عالم البنات النسائي كل ما يخص المرأة العربية من ازياء وجمال والحياة الزوجية والمطبخ
كيفكم فراشات؟؟
انا جاية افضفض و اشوف الحل للتخلف اللي احنا عايشينه
لمتى فكرة انك تزوجي اخوك لدكتورة او ممرضة عيب و ما يصير و ايش نبغى فيها و دي تختلط بالرجال
بجد تخللللللللللف الله يتوب علينا منه بس
اليوم جارة ام زوجي جاتهم
و بنتكلم و شوية دخلنا في حكاية التخصصات و الجامعة طبعا الكلام بينها و بين ام زوجي
و بما اني تعبانة مع الحمل فمني فايقة اخد و اعطي مع احد
بس الموقف اللي صار خلاني كدا ❗
و ربي شوية و هقوم اقلب الدنيا فوق راس الحرمة >> يا وااد يا حامي انت لووول
اللي صار ام زوجي قامت تتفاخر فيا 
قدام جارتها
فبتقولها مرات ولدي ان شاء الله كلها كم شهر و تصير دكتورة ما شاء الله و نفرح فيها
قامت الحرمة طالعت فيا قالتلي و ايش تخصصك
قلتلها طب بشري ما شاء الله لساتني عام
قالت بنت اخويا ممرضة و لا احد يبغاها
انا قلبي انفقع من الكلمة
و قلت ليش ان شاء الله؟؟
قالت عشانها تختلط بالرجال
انا هنا موتيني من الكلمة المتخلفة دي
قلتلها والله مو كل الناس دول اللي ما يفكرو بممرضة او دكتورة انقرضو
قالت لا احنا القبايل ما نفكر ناخد وحدة منهم
احنا اللي عندنا يبغو مدرسات
قلتلها على كدا دا اللي يبغى مدرسة لا اشوفه جايب مراته و لا امه و لا بنته لا عندي و لا عند غيري من الحريم
خلي الرجال يكشفوا عليهم و لا الغيرة كلها عنده و البقية منزوعة منهم
و بعدين راتب الممرضة و الدكتورة اعلى من راتب المدرسة فيحمد ربه لو قبلت فيه
دا بالتمام الموقف اللي صار
انا ما كان قصدي انفعل بس بصراحة قمممة التخلف
لمن الرجال ما يفكر ياخد ممرضة او دكتورة انا ما بقول لازم الكل ينجبر علينا
بس معليه انت قبل لا تاخد وحدة دي وظيفتها انت اخدت وحدة واثق من اخلاقها
عشان كدا امنتها على بيتك و خليتها ام لاولادك
فليش نظرة الاستحقار و الخزي للدكتورة و الممرضة
بس عشانها بتختلط بالرجال؟؟؟
و مين قال ان الاختلاط حرام
زوجات الرسول و اللي مافي احسن منهم ع وجه الكره الارضية و لا راح يكون
كانوا يروحو مع الرسول و يداووا جراح المجاهدين
الحرام في حكاية الخلوة الغير شرعية
الحرام اني اروح متبرجة و الفت النظر عليا
بس مو حرام اني اكون دكتورة او ممرضة و اشتغل بادبي و احترامي
و مو كل قبلي متخلف انا و الحمدلله متزوجة غامدي يعني الكل عارف اصل و فصل الغمد
مع اني ابدا مو غامدية لكن ما شاء الله قبل فيا و لا فكر بالهبل دا
و عارفة انه كثييير زيه
بس كمان يقهرني لمن الاقي ناس تفكيرهم متخلف زي كدا
انا بس حبيت افضفض و اطلع اللي بقلبي قبل لا احرق دمي اكثر مما هو محروق
و مشكوووورين عالردود مقدما
