عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
هذي قصة ولادتي بقطوتي نصوري ..
ولادتي ماتوقعتها ابدا بما إني بكرية وماأعرف بهوايل الولادة .. وكنت اتوقع إني اولد طبيعي بس أمر رب العالمين فوق كل شي
في البداية انا كانت عندي مراجعة عند الدكتورة أول مادخلت التاسع ورحت وكشفت علي وقالت لي مفتوح تقريبا 2 سم … فرحت وقالت لي أمشي كل يوم ساعة .. كان هذا يوم الثلاثاء .. ويوم السبت كنت أمشي الساعة 11 في الليل .. وكنت أتعب وأحس بألم في ظهري مع المشي .. كنت أريح شوي وأرجع أكمل .. وكملت مشي للساعة 12 تقريبا بعدين قعدت ع النت وسهرت في المنتدى مع البنات .. بعدين ع الساعة 3 الفجر وانا جالسة جاني ألم في آخر ظهري فضييييييييع وانا جالسة ماتحملته قمت وقفت ومشيت شوي <<< طبعا كنت أمشي في بيتنا
وبعدها بدى يجيني ألم في ظهري مع مغص خفيف .. وأستمر كل 5 دقايق وظليت أشوف الساعة علشان أتأكد إلى الساعة 4 الفجر .. بعدها رحت ناديت أمي لأني كنت عند أهلي وقلت لأمي اللي صار معي .. قالت خلاص نروح المستشفى .. انا كنت خايفة قلت لها أخاف أروح يرجعوني .. قالت معليش ع الأقل نتطمن … وصحت أمي أبوي وراح صلى الفجر وانا جهزت أغراضي وأكلت 3 تمرات وشربت شوية مويه .. وجاء أبوي بعد الصلاة وطلعنا رحنا المستشفى .. وصلت المستشفى ع الساعة 5 ونص ورحت الطوارئ وعلى طول دخلوني غرفة الولادة وجت الممرضة وعطتني اللبس وغيرت ملابسي وجت الدكتورة المناوبة كشفت علي قالت مفتوح تقريبا 3 سم وانا أحس براس البيبي مع الفحص … بعدين أتصلت على دكتورتي وقالت ننتظر شوي .. وأخذوا مني فحوصات وتحاليل والحرارة والضغط وطلع ضغطي مرتفع ومعي زلال .. وجت الدكتورة طيراااان وقالت لازم تولدين لأن معك زلال وضغط وهذا خطر ( يسمونه طبيا تسمم حمل ) … بعدين عطتني أدوية تنزل الضغط وبعد مانزل ضغطي عطتني أشياء تحمي الطلق … وضليت للساعة 9 الصباح ومافتح أكثر من 3 سم .. بعدين قالت نعطيك طلق صناعي .. وبدت تعطيني كل شوي جرعة .. وأشتد معي الطلق .. وانا سبحان الله طلقي كان في ظهري .. والله يابنات كأنه ناااااااااااااار .. وكأن أحد يضربني بعصا .. ألم ماأقدر أوصفه … إلى الساعة 12 الظهر وانا معي هالألم ولافتح أكثر من 3 سم .. قالت الدكتورة بعطيك مهلة إلى الساعة 1 الظهر وبعدين بفتح الموية .. وسبحان الله الساعة 1 الظهر و5 دقايق انفتحت المويه من حالها .. وفرحت وأمي كانت معي تقول خلاص ان شالله ساعة وتولدين والدكتورة فرحت قالت خلاص ان شالله ينزل ويفتح الرحم مادام الموية نزلت … وأشتد معي الطلق أكثر وأكثر وانوااااااااااااااااااااااع الصراااخ وجا زوجي العصر لأنه كان في الرياض وجاني من الطريق على طول للمستشفى .. الساعة 3 العصر جت كشفت نفس الشي 3 سم .. مافتح أكثر .. وعطوني أوكسجين علشان البيبي .. والطلق كل شوي يزيد أكثر وأكثر من أول … وكنت اصرررررررررخ وأصييييح … كنت اترجى زوجي يولدوني بعملية … والدكتورة إذا جتني أترجاها تولدني .. وهم يصبروني ويقولون لي خلاص ان شالله تولدين .. طبعا مع الألم انواااع الخرابيييط على أمي وزوجي قلت لهم كلاااام الحين لما يذكروني فيه أجلس أضحك على نفسي .. لدرجة قمت من فراشي قلت لهم خلاص وخروا عني بطلع من المستشفى ماأبي أولد خخخخخخخخخخخ:( .. وظليت للساعة 6 المغرب وجت الدكتورة كشفت قالت الحمدلله مفتوح 4 سم .. وقالت يالله شدي حيلك … بس سم واحد لو يزيد ان شالله انك راح تولدين … وانا خلااااص أحس ظهري كأنه جمر … وبعدين ع الساعة 7 المغرب جت كشفت ونفس الشي 4 سم … قالت خلاص لازم عملية .. لأن الرحم عندي مش راضي يستجيب والبيبي مش راضي ينزل .. تقول في شي مخلي البيبي عالق فوق .. ياأما يكون الحبل السري ملتف عليه او يكون نازل للحوض مايل .. والبيبي له فتره من غير موية .. وبسرعة سووا الإجراءات والأوراق وجت دكتورة التخدير وأترجاها اقول لها تكفيييين بسرعة .. ويوم دخلت غرفة العمليات جلست ع السرير علشان يعطوني بنج نصفي ( أبرة الظهر ) وجلست الدكتورة تحاول تدخل الإبرة في العامود الفقري بس الإبرة مش راضية توصل لأن الموية كثيرة من الزلال حول ظهري … وعطوني بنج كامل بس ثواااني وانا ناااايمة … وماحسيت الا وانا في غرفة الإفاقة … وطلع البيبي ملتف عليه الحبل السري والحمدلله اللي خطاه الشر .. وصعدوني فوق غرفتي والحمدلله ولدت بالسلااااامة الساعة 9 بالليل .. وجبت قطوتي نصوري بعد معاناااااة وتعب … وبعد ماأخذت دووورة مكثفة في الطلق الطبيعي والصناعي وفي الأخير العملية وجربت البنج النصفي والكامل خخخخخ
… والحمدلله على كل حال …
ولدت يوم الأحــــد
23-4-1430هـ
19-4-2009م
الساعة 9 بالليل
ولدت في مستشفى بروكير ( الرعاية التخصصية ) بالخبر وان شالله راجعة بتجربتي في الولادة عندهم
