عالم البنات النسائي كل ما يخص المرأة العربية من ازياء وجمال والحياة الزوجية والمطبخ
يسعد مساكم والصباح يا اغلى فراشات
اليوم حابه انزل لكم الذ كيكة سينابون
وممكن تسووت رولات السينبون بنفس العجينه والمقدار بس لا تشدوا باللف عليها
طبعا انا مستحييييل اسوي رولات السينبون لانها تطلع قممممه في الاعاقه والشكل يطلع يرووع
وذالك لقلة الابداع اللي عندي في التقطيع خخخخخ
المهم مالك بالطويله
هذي صورة كيكة السينابون
طبعا اضغطوا على الصوره تطلع مكبره
المقادير للعجينه
نصف كوب حليب طويل الاجل تسخنينه يصير دافي
نصف كوب مويه دافيه
وملعقة طعام خميره فوريه
وبيضه
وملعقه صغنونه ملح
وثلث اصبع زبده طريه بدرجو حرارة الغرفه
ثلثين الكوب سكر
وكوبين طحين للخطوه الاولى
وكوبين طحين للخطوه الثانيه
الطريقه للعجينه مهمه ***
****اول شيئ نذوب الخميره الفوريه في المويه ونخلطها مع الحليب والزبده حتى تتجانس
***نضيف البيضه ونخلطها ثم نضيف السكر ونخلطها
***ومن ثم نضيف كوبين طحين ونعجن
***وتكون لينه وتلصق باليد اتركيها تتخمر عشر دقاائق
***مهمه كل الخطوات ****
***وبعد العشر دقائق ترجعي تعجنيها وتضيفين كوبين الطحين الاخيره
***وتعجنيها مضبوط وبدون اية ضافات ادهنيها بملعقة زبده و غطيها واتركيها تتخمر ساعه ونص
***وبعد الساعه ونصف اعجنيها وادهنيها بقليل زبده واتركيها تتخمر مدة 45دقيقه
والسر في طراوتها وانها تكون شبيهه جدا للسينابون اللي من برا من محلات السينبون التخمير وصوص التوفي اللي راح نحضره الان
التوفي بالبندق المحمص المجروش وممكن تستخدمي جوز البقان تقريبا كوب
التوفي لما يبقى ربع ساعه عن وقت انتهاء تخميرا لعجينه للفتره الثانيه
تاخذي كوب ونص من السكر الاسمر وافضل نوع اللي بالصوره عن تجربه والله 
ونصف اصبع زبده
وملعقتين كبيره من العسل
تضعيها بقدر على النار وخفضي النار ولا تحركيها الا اذا بدات تذوب اغلبها حركيها بهدوء وضيفي البندق او جوز البقان
وحركي بهدوء حتى تصير التوفي معاك مضبوطه وجاهزه
وصبيها في صينيه الباوند كيك المستطيله الافضل تكون عميقه
اذا ماعندك استخدمي الصينيه اللي فيها فتحه من الوسط
ولو اللي عندك مو عميقه قللي من الصوص لانه بيطفح من الصينيه
وبعد هالخطوه المهمه
نفرد كااامل عجينتنا الجاهزه على الرخامه بدون استخدام اي شيئ لا من طحين ولا زبده
تفرد حتى تصير متوسطه السماكه تميل للنحف وتدهني بالزبده و
ترشي العجينه بالسكر الاسمر والقرفه افضل قرفه حقت العلالي نكهتها قووويه ولذيذه
وتبدي تقطعيها على شكل مستطيلات والمستطيلات على شكل مستطيلا وتصفيهم على بعض كانها ورق
و ترصيها بالصينيه اللي عندك
على صوص التوفي وتغطيها وتتركيها تتخمر نصف ساعه
وبعد كذا تدخل لفرن حرارته 160 مدة ساعه كامله
ثم تخرجيها وتصبي عليها نصف كوب كريمة خفق وتتركيها تتشربها وتقلبيها وتتركي الصينيه عليها عشان تنزل الصوص
وبعد كذا تتركيها تبرد وتقدم دافئه
طبعا رح تقرونها طويله وتاخذ وقت لكن تستاهل التجربه
انا ما فكرت لما قريت طريقتها في منتدى ثاني اني اجربها لكن لما جربتها ما وقف ابدد عن تكرار التجربه
اسال الله العظيم ان يوفق البنت اللي شرحت طريقتها وافادتنا
وان شاء الله انها تعجبكم مثل ما اعجبتني
وباالعافيه
ما تهمني الردود
لكن يهمني دعائكم لي ولاخي بالرحمه ولوالدينا وللمسلمين اجمعين
