قصة تسقيطي

بسم الله الرحمن الرحيم
السلام عليكم ورحمة الله وبركاته
حبيباتي الفراشات انا كنت اتابعكم وربي اني ادعي لكل واحده منكم سواء اللي تطلب مباشر او بدون طلب منها اني ادعي للي ما حملت واللي بتولد حتى و مارديت كتابيا
المهم انا راح اقول لكم قصتي انا من تقريبا سنه حملت لكن في نهاية الشهرالثاني جاني اجهاض مدري وش سببه والحمدلله على كل حال
جاني اكتئاب وضيقة صدر مو اعتراض انا مؤمنه بما قدره الله لي لكن احساس الامومه
بعدها تقريبا بفترة ست شهور مع المتابعه الطبيه حملت بفضل الله تعالى بس بعد ماكملت اربع شهور ونص يا الهي شئ ما اقدر اتصوره الى الان
قمت من النوم ورحت لدورة المياه الله يكرمكم ابي اتوضـأ لصلاة الظهر مدري الا حسيت بشئ بيطلع مني مثل الكورة خفت مرررررررررررررررررررررة وقمت على طول
رحت وجبت مرايه صغيره بشوف اللي لمسته بيدي يممممممه شفت شئ لون بنفسجي متكور بيطلع مني خفت وكلمت امي وقالت الله يستر عسى مهو المشيمه نزلت لانها كانت قريبه من عنق الرحم جاني رووووعه ودقيت على زوجي ورحت مستشفى رعاية الرياض الاسعاف على طول وبعد ماكشفت علي الدكتورة قالت لي تسقيط 🙁
قلت وشو قالت كيس الجنين طالع من العنق 🙁 وقعدت ابكي يارب يارب وسالتها فيه امل تدخل الكيس وتسكر العنق قالت مستحيل
سوو لي اشاعه الساعه 5 الفجر وقالت لي دكتورة مصريه سبحان الله الجنين جوا الرحم والنبض كويس ومافيها اي تشوه او عيوب خلقيه
قلت طيب ايش السبب قالت لي مش عارفه سبحان الله
المهم دخلوني غرفة الولاده الساعه 2 بالليل وصوموني احتياطيا عن الاكل والشرب وتخيلوا الخوف والقلق والتعب بس الحمدلله على كل حال واعطوني طلق صناااعي من الساعه 6 الصباح وبدت الالام من بعد نص ساعه مغص وتعب وشوي الا اطلع على مسؤليتي من الاكتئاب واعطوني مسكنات للالم بس كنت والله اصيح من المغص كاان شديد وماجهلكم مغص الطلق الصناعي ,,, وولدت الساعه 6 ونص قبل المغرب بشوي وكانت بنت وكانت تنبض وتتحرك حتى قطعوا الحبل السري توقف النبض والحمدلله على كل حال

بس لي طلب صغير تكفووون اللي تدخل واللي ماتدخل تدعي لي ان ربي يرزقني الحمل التاام الخلقه من غير زياده ولانقصان والثابت الى الشهر التاسع
وتكفووون اللي مرت بمثل تجربتي تحكي لي وش اسبابه وهل حملت مرة ثانيه من دون متاعب لاني نفسيا تعبااانه
والله يعطيكم الف عافيه لاتنسوني من دعواتكم واللي على وشك ولاده اسال الله لها الهووووووون وانها تدعي لي بالاسم (نوال ) ان الله يرزقني عاجلا غير اجل ويحسن خلقه ويتم حمله من غير متاعب والله اني حتى من يوم طلعت من بطني بنتي كنت اسمع واحده تصارخ بغرفة الولاده دعيت لها بالهووون من غير ماتدري ,,,