عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
بدخل في الموضوع بسرعة
انا من يوم تزوجت وفي ليلة زواجي بالضبط كانت اخت زوجي حركاتها مستفزززة مرررة
المهم انا طنشت وقلت يمكن يوم زواجي كان خربطة وهي متوترة شوي وحطيتلها اعذار كثيرة ونسيت اللي عملته يوم زواجي
لكن يوم دخلت بيت زوجي وبدأت حماتي تعزمني على بيتهم عشان قرايبها يشوفوني ويتعرفوا عليا (( لأني من ديرة ثانية ومو كل الناس شافتني يوم زواجي)) المهم من يوم هذه العزايم وانا الاحظ اخت زوجي تستحقرني قدام الحريم ، يعني مثلا اكلمها ماترد عليا ولما اناديها تنطش ولما اتكلم تهمشني مررررة حتى كل الحريم لاحظوا تصرفاتها ، وانا مررررة زعلت على نفسي وانقهرت منها مررررة وسرت اعاملها رسمي ، المهم المشكلة مو بس هنا ، المشكلة انها تعامل سلفتي بكل حب واحترام وتكلمها وتضحك معاها يعني حسستني فعلا انه حركاتها متعمدة
مع ذلك انا طنشتها ولا اهتميت
بس برضو هذا كله مو المشكلة اللي ابغى اطرحها ، بس حبيت اكتبلكم هذه المقدمة لأخت زوجي عشان تعرفوا الوضع بالكامل
مشكلتي بالتحديد هي سلفتي :
طبعا هي ما حضرت زواجي برغم انه زوجها اللي هو اخو زوجي حضر ، ويوم رحت بيت حماتي لقيتها لأول مرة وسلمت عليها وهي والله حتى كلمه مبروك ماقلتها ليا لأني كنت لسه عروسة ، وطبعا ما جابت هدية ولا شي ((اكيد ماحتجيب هدية طالما حتى زواجي ماحضرته وحتى كلمة مبروك ما قالتها)) المهم انا لما سلمت عليها وجلست معها لأول مرة كانت في اخت زوجي الثانية ((هذه حبيبه مو مثل اختها اللي تطنشني)) ، وكانت سلفتي بس تكلم اخت زوجي ومهمشاااااني على الاخير ، حتى لما احاول ادخل في الكلام تعطيني كلمة ورد غطاها وترجع تطالع في اخت زوجي وتكمل الهرجة ، ولاحظت فيها اكثر من مرة انها تتعمد تهمشني ولا تطالع فيا ، حتى اول ما تدخل تسلم تطالع في اخت زوجي تبتسم وانا تجي تسلم عليا عيونها على اخت زوجي ، يعني حتى نظر فيا ما تناظر
انا من بعدها سرت مرة مقهورة على نفسي لأنه فعلا الحركات واضح متعمدة ، عاد فمابلكم لما تجتمع هي واخت زوجي اللي تتعمد تنزل قيمتي قدام الحريم ؟؟؟؟
وفعلا صار يوم اجتمعنا كلنا وفي حريم ، طبعا اخت زوجي اللي تكرهني مهمشااااني وجالسة تكلم وتسولف مع سلفتي ومع الحريم ومركزة على سلفتي ، وانا لما اتكلم ما تطالع وتشيل عيونها على مكان بعيد ، وسلفتي طبعا معطية طنااااش ليا كأني ماني موجودة
وانا خلاص من بعدها قلت مابروح لأي عزيمة هم يكونوا موجودين فيها لأنه صراحة ما صرت اقدر اتحمل هذا الاستفزاز خصوصا الحريم ملاحظين تصرفاتهم ، لكن المشكلة في حماتي صراحة طيبة وتعاملني معاملة طيبة وانا استحي يوم تعزمني تقولي تعالي وانا ما اجي ، ما اقدر اقلها السبب انه بنتك ومرة ولدك هم السبب ، احس صعبة اقولها
ودحين في عزيمة حتصير قريب لسلفتي في بيت اهل زوجي بمناسبة خروجها من النفاس ، وفي حريم جايين من ضمنهم ام سلفتي واخواتها ، وبصراحة ماني عارفة كيف اسوي ، شااااايلة هم كبير لأني عارفة بيستفزوني هي واخت زوجي ، وانا بيتي مرررة قريب من بيت اهل زوجي ، بس افكر اني ما اروح للعزيمة ، وزوجي مفهمته الوضع وهو قالي اعملي اللي يريحك ما بجبرك على شي ، فأيش رايكم ؟؟؟؟ وش اسوي ؟؟؟ خاصة انه سبق ام زوجي وبناتها راحوا لسلفتي بعد نفاسها وانا ما زرتها طنشتها ،، والى الان ما شفتها بعد نفاسها ، وماني حابة اشوفها وادري هي كمان تبادلني نفس الشعور ،،، وانا ابغى ارد كرامتي بصراحة لأنه مو في كل مرة يستفزوني ويهمشوني خاصة انا مالي اهل ، وهم يمكن عشان كذا مستهزأين فيا او ما ادري وش السبب الله اعلم ، بس انا توقعت كذا ، الله يخليكم شوروا علي بشورة ممتازة .. وش اسوي
الله يفرج همها اللي ترد عليا بحل حلو !!!
ملاحظة : انا طرحت الموضوع للمتزوجات لأنهم الادرى والافهم في امور السلفات ، لكن ما يمنع لو بنت فاهمة ترد عليا ، برضو بكون ممنونة لها
الله يجزاكم الجنة لا تنطشوا .
