قالت تغزل بي وشف حبة الخال

قالت ترى منت بحلو قلت رجـال
والزين ماهو من شروط الرجوله
الزين يلقى عند لابسات الشـال
والرجل زين ان كان زانت فعوله
قالت علامك تلبس شماغ وأعقال
انت بدوي قلت بدوي من حمولـه
مالبس بناطيل لها انواع واشكال
وامتر الشارع بعرضـه وطولـه
قالت أجل راعـي معاميـل ودلال
شرب القهاوي تحسبونه بطولـه
قلت اسمعيني وأفهمي كل الاقوال
تمعني فـي كـل حرفـن اقولـه
كيفي يا بنت الحضر دله وفنجـال
وحليب خلفا بالمـراح معقولـه
احب الكرم والطيب وعلوم الابطال
مغروس فينا من زمان الطفولـه
قالت ترى بنت البدو حظها مـال
قلت احذري حذرا تكوني جهولـه
بنت البدو يابنت تضرب بالامثال
غير الجمال وطاعه الله خجولـه
زينه على كل المزاييـن تهتـال
مثل القمر ينشاف والحد يطولـه
ماتنخدع في كل ماكـر ومحتـال
اللي لهم بالسوق صوله وجولـه
هي مهرتن تصعب على كل خيال
وانتي ومثلك عسفهـا بالسهولـه
قالت تغزل بي وشف حبة الخال
ناظر عيوني والرموش الكسوله
ونضر جديلن فوق الامتان ميـال
ومبسم يعجبك يعجبك تنظيم لوله
قلت العفو ما يستوي زيـن وهبـال
واللي تبينه شيبي عـن حصولـه
قالت وقلت كلمة الحـق تنقـال
والزين ماهو من شروط الرجوله

ان شاء الله تعجبكم