.. قــصــة ولادتـــي بــاأحــلــى كــتكــوتـة فـي الكــون ..

مثل ماوعدتكم راح اخبركم بقصة ولادتي بأحلى كتكوتة ..

الكل يعرف ان يوم الاحد كانت الدكتورة محددة لي ان يحطون لي طلق صناعي ..

ورحت يوم السبت في الليل تاريخ 8102011م حق ترقيد ..

يوم السبت كان للفحوصات ونمت وقعدت يوم الاحد تاريخ 9102011م جاتني الدكتورة

الساعه 8 الصبح وسوت ليي تلفزيون علشان تتأكد من وضعية البيبي والحمدالله كان وضع البيبي متهيأ للولادة ..

وبعدها فحصتني .. >> طلعت روحي من الفحص ,, وحطت لي تحميلة طلق صناعي ..

وقالت ليي الرحم للحين ماتهيأ للولادة علشان جذي اليوم راح احط لج تحميلة وباجر ان شاء الله تحميلة ثانية ..

ومر يوم الاحد بألام خفيفة وتقدرين تتحملينها وكنت اتمشى في المستشفى واقرا قرآن وادعي ربي يسهل ليي وعلى كل الحوامل ..

ومن الليل وآنه اتألم وماجاني نووم من الالم وآنه اتمشى وادعي ربي ..

والوالدة الله يحفظها ليي ويايي طوول اليوم بس الليل ترجع البيت علشان اخواني عندهم مدارس ..

المهم على الساعه 5 الفجر الالم زااد ,, والساعه 7 وصلت الماما وكنت آبين لها ان مافيني آلام مابيها تحاتيني ..

وعلى الساعه 8 جاتني الدكتورة فحصتني قالت 1 سانتي >> ام التحطيم

وحطت لي التحميلة الثانية وسوت لي توسعة >> طبعاً الحال يرثى له 🙂

وقالت ليي ان شاء الله العصر راح تولدين ..

>> وفديتها الدكتورة ماقصرت معايي الشاهد الله ان تعاملها مع المرضى جداً مريح ..

الله يوفقها ويرزقها باللي تتمنااه ..

وظليت اتعصر واتألم >> طبعاً بعدها الالم موصل التووووب عندي وماأقدر ماآبين للماما ..

لان كان واضح عليي الالم وآنه اتعصر

وظليت اتعصر ليي الساعه 1 الظهر وآنه بس اتعصر مكاني وجاتني الدكتورة وفحصتني قالت 4 سانتي ..>> اهني كنت متوقعة 4 سانتي والحمدالله طلع 4 سانتي >> مب طمااعة واايد قنوعة 👿

ونزلت مني وانتو بكرامة السدادة وغيرت ملابسي لان خلاص راح يودوني غرفة الولادة ..

واخذوني ودخلت غرفة العذاااااااااااااب غرفة الاعدااام 😆 idea:

وحطوو عليي المغذي والاجهزة والاكسجين والعفسة ..

وآنه اتالم ومب قادرة من الالم ..والدكتورة اللي في الولادة اتقولي بفحصج حبيبتي ..

اقولها الدكتورة صفاء في الغرفة فحصتني وقالت 4 سانتي >> تبي تهرب من الفحص 💡

قالت ليي ماعليه حبوبة آنه بعد بفحصج علشان تولدين بسرعة >> مثل اليهال يلعبون علينا

وفحصتني قاالت 3 سانتي .. >> اهني قعدت ابكي اقولها مايصير الدكتورة قالت 4 موو 3 .. 😉

واهي تهديي فيني واتقوليي مو مشكلة 4 سانتي بتفرق الحين سانتي وااحد ..

اقولها عندي تفرق 😐

وكل شووي الدكتورة تزيد الطلق الصناعي عن طريق المغذي ..

وآنه حسيت روحي بتطلع منيي ..

وقعدت اقرأ اللي حافظته من آيات ومن أدعية .. وانا ادموعي على خدي ..

بعدهاا وآنه ادعيي وآنه عافسة المكان من الصريخ ..

والممرضات اقولون ليي اتنفسي اخذي نفس

وآنه اخذ نفس واصيح وحالتي حالة ..

واسمع الممرضات وحدة اتقول انفتحت 3 سانتي ووحدة اتقول لاا باقي لها 3 سانتي الحين اهي 7 سانتي ..

وآنه اهني النفسية تدمرت ,, قلت اذا 3 سانتي يعني ماراح اولد اله باجر ..

بس اذا باقي 3 سانتي يالله هاانت ماباقي شي واولد ..

والحمدالله كنت منفتحه 7 سانتي

بعدها على الساعه 03:03 العصر ,, شرفت احلى كتكوتة اللي فعلاً من سمعت صوتها نسيت كل المعانااه

وحطوها على صدري وعلى طوول نزلت ادموعي بشكل لا ارادي ومن غير توقف حسيت روحي طفلة ..

وكل ماآبي اسكت تنزل ادموعي والممرضة مسكينة تعطيني كلينكس واهي تمسح على شعري

وآنه مواصلة وبعدها خيطوني وطلعوني من غرفة الولادة ..

وخلصت قصة ولادتي بأحلى كتكوتة ربي يحفظها لنا ويخليها ويرزقنا برها ياارب ..