عالم البنات النسائي كل ما يخص المرأة العربية من ازياء وجمال والحياة الزوجية والمطبخ
هاي أهمات شخباركم وشخبار كتاكيتكم حبايبي الصراحه وأنا ألف على المنتديات حصلت موضوع عجبني مره وقلت خليني أنقله لكم وأن شاء الله يعجبكم وتستفيدون منه أخليكم مع الموضوع
السلام عليكم ورحمة الله وبركاته ..
كيف حالكم يا أمهات ويا آنسات
جيتكم اليوم بتجربتي مع ابني في .. ” القنـــــــــــاعة ”
أشياء تنقصنا بحياتنا وبيتنا وتوجد لدى غيرنا .. وأشياء توجد لدينا ولا توجد لدى غيرنا .. لكن دحومي حبيبي لا يراها ..
حياتنا :
لا يوجد لدينا تلفاز .. انا لستُ أكتب ذلك لأجد ردود تقول : ” احضري تلفاز واشرطة اسلامية وتلك الردود”
.. لا أنا هنا أضرب التلفاز كمثال من الأشياء المفقودة ..
لايوجد لدي أنا جوال ولا أبو عبدالرحمن ..
بيتنا كباقي بيوت كندا صغير على قدنا ثلاث غرف وصالة ومطبخ وحمامين ..
عبدالرحمن اذا زار أصحابه بالبيوت المجاورة لشقتي وبنفس العمارة .. يأتي منبهرا من ما رآه !!
مع أنني أعرف الشقة التي ذهب اليها وأثاثي أحلى بكثير!
لكنه شي جديد ومختلف بالنسبة لعبدالرحمن لذلك رآه جميل ..
فيقول : بيتهم أحلى من بيتنا
كنبهم أحلى من كنبنا
ألعابهم أحلى من ألعابنا
عندهم تلفزيون احنا ماعندنا
اذا ذهبنا يوم السبت النادي السعودي الذي يجمع الكثير ..
يأتي يوم الأحد .. يسأل : ماما ليه كل الرجال عندهم جوالات وبابا لاء ؟
ليه كل الحريم عندهم جوالات وانتي لاء ؟
” حرام ؟؟ عيب ؟؟ غلط ؟؟ ” << لازم هالأسئلة بكل شي مرفوض ..
ومثل هالمواقف كثير
ماذا فعلتُ أنا ؟
جلست مع عبدالرحمن .. وحكيته عن الجنة ونعيم الجنة .. وعن الحسنات والسيئات .. وعن النار وعذاب النار .. والموت والقبر ..
كل تلك الأمور هو يعرفها كمسميات فقط ويعرف امور بسيطة عنها وكنت أستصغره لذلك لم أكن أفهمه شي عنها
أما عندما لاحظتُ عليه تدقيقه بالأمور واستيعابة .. قررتُ أن أفهمه كل شي ..
وأحكيكم الي صار :
ماما << أنا يعني : عبدالرحمن تعرف انه بالآخرة في جنة ونار ؟؟
عبدالرحمن : إي أعرف وأنا أبي أروح الجنة
ماما : ان شاء الله يااااااارب نروح الجنة .. بس الجنة لازم نسوي أشياء حلوة عشان ندخلها ..
عبدالرحمن : زي إيش ؟؟
ماما : نجمع حسنات 🙂
عبدالرحمن : أبغى أجمع حسنات !!!
ماما : طيب الحسنات تجمعها بالتصرفات الحلوة .. العاقلة .. والكلام الحلو .. وكل شي حلو صغير ولا كبير .. حتكتبه الملائكة ويعطيك ربي حسنات ! << وعددت أعمال حسنة
واذا سوينا أشياء غلط .. ناخذ سيئات
عبدالرحمن بذكاء : والسيئات تدخلنا النار
ماما : صح .. عشان كذا لازم نحاول مانسوي سيئات أبدا
عبدالرحمن : انا مابغى اسوي سيئات ..
ماما : شاطر .. لا ترفع صوتك على ماما .. اسمع كلامي .. لاتخرب .. << وعددت الغلطات ..
ماما : تدري يادحومي اذا دخلت الجنة ان شاء الله كل شششششي تبغاه موجود ..؟؟
دحومي : حتى القيم بوي ؟؟؟
ماما : وأحلى من القيم بوي .. كل شي تقول ابغاه يجيك .. أبغى كذا .. يجيك .. أبغى كذا يجيك .. مافي ولا شي لاء ولاااااااا شي .. ولا في شي يخليك طفشان ولا تبعان ولا جوعان .. دايم دايم فرحان دايم تضحك
دحومي : وانتي تكونين معايا
ماما : ان شاء الله يارب اذا جمعت حسنات ان شاء الله
دحومي : جمعي يلا .. 💡
ماما : ههههه طيب ان شاء الله .. طيب دحومي وش أحسن الجنة ولا الدنيا هذي الي احنا فيها !!
دحومي بحماس : الجنة وانا أبي أروووووحها
ماما : طيب يصير مو لازم كل شي نبيه بالدنيا نجيبه لأن الدنيا هذي مو حلوة الجنة أحلى .. والدنيا هذي الي احنا فيها حتنتهي .. وترووووووح .. واحنا نروح الآخرة .. وبالجنة مافي شي ينتهي أبد .. بالجنة نطلب الي نبي ..
لكن ربي الحين يشوفنا .. يشوف ان احنا ماعندنا كل شي .. وترى هو يعطينا حسنات .. لأن موكل شي لازم نجيبه .. واحنا ماجبناه عشان نحب ربي ونبي يدخلنا الجنة .. وبالجنة ناااااااااخذ كل شي نبيه
دحومي : اي انا مابي شي من الدنيا أبي الجنننننننننننننننننة
ماما : حتى الدنيا حبيبي .. ممكن نروح نتمشى نشري ألعاب .. بس مو كل شي كل شي نبيه نجيبه ..
لأن الجنة هي الي ناخذ منها كل شي
دحومي وهو سرحان والابتسامة على وجهه : ابي اروح الجنننننننننة ابي حسناااااااااااات ..
ماما : ان شاء الله يصير لازم خلينا نجمع انا وياك ..
انتهى
بعد هذا الحوار
موقف :
اشترينا لدحومي كتاب اعمال فنية .. مسبح وسيارة وطيارة
يقصها ويلصق اطرافها وتصير اشكال .. وبعد ما أنجزها بابداع علقتها بغرفته ..
وفي داخل الصورة .. صورلأطفااال داخل السيارة والمسبح
ماما : دحومي خلينا نجيب قلم نشخمط على عيونهم هذي صورة ارواح حرام ..
دحومي بزعل : لااااااااا مابي تخرب
ماما : هااااه ماتبي حسنات ؟؟
دحومي بفرح : اذا شخطمطنا عليها يجينا حسنات ؟؟؟
ماما : ايييييييه
دحومي : وندخل الجنة ؟؟؟
ماما : ان شااااااااء الله
دحومي : يلااااااااااااا ..
موقف 2 :
دحومي : ماما انا أبي أغير بيتنااااااااااا مو حلو مو عاجبني ..
ماما : مو قلنا مو لازم نسوي كل شي نبيه والجنة فيها كل شي نبيه
دحومي وهو يضحك : ايييييييه صصصصصح هههههههههه بس انا كذا أقوووووول
هههههههههههههههههه الله يسعده ..
يارب أكون أفدتكم
بنات وهذا الموضوع الثاني أنا دمجته لكم في موضوع وأحد أوكي تابعوووووووووووو
السلام عليكم ورحمة الله وبركاته
كيفكم يالغاليات وشو أخباركم ؟؟؟
أمس كان يوم عصيب جدا علينا بالبيت لأنه كان اليوم الرابع للإجازة الكريهة !!
من يوم الجمعة دحومي ماداوم والسبت والأحد ويك إند بطبيعة الحال والاثنين كمان ” لونق ويك إند “
مادري وش عندهم مأجزين هم وأعيادهم الي ماتخلص ..
الموهييييييييم
مافي شي ماسويناه خلال هالأربع أيام
ان كان لعب .. كامبيوتر .. خروج .. جمعات .. ودخلته مدرسة عربية تعلم قرآن وعربي بس يوم السبت والأحد صباحا .. وكل مايخطر بالبال سويته مع دحوم وبرضو مشكلة الطفش والفضاوة والنكد لازالت
أمس وأنا متمددة بكسل بالصالة ودحومي ينط نط هو وأخوه جمبي وانواع الصياح والازعاج
الا .. ترا لا لاااااااااا !! تذكرت كلام أفنان ام عمر .. 
العبي بدون ماتلعبي !
وناديت دحوم .. قلتله فاجأة : تاكسي تاكسي !!
التفت مستغرب قال : مين ؟؟!!
قلتله : انتَ تاكسي .. لو سمحت اركب بسكليتك وروح جيبلي من المحل شوكولاته ومكسرات .. ومعاك كمان جيبلي المحفظة عشان أشتري منك !
” دحومي عنده محفظة مليانة أوراق مالية لعبة زي الي في المونوبلي “
جري دحوم ومن وراه عبودي الملقوف وعطاني المحفظة وركب البسكليت وراح غرفته واختارلي علبة قالي هذي الشوكولاته !
قلتله : شكرا شكرا .. يلا الحين أبغاك ترووووح للمكتب < آخر البيت تصيدلي سمك وأرنب وبطة .. واطبخهم بعدين جيبهم
دحومي : طيب بس ترا هذا بـ 500 !!! 
قلتله : معليه عندي فلوووووووووس 
وراح دحومي وأسمع أصواته من بعيد هو وعبودي : واااااااااو صدت .. ياااااااي .. واااااو ..
وبعدين جاني بالنتيجة الرهيبة : أوراق أبوه وكتبه !! 
خخخخخخخخخخخخخخ
كان خطأ اني أرسلته المكتب
المهم شوي قالي دحوم : ياماما نبغى نغير !!
قلت : شلون ؟
قال : ابغى أكون أنا الأبو وانتِ البنت !!
أنا وقتها عجبتني الفكرة
” كل هذا وانا ماتحركت من الكنبة ومتمددة ”
قال يلا انا الأبو بروح انام لاتزعجوني ..
قلتله : ابشششششششششر وصك باب غرفتك وخلي عبودي عندي 
وراح الغرفة وقلت : عبودي هششششش بابا نايم لاتزعجه
شوي الا أسمع دحوم : الله أكبر ! << يصلي الفجر
بعدين خرج وقالي : يابنتي انا بسافر السعودية !
قلت : لييييييييه ؟
قالي : عندي شغل هناك وتعبنا من الغربة !
” انا سمعت هالكلمة دموعي فلتت !! .. ” 
طبعا دحوم ماجابها من عنده .. يسمعني وأنا أسولف مع جاراتي دايم ونقول الغربة ومالغربة وملينا من الغربة
قلت بلاش أخرب اللعبة وكبت دموعي وقلت : الله معاك وسلملي على منصور وفيصل وعبدالرحمن وتركي << أهلنا هناك
قال : طيب وراح آخر السيب ويقول : وووووووووووووووواااااااااااااااخخخخخخخخخخ <<< صوت الطيارة تقلع
وبعد دقايق جاني ومعاه أغراض يقول رجعت وهذه الهدايا !
قلت : شكرا والله ماتقصر يا بابا وانت مره طيب الله يخليك لنا
قال : نبي نسوي حفلة
قلتله : نسوي حفلة طيب وش تبي ؟؟
قال : ابعزمكم بيتي << غرفتي
قلتله : يلا نلبس ونجي بس روح رتب بيتك مايصير يجونك الناس وبيتك محوس
قال : طييييييب .. وجري يرتب الغرفة
بعدها قلتله : تعال نسوي أكل للحفلة !
تحمس وجا معاي المطبخ وقتها جعنا من جد وسوينا ساندوتشات وعصيرات
وراح دحومي لغرفته وسكر الباب
وجيت انا وعبودي ودقينا الباب
وفتح وقال : الله يحييكم هلا والله 
” بالقوة كتمت الضحكة عشان ما افشله “
وجلسنا وأكلنا وعبودي كل شوي يروح للألعاب يبي يلعب ودحوم يقوله : عيب تمسك أشياء الناس من غير ما تستأذن !!
وأنا : صح عبودي استأذن أول
وخلصت الحفلة وقال يلا نفقع البالونات
طبعا مافي بالونات ولا شي وسوينا نفسنا نفقع
طاع طاع طاع طاع طاع وعبودي اتجنن معانا طاع طاع طاع طاع 
وخصلت الحفلة وانبسطنا الحمدلله
بصراحة حسيت اني استفدت كثيييييييييييييير من هالحركة :
– لعبنا بدون تعب
– انبسط دحومي وعبودي
– اكتشفت مفاهيم وأفكار عند دحومي
– وانه هو الرجال والكبير وشفت شلون يتصرف ويفكر
– استغليت من هاللعب انه رتب غرفته
– وساعدني بالمطبخ حتى بتمسيح الي اتكب
وغيرها أمور كمان
شو رايكم أنشاء الله يعجبكم الموضوع وتستفيدووو منه
