قصة حملي الأول

تأخرت الدورة عليا 5 أيام وكانت آخر دورة يوم 12/1/2009 وحللت باختبار الحمل المنزلي وطلع لي خط غامق والتاني خفيف مرة

رحت المستشفى تاني يوم وكشفت الدكتورة عليا بالآلترا ساوند وما لقت شي وقالت لي نتأكد بتحليل الدم أحسن

سويت تحليل الدوم وطلعت النتيــــــــــــجة Positive وقتها طرت من الفرحة ونصحتني الدكتورة بالنصائح المعتادة: لا تبذلي مجهود، ريحي نفسك، أتغذي كويس، وأعطتني حبوب الفوليك وقالت لي اليوم دخلتي الشهر التاني في الحمل
❗
الأسبوع الخامس من الحمل صار لي نزيف بسيط لأني بذلت شوية مجهود ورحت للدكتورة على طول، طبعا خاصمتني الدكتورة، وأعطتني حبوب مثبتة، وقلت لها أنو جاني ألم مو طبيعي في بطني لدرجة إني أبكي وأصرخ منو، قالت عادي مادام في البطن مو تحتها، وكشفت عليا بالآلترا ساوند وقالت لي برضو ماني شايفة شي

طبعا أنا كنت أسألها ليش الجنين ما بان للآن وهل هذا طبيعي؟ وكانت تقول ايوه عادي وطبيعي وكتير يصير زي كدا، بس الصراحة أنا ما كنت مرتاحة لكلامها

الأسبوع السادس راجعت الدكتورة عادي، وكشفت عليا بالآلترا ساوند وشافت شي مررررررة صغير قالت لي انو هوا دا الجنين، والحمد لله الجنين استقر في الرحم، طبعا هنا أنا وأبوه طرنااااااااااا من الفرحة وحسيت إني أخيرا إرتحت من هم كبير

لكن الدكتورة حبت تطمن أكتر وقالت لي روحي سوي أشعة مهبلية عشان نتأكد، على طول نزلت وسويت الأشعة المهبلية، لكن دكتورة الأشعة كانت تقول إنها مو شايفة لا جنين ولا كيس حمل سواء جوا الرحم ولا حتى برا الرحم، طبعا هنا فجعتني فجعة عظيمة، طيب ولدي فين راح، قالت مدري يمكن طاح أو أصلا ما كان فيه حمل، هنا كنت حتجنن كيف ما كان فيه حمل أصلا، طيب ايش هوا دا الشي الصغير، قالت انو مرررررررة صغير مستحيل يكون جنين في الأسبوع السادس بهذا الحجم، يمكن يكون دم

رجعت للدكتورة على طول بنتايج الأشعة المفجعة، وكنت أتمنى إنها تقول كلام غير، لكنها قالت نفس الكلام بالزبط، وزودت إنو أحسن شي في دي الحالة نسوي التحليل الهرموني، نقيس نسبة هرمون الحمل في الدم اليوم وبعد يومين نرجع نقيسه تاني، اذا تضاعفت نسبةو الهرمون معناه انو الحمل الحمدلله سليم

رحت تاني يوم لمستشفى تاني وقالت لنا الدكتورة نفس الكلام، طبعا أنا جاني احباط توقعت تغير رأيها أو تكون أجهزتهم خربانة، وكنت حروح لمستشفى تالت لكني ما رضيت أنو احبط تاني، واستسلمت لقضاء الله وقدره

بعد يومين دخلت الأسبوع السابع من الحمل، وراجعت الدكتورة ومعايا نتايج التحليل الهرموني الأول، الدكتورة قالت انو الحمدلله النسبة عالية جدا وهدا شي كويس، لكن لما كشفت عليا بالآلترا ساوند شافت مويات كتير على جنبين الرحم هنا خافت بالمرة وقالت لي سوي أشعة مهبلية تاني أحسن

لما نزلت وسويت الأشعة المهبلية، دكتورة الأشعة انفجعت لما شافت المويات في الرحم، وشافت كيس الحمل والجنين في قناة فالوب اللي في اليسار، قلت لها أنا كنت عندك من يومين وما كان في شي باين، ما صدقتني انو في يومين بس يصير دا كلو، قلت لها انا اليومين اللي راحو رجع لي ألم بطني وكان بالمرررررررررة شديد، ولما سألت الدكتورة عنو قالت عادي، برضو ما اقتنعت الين تشوف الأشعة اللي كانت قبل يومين

طلعت للدكتورة بنتايج الأشعة وعلى طول قالت تنويم، وقتها أهلي كانوا مسافرين وزوجي كان مسافر ما كان جنبي غير أخت زوجي جزاها الله كل خير، وتنومت أول ليلة بعد ما أعطوني إبرة تقلل نسبة هرمون الحمل، وتنزل الحمل على طول من دون عملية ولا شي، لكن في الليل رجعت لي الآلام مرة تانية وأعطوني مسكن وقالوا لازم بكرا تدخلي عملية، الظاهر الإبرة يبغالها وقت وقناتك ما تقدر تستحمل لا سمح الله ممكن تنفجر من حجم وضغط البيبي

تاني يوم جاني قلبي وحبيبي، وصل الصباح على أول طيارة قدر يطلع عليها الله يخليه ليا يا رب، والساعة 12 الظهر دخلت غرفة العمليات، التخدير كان كامل، وسولي 3 فتحات في البطن بالمنظار، في اليمين عشان يطمنوا على قناة فالوب اليمنى، وفي النص عشان ينظفو الرحم لأنو كان عندي نزيف داخلي وصل للتر ونص دم داخل الرحم وهوا اللي شافتو الدكتورة وقالت انو مويات، وفي اليسار شقوا قناة فالوب وشفطو البيبي والحمدلله على كل حال، وكل الفتحات كانت ما بين سم و 1/2 سم بس الحمدلله

للمعلومية بس انهم ما يقدرو يخيطو قناة فالوب تاني لأنها مرة رقيقة لكنهم يسيبوها تلتأم بنفسها ويقولو 90% من الحالات رجعت قناة فالوب طبيعية بإذن الله تعالى

استمرت العملية إلين الساعة 3 العصر، ولما فقت كان فيه واحد بيصرخ عليا ويناديني باسمي وأنا أقول ايش يبغا دا استغفر الله، وماني قادرة ارد عليه واقلو اسكت بس ازعجتني سيبني أكمل نوم، بعدين وحدة حرمة كمان صارت تناديني بس صوتها أنعم من الرجال طبعا، وأنا كل اللي قدرت عليه إني أهمهم وأحرك راسي، لما فتحت عيوني صرت أسأل نفسي إذا كنت في الجنة، الحمد لله انهم يلبسو الممرضات في العمليات أخضر ولا كان من جد فكرت إني في الجنة، بس قلت مو معقول مو شكلهم ملايكة، طيب أنا فين؟؟؟ بعدين تذكرت اني سويت عملية، طيب ليش محد جنبي ليش محد يطالع فيا، لا يكون انهم يفكروني ميتة، وعشان ما رديت عليهم في البداية يفكروني ميتة، أبغى أصرخ ومافي صوت يطلع، كل اللي قدرت أقوله هوا اسم زوجي صرت بس أنادي عليه لأني عارفة انو هوا الوحيد اللي يعرف انو انا مو ميتة، فجأة ألاقي ممرضة فوق راسي تقول طيب طيب دحين ناخدك عندو، وأنا في عقلي أقول كدابة أصلها ما تعرفوا ولا تعرف كيف شكلو كيف تقول تبغى توديني عندو، فما صدقتها وصرت أرفع صوتي أكتر وأناديه يمكن يسمعني وما يخلي الممرضة الشريرة تاخدني على المقبرة لأني حية

المهم بعد الفلم الهندي اللي استمر 10 دقايق تقريبا، رجعوني الغرفة وشفت حبيبي وبدأت أفوق خلاص وأستوعب اللي صار