قصتي الحزينه في مرحلة البلوغ

السلام عليكم ورحمة الله وبركاته

أخواتي انا راح أذكر لكم قصة حياتي باتفصيل وارجوكم تسمعوني للنهايه وتنصحوني وتدعوا ليا

ولو إنو فيها بعض الاشياء الجريئه شويا لكن إتحملوني

قصتي طبعاً تدمي لها العيون وترق لها القلوب ويارب إنكو ماتعيشوها ولا يعيشوها حبايبكم وإن شاء الله يعيشوها عدوينكم

القصه بدت من كنت صغيرا توفت أمي وانا لسى ماوصلت مرحلة البلوغ طبعاً ابويا اتزوج ومن تزوج وإحنا شايفين الهم والغم والمرض ولا تقولو ليا ليه لإنكو تعرفوا عيشة زوجت الاب كيف تكون

المهم سهلها ربي ليا وعشت لحد ماوصلت مرحلة البلوغ وجتني الدوره ربي يكرمكم وطبعاً انا كنت عند زوجت ابويا يعني ماعلمتني كيف اتصرف اول ماتجيني الدوره ولا قالت ليا أيش البس وايش استخدم وايش اكل

وانا اول ماشفت البلاوي جاتني رووووووعه مررره ماكنت عارفه كيف اتصرف اتلملمت بفراشي وجلست ابكي ماعرفه اتصرف فبعد ماتوسخت كل حاجه

رحت وبدلت ملابسي ورميتهم بالدرام الله يكرمكم وتوسخت الثانيه وعملت نفس الطريقه ولما جت الثالثه خفت تفقد ملابسي وتسوي ليا حاجه

بعدها سألت قلت للشغاله عن الموضوع وراحت جابت ليا فوطه صحيه وكمان ماقالت ليا كيف استخدمها

فأنا رحت من حالي استخدمتها بالمقلوب وكنت اترك الفوطه الوحده 7 ايام طول فترة الدوره وهيا نفس الفوطه ماغيرتها ماكنت عارفه إنها تتغير كلم ماتوسخت حتى لما كنت اتحمم وانا رطبه والمويا تنقط كنت ارجع البس نفس الفوطه

وكانت ملابسي تطبع على فراشي وبما إني ماطلع من غرفتي محد شافني ولا عرفوا حاجه

وماكنت أكل زين لاني كنت وقتها صغيره وإنتو عارفين البزوره اكلهم كله كولا وشيبسات

المهم إنو إستمريت على هالحاله سنتين حتى بالمدرسه كان مريولي أحمر والكرسي مليان ويشهد علي ربي بهالساعه إنو الاستاذه ماكانت تقومني اجاوب حتى مانحرج ولا كانو ينزلوني افطر مع البنات تحت ولما نطلع تقول ليا المراقبه إلبسي عبايتك هنا بالفصل قبل تنزلي حتى تستر عليا

والله يسامحهم مانصحوني مافيهم وحدا أخذتني على جنب ونصحتني انا صغيره مابعرف شي ليتهم إخذوا اجر الله فيا

المهم بعد سنتين تقريباً جاتنا شغاله جديده ربي يوفقها هيا اللي علمتني إنو الفوطه تتغير كل ساعتين
لكن ماكانت تقولي عن الاكل

ولما وصلت الجامعه سمعت البنات بيتكلموا في البنت الخربانه وهذي المشاكل وكنت اسمعهم بدون مشاركه لانو ماعندي حاجه اقولها

وسمعتهم بيقولو إنو الدوره تبقى ماتنزل بالرحم إذا ما أكلتي كويس

فأنا بعد ماسمعت كلامهم قلت لازم أطبقوا فأول ماجاتني الدوره بأول يوم رحت للحمام الله يكرمكم ومسكت الشطاف حق المويه وشليت راسوا اللي متل الدوش

وفتحتوا على أخر حد ليه لحد ماصارت المويه قووووويه ودخلتها بذاك المكان الله يكرمكم لحد ماشفت الدم ينزل بقووووووه انا هنا انبسطت مراا قلت راح اكون كويسه موب خربانه لاني نظفت المنطق من الدم المتحجر اللي بيقولو ماينزل

وبعد ماشفت الدم إنبسطت وقمت ازيد واخليه 10 دقايق والمويه بتصب فيا

وجلست 3 شهور وانا كل ماجاتني الدوره اعملها لكن ماطلع مني الدم إلا اول مره فقط

وبعدها صرت اسمع صوت هوا يطلع من نفس الفتحه واشوف حاجه سايله كذا وبلاوي مرااا معفنه

وراح اسألكم بعد هذا اللي عملتوا خلاص يكفي صرت كويسه لاني معاد شفت حاجه تطلع مثل اول مره وإلا انا لسى خربانه زي مابيقولوا البنات وكيف أعرف هذا الشي

ودحينه عمري 30 سنه ولسى ماتزوجت إدعوا ليا ربي يبارك لكم محتاجا لكم