قصتي الحزينه .. لازم تقروها..

قبل فتره يمكن 4 شهور نزلت موضوع ابشركم فيه بحملي , ولو تبحثون في مواضيعي راح تلقون الموضوع,

لاكن للاسف فرحتي لم تكتمل واجهضت بعد شهرين من حملي >> الحمد لله على قضائه وقدره

ومثل ماحكيت لكم قصه حملي راح احكيلكم قصه اجهاضي ..

طبعا بعد ما عرفت اني حامل ما خليت ولا مخلوق انا وزوجي على وجه الارض الا وخبرناهم بهذا الخبر السعيد ,وسجدنا لله سجود الشكر على هذي النعمه العظيمه..

وطلبنا منهم الدعاء لنا بظهر الغيب بتمام حملي , لاني حملت قبلها ب 8 شهور واجهضت وكان هذا حملي

الثاني وكانت فرحتنا لا توصف والكل فرحلنا ودعالنا كأني انا الوحيده اللي حامل في العائله.. سبحان الله

مرت تقريبا شهرين بسلام وكنت استخدم الفوليك والمثبتات بانتظام , وكنت محاسبه في حركاتي وطلعاتي

ودخلاتي , وزوجي بعد عمري كانت الدنيا ماتسعه من الفرحه وكانت طلباتي اوامر كاني برنسيسه كل شي

يجي حدي وانا جالسه ومرتاحه يارب لك الحمد, والحمد لله ماكنت اعاني من شي واموري طبيعيه,

كنت انا وزوجي كل يوم نتكلم عن هذي الفرحه والمعجزه ونخطط لطفلنا القادم , ونخطط لموعد الولاده وين

راح تكون وكيف بتكون ونحدد ميزانيه للاحتفال بهذي المناسبه , وانا كمان كنت اتخيل نفسي وانا حامل

بالتاسع ورايحه المستشفى اولد واجيب طفل زي القمر واتصل ابشر زوجي ونبشر العالم كلها بطفلنا

واتخيل شكلي وانا نفاس وبعد النفاس سبحان الله شعور في منتهى الروعه…..الله لايحرمني هذا الشعور

المهم في يوم من الايام وكان هذا يوم اربعاء كلمتني خالتي قبلها بيوم وقالت بتجي عندي وقلت حياك الله,

قمت ارتب واجهز اموري وكان شغلي كله بحرص عشان النونو, المهم قمت اصلي الظهر , وبعد ماصليت

وخلصت حسيت بشي حار نزل مني , وقمت اكرمكم الله مسحت بالمنديل وشفت دم بني متوسط لاهو

قليل ولا هو كثير , انا مت من الخوف وقمت امسك على قلبي وقلت يارب لاتفجعني وتمم فرحتنا على خير

وقمت توضيت وصليت ركعتين ودعيت ربي بالحاح في السجود وقلت يارب لاتحرمني الفرحه يارب تمم وثبت

حملي على خير وعافيه , ودعيت ودعيت ودعيت وبكيت .. حسيت بنوع من الراحه وحمدت ربي كثيير

قلت يمكن الراحه هذي ان اموري تمام وقمت اطمن نفسي واقول يمكن الدم هذا طبيعي ينزل بين فتره

والثانيه للحمل..

المهم انا دقيت على زوجي كان بالدوام وقلتله عاللي صار وطمنته ان هذا طبيعي بس قلتله لازم تجي نروح

للدكتوره عشان نرتاح اكثر ونتطمن , جاء زوجي ورحنا طيران للدكتوره وشرحنالها اللي صار , وقالت يالله

على قسم الاشعه نشوف اخبار الجنين, المهم سوت لي اشعه وحسيت من ملامح وجهها ان فيه شي,

وقامت تطمني وتقول الكيس تمام بس النبض مش باين , بس انا ما ارتحت لكلامها حسيت انها عارفه شي

ومو راضيه تقول لنا , المهم جلس معاها زوجي وقال لها اعطينا على بلاطه كم نسبه استمرار الحمل ,

وهي شافتنا مرره خايفين وقامت تلف وتدور وان النبض مايبين الا في الثالث ومدري ايش وان الدم ان شاء

مامنه خوف ,وقالت الحركه ممنوعه والدرج ممنوع والجماع ممنوع, وقامت كتبت لي اسبرين اطفال وحبوب

ثانيه تقول اذا رجع النزيف وكان على خفيف خذي

الحبوب هذي واذا زاد لازم تروحي المستشفى ,,وهي عارفه انه اجهاض 100 بالميه..

المهم قمت ابكي في السياره وقام زوجي يهديني وهو ماشاء الله عليه مهيئ نفسه على اسوأ الاحوال

عشان ماينصدم, وكلامه كان مريحني كثير الله يسعده ويخليه لي يارب..

رجعت البيت ولازمت الفراش ولا تحركت ولاحركه وتطمنت ان الدم ماعاد ينزل مني وحمدت الله وزوجي

مسكين كل شوي يدق ويتطمن علي وابشره ان كل شي تمام..

الادويه اللي كتبتها الدكتوره ما اخذتها وتوكلت على الله وقلت المثبت كفايه وماكنت ادري ان قدره الله اقوى

من 100 الف مثبت..

جاء الليل وجت خالتي وقامت تخدم نفسها بنفسها انا ماتحركت من مكاني كاني الضيفه خخخ

رحت الحمام اشيك عالوضع لقيت نقطه دم , رجع لي الخوف بس طمنت نفسي قلت هذي نقطه مامنها

خوف ,, المهم بعد ماراحت خالتي وعلى الساعه 1 ونص بالليل قمت اصلي وادعي الله انه يتمم حملي

وادعي بالثبات وبعد ماخلصت صلاتي حسيت بنزيف مو طبيعي رحت الحمام الا دم غزير نزل مني ولبست

فوطه ورحت دقيت على زوجي في العمل وقلت له تعال بسرعه زاد الدم عندي, وادخل الحمام اشيك مره

ثانيه الا الفوطه الله يكرمكم امتلت دم حتى يوم شلتها ينزل الدم مني بغزاره بغيت انجن,,

قمت ابكي واصيح بشكل جنوني حتى جاء زوجي واخذني عالمستشفى, ماكان فيه دكتوره ما فيه الا

ممرضات فلبينيات , المهم قامت تكشف علي من تحت ودخلت يدها جعلها بالكسر وتناظر للدم وتقول

مافيه معلوم ايش هذا لازم تنويم, قمت صرخت عليها وقلت لها ليش تكشفين طيب دام ان ماعندك سالفه

المهم انا عرفت عن نفسي اني اجهضت لان بعد ماكشفت الممرضه نزل مني كذا قطعه ,

وزوجي عرف اني اجهضت من بكاي , المهم تنومت وطوووول الليل انزف وينزل مني قطع كبييره , واليوم

الثاني سوى لي الدكتور اشعه وكنت اتمنى انه يقول انه مو اجهاض ان حملي بخير, وقال لي الله يعوض

عليكم الجنين نزل كله والرحم نظييف ومايحتاج عمليه تنظيف .. طلعت من المستشفى على مسؤليتنا

ورحت لدكتورتي اللي اتابع عندها وسوت لي التحاليل والفحوصات اللازمه وبعدها بيومين طلعه نتيجه

التحليل ان كان عندي حصبه المانيه سبحان الله , وقالت لياحمدي ربك ان الحمل ما استمر لانه

اذا استمر راح يجيك طفل مشوه او ناقص وقامت تهديني وتدعي لي واعطتني العلاجات المناسبه,,

:ب 1:

المهم انا تعبت ومرضت نفسيا وجالي اكتئاب وضيقه وخنقه وطول وقتي ابكي وحالتي حاله, بغيت اموت

من الحاله اللي جتني , ماني قادره اتخيل انه في يوم وليله راح الحلم اللي كل شهر وانا انتظره,

زوجي حياتي اخذ اجازه عشان يواسيني ويقعد جنبي , كان متماسك اكثر مني ماشاء الله عليه,

وكان طول الوقت يسولف ويضحك عشان ينسيني اللي صار.. رحنا اخذنا عمره ورجعنا وانا نفس الحاله

الاكتئاب دمر حياتي , وطول وقتي اصلي وادعي واستغفر واتعوذ من ابليس واقرا قران, وسافرت بعدها عند

اهلي جلست عندهم شهر ,وتعالجت في مستشفى الامل للصحه النفسيه من قوه الصدمه اللي صارت

لي , والحمد لله هذا الشي اللي صار لي قربني من ربي كثييير وطول وقتي عالقران والصلاه والذكر

يارب لك الحمد والشكر يارب ثبتني عند المصائب واجرني على مصيبتي واخلف لي خيرا منها,

والحمد لله شوي شوي وتحسنت كثييير بعد الله ثم مضادات الاكتئاب, والحين انا الحمد لله طيبه

واموري تمام ورجعت لطبيعتي وحياتي كما كانت ,واسال الله العوض الصالح عاجلا غير اجل..

والله لايريكم مكروه , واعرفوا الله في الرخاء يعرفكم في الشده,,