت العالم لان عيالى صغار
عندى شغاله بس تساعدنى,,, بس كل شي كان على انا
وكانوا عيالى خلال السنه
يجوعون سوا
ويبكون سوا
وترتفع الحراره سوا
سنه كنت خارج التغطيه
حتى زوجى شافنى لاهيه وتعبانه وابتعد وصار مايشكى لى
بعد سنه لما صاروا يمشون
تنفست شوى ….
وانا اعرف ان اى وحده تخرب من الولاده لازم تولد مره ثانيه عشان تصلح امورها
انا كنت مستبعده الشى ,..,, لانى ولادت بقيصرى
وانفتحت العمليه
وعيالى صغار
واثنين
وتحملت شي ماحد يعلم فيه …
كل هذا بكفه
والناس بكفه …
الكل حسدنى لانى جبت تؤام
وهم مايدرون
انى دفعت الثمن من صحتى …
الناس تشوف التوام وتقول الله ..,.
يازينهم مع امهم … بس امهم الله يعينها من جد…
ادرى انى ممكن اكون حاله خاصه
بس حبيت اقولكم قصتى
والمى
اليوم
عيالى التؤام عمرهم ثمان سنوات
بالصف الثانى
وطبعا حملت بعدهم … وكنت مرعوبه
ورحت للدكتوره ابكى
وقلت للدكتوره.,, حملى واحد او اثنين
وارتحت كثير لما قالت لا جنين واحد بس ….
ااسئل الله ان يجعل مامر بى تكفير وحسنات
والله يرزق كل وحده ما تتمنى يارب
واللى تتمنى تؤام
تقول الحمدالله
يمكن من التؤام تتعرضين لقيصريه مثلى
او تحسدك الناس وهى ماتدرى عن المك
انا تعبت كثير بحملهم وولادتهم وتربيتهم
والحين لما اشوف عيونهم
واشوفهم وهم يقولون لى ماما باى باى
وهم رايحين الصبح للمدرسه
انسى كل وجعى ……
(((((قصه نقلتها لكم شفتها حزنتني وخوفتني لاني حامل بتوم بس الحمدلله على كل حاااااااااال))))))
