عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ..
كيفكم يابنات … حبيت نخدم بعض بخصوص البيع والشراء
طبعا الله من وحده ذاقت السرق والكذب من وحده ونسال الله يعوض عليها
وغير الي يحصل لها موقف مع الشاريه او البايعه ..
يابنات اوصيكم ونفسي بمراقبة الله عز وجل في البيع وياليت كل وحده تدخل وتبيع تقدر انه مستعمل وتحط سعر يرضي الطرفين عشان تمشي بضاعتها .. وتكون صادقه في الوصف.. مو تجي وحده تمدح البضاعه او تحط صوره من موقع واذا شفتيها على الطبيعه الا تلاقيها شي ثاني (هذا موقفي مو وحده الله يهديها لنفسها) ياليت الصدق في البيع والا الي تجي ترسل لك عشرين رساله كلها استفسار وهي ماوراها شراء طيب ليه كل ذالمشقه ليه تتعبي نفسك وتعبي غيرك ماعجبك السعر او شاكه في البضاعه اطلبي صور اكثر او تلاقي طلبك عند الغير بس لاتجيبي اعذار مالها اساس .. ماعندك نية شراء مالها داعي الرسايل
كل شي والي تشتري واذا استلمت البضاعه بعد كم يوم تتراجع عنها هذي حاله خاصه السؤال هل لها حق او لا … كل وحده اغراضها غاليه عندها … وغير كذا يابنات الي يقولون الصور على الخاص وش المشكله اذا عرضتيه اذا ماعجب وحده راح يعجب الف وحده وسالفه انو راح يتكرر الموديل ماعاد فيه فستان يقال ان الموديل لي انا وبس كل المشاغل والمحلات صارت تقلد موديلك وماظن انها كلافه انك تعرضينه للجميع نفس التحميل نفس الصفحه بس الفرق ان اكثر من عين راح تشوفه يكفيك تجي دعوه (موفقه في بيعه) هذي كافيه ..
واخر حاجه بطرحها لكم اذا توافقوني او لا ليه مانفتح صفحه للمحتاجين مثلا عروس محتاجه او وحده عندها اطفال كثير وماعندها استطاعة الشراء او او ياانك تجعليها صدقه لوجه الله او تجعلي جزء من سعره خيري وهذا راجع لك انتي بس تاكدو كل شي باجره..
قوله تعالى:
{ لَنَ تَنَالُواْ البِرَّ حَتَّى تُنفِقُواْ مِمَّا تُحِبُّونَ وَمَا تُنفِقُواْ مِن شَىءٍ فَإِنَّ اللَّهَ بِهِ عَلِيمُُُ (92)}آل عمران
حَدَّثَنَا يَحْيَى بْنُ أَيُّوبَ وَقُتَيْبَةُ وَابْنُ حُجْرٍ قَالُوا حَدَّثَنَا إِسْمَاعِيلُ – وَهُوَ ابْنُ
جَعْفَرٍ – عَنِ الْعَلاَءِ عَنْ أَبِيهِ عَنْ أَبِى هُرَيْرَةَ عَنْ رَسُولِ اللَّهِ صلى الله عليه وسلم قَالَ
« مَا نَقَصَتْ صَدَقَةٌ مِنْ مَالٍ وَمَا زَادَ اللَّهُ عَبْداً بِعَفْوٍ إِلاَّ عِزًّا وَمَا تَوَاضَعَ أَحَدٌ لِلّهِ إِلاَّ رَفَعَهُ اللَّهُ »
هل تعرفين فضل الصدقه ؟؟؟
تزيدالعمر وتمنع ميتة السوء
تدفع البلاء
الصدقه سبب في استجابه الدعوة وكشف الكروب
الصدقة دواء , قال صلى الله عليه وسلم” داووا مرضاكم بالصدقة”
الصدقة تطفىء غضب الرب
قال صلى الله عليه وسلم ” إن الصدقة لتطفئ غضب الرب”
تضاعف الحسنات
الصدقه تذهب الحزن
سبب لمغفرة الذنوب وتكفير السيئات
الصدقة أمان من خوف يوم القيامه
انالله تكفل بتربية الصدقات للعبد
ان الله يخلف الصدقة
تزيد المال ولا تنقصه
تسد سبعين بابا من ابواب السوء
الصدقة سبب لدعاء الملائكه
المتصدق والعامل على الصدقة لهما أجر المجاهد
الصدقة سبب في مجاورة الرسول صلى الله عليه وسلم
سبب من اسباب دخول الجنة
الصدقة الجاريه تبقى للعبد بعد الموت
قال الرسول صلى الله عليه وسلم – ( إذا مات ابن آدم انقطع عمله إلا من ثلاث : صدقة جارية أو علم ينتفع به أو ولد صالح يدعو له )
والي تبيي تدفع البلا عن نفسها او عيالها….اي شي عندها مستغنيه عنه تكتبه يمكن تجيها وحده محتاجه او وحده تعرف محتاجين او ترسل لي وانا مستعده اوصلها لناس محتاجه في( الرياض ) وهي تطلع بنفسها عليهم .. الصدقه يابنات فضلها عظييييييم جدا وطبعا كلامي مو اني اقول تصدقي بمزادك لاوالله كل وحده تتمنى تبيع اغراضها وانا اولكم و احيانا تكون جديده اغراضها واحيانا متعوب عليها .. انا اقصد في الصدقه في حاجه انتي مستغنيه عنها فستان او بلوزه او اي حاجه ..
اتمنى الي يعجبها كلامي تأيدني او ترفع الموضوع والي مايعجبها لاتجرح بالكلام .. والله والله يشهد على كلامي ماابي الا الاجر لي ولكم وانا مو محتاجه الادعوه من القلب .. وحللوني على اي كلمه صدرت مني .. اختكم ام عبدالعزيز
