عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
خواتي الغاليات كل عام وأنتن بخير
حاسه اني من زمان مانزلت مواضيع
ففكرت وش أطرح لكن موضوع من تجاربي ومعلوماتي
فحبيت اقولكن علاج عين الشعر لأن مرت علي
حالات كثير من زبوناتي يقولن شعورنا
بدت تتساقط بعد حضور عرس او مناسبه
والعين حق نسأل الله أن يحمينا
وأنا أوصيكن ونفسي بالمحافظه على الأذكار
واذا شعرك طويل وكثير لاتفتشينه قدام أحد
لأن الناس ماتعطي خير خليكن مثلي ماعاد أحد يشوف شعري..
المهم اللي تحس انها معيونه في رآسها أو شعرها
وعندها تساقط غريب وحكه تبدأترقى على نفسها
وتتوكل على الله وحده وتلجأ له بالدعاء
وعليها تقوم بشيئين مهمين:
الأول: تتبخر بالشبه البيضاء ….أكيد بتقولن كيف؟
خواتي الشبه البيضاء تلاقينها عند العطار
اخذيها ودقيها واطحنيها واحفظيها عندك بعلبه
واذا حبيتي تستخدمينها ولعي فحم وحطيه بمبخره عاديه حطي عليها شوي من الشبه
وبخري فيه راسك مع الدعاء بالشفاء.
ممكن تسوينها 3 او 4 مرات بالأسبوع او يومياً لمدة اسبوعين الى شهر.
الأمر الثاني وهو مهم جداً صب ماء زمزم على الراس
وكلنا نعرف فوائد ماء زمزم وكما قال عنه رسول الله
عليه الصلاة والسلام بما معناه ماء زمزم لما شرب له
طبعاً بأي وقت وانتي جالسه صبي شوي من موية زمزم على راسك
وادعي لنفسك طبعاً صب مو غسل بأي وقت تحبين والأحسن تكوني طاهره
وماتنسون المحافظه على الأذكار والرقيه والدعاء بالشفاء مع ركعتين آخر الليل.
خواتي وبناتي هذي تجربتي نقلتها لكم لأني قبل كم سنه صاب شعري عين بعد زواج
رحت لكذا دكتور ماستفدت الا شيء بسيط
بس بعد ماسويت هالطريقتين خصوصا حقت ماء زمزم
الحمد لله توقف التساقط ومع برنامجي صار شعري
غير ولله الحمد والمنه حتى صرت اخاف عليه من عيون الناس
دائما ألمه أو اسوي تسريحه بسيطه.
نصيحه من أمي الله يحفظها لي
أمي تقول أيام زمان يعني لما كانت شابه:(
وكانت أمي توها طالعه من النفاس جتها حرمه كبيره ونصحتها انها تتبخر
بالجاونيه ولبان الدكر تقول الحرمه اللي تتبخر فيه
ماتجيها العين بإذن رب العالمين
والجاونيه زينه بعد للبيت لأنها تقتل الجراثيم والفايروسات
وأحسن نوع اللي لونها ابيض برمادي
والله يحمينا جميعاً.
الموضوع من تجربتي مو منقول
واللي تبي تنقله تكتب منقول من
شيخة عتيبه أم ناصر
ومع السلامه.
