عالم البنات النسائي كل ما يخص المرأة العربية من ازياء وجمال والحياة الزوجية والمطبخ
النهاردة هنزلكم غدانا وكان عبارة عن حمام محشى رز بالكبد والقوانص وكمان السبانخ بالجزر يمممممم
اولا الحمام المحشى والمحمر بالخطوات
نغسل الحمام جيدا من الداخل والخارج ونجهز رز للحشو انا بعمله نى فى نى رز وبصل مبشور وتوابل وملح وفلفل وفص توم وفلفل اخضر مع الكبد والقوانص مقطعين صغير جدا وواخدين تشويحة فى الزيت
وندعكهم مع بعض ونحشى الحمام من جوه ونقفله بخلة او ممكن نخيطه عشان ما يفكش
بعد كده نسلقه لحد مايستوى ونحط فى الشوربة حبهان وورق لورى 
وده بعد ما يستوى
وبعدين نحمره فى الزيت او ممكن ندهنه من جميع الجوانب ونحطه فى الفرن
ثانيا السبانخ بالجزر
انا بموت فى الطبق ده وخصوصا فى البرد عشان بيدفى وزى ما احنا عارفين فوايد السبانخ مليانة حديد ومفيدة جدا ده مع فوايد الجزر طبعا
انا بعملها برده نى فى نى عشان الريجيم
نغسل السبانخ جيدا ونقطعها رفيع جدا ونكون غاسلين الجزر ونبشرة بالمبشرة العادية
ونحضر حلة فارغة ونبشر فيها بصلة متوسطة ونقطع فصين ثوم وملعقة زيت ذرة ونحط السبانخ والجزر المبشور وشوية صلصة صغيرين ونضبط الملح ونحط توابل وشوية شوربة ونتركهم على النار بس ما نحطش شوربة كتير عشان السبانخ بتنزل ميتها وما بياخدش اكتر من تلت ساعة على النار بيستو بسرعة
وبالهنا والشفا
