لحظات غريبة بين اثنين …خلقت الحب في قلبين&&&&كامــــــــــــــــــــــله

الحلقة الأولىـــ يلا يا بنتي نروح بيت خالج ..
دانة ـ يمه ما أبي ..خالد كله يطقني ..
أم نايف ــ يلا يا بنتي ..هذا ولد خالج .. يمون عليج ..
دانة ـــ يمه يعورني ..
ام نايف ــ يلا يلعب وياج يالخبول .. يلا البسي نفنوفج وتعالي لغرفتي احط لج جحال وديرم ..
دانة ــ يمه ..الناس مايحطون ديرم يحطون حمره بس ,,
ام نايف ــ تعالي يالخبله تعالي ..

بعد 10 سنوات ….
___________
تنهدت وماقدرت تمسح دموعها ..
نايف ــ امسحيها في ويههي يالدانه ..منيره ماتقصد ..
(منيرة زوجه نايف وام بناته بدر البدور وقمر الزمان (
الدانه ــ خلاص أخوي ..أنا بروح بيت أخوي ناصر ..
نايف ــ ناسيه انج ثانويه.. وأنج تداومين مع بناتي في نفس المدرسه؟؟ وين رايحه لبيت ناصر , بيته بعيد ..
الدانه ــ هانت ..كلها شهر …وأخلص الامتحانات ..وبروح بيت ناصر..
نايف ــ لا..بناتي تربوا معاج ..وأنتوا بتخلصون مع بعض ..الثانوية .. وبتظلين معاهم لين يجي نصيبج ..
الدانه ــ ما أقدر نايف … ما أقدر …تعبت ..منور من سكنت هنا من سنتين وهي نازله تجريح فيني …
نايف ــ البيت بيتي ..
الدانه ــ بس هي صاحبة البيت ..وهي حامل الحين وأكيد تبي الغرفه للبيبي اليديد ..
نايف ــ لا ,,تدبرنا هالمسألة .. بدر وقمر بيصيرون في غرفة وحده ..
الدانه ــ لا …لا ..حرام عليك ..هم صج توم ..بس مايشبهون بعض..انطر شهر ..بس شهر خلها تتحملني شهر واحد ..
)من ماتت ام نايف .. والدانة متشحططة بين بيوت اخوانها .. بعد ماوزعوا الورث ..(
****
ــ كل عام وانت بخير ..
خالد ــ وانتي بخير يا حياتي ..تدرين انتي الوحيده اللي جبرت بخاطري ودقت تهنيني بيوم ميلادي ..
ــ وأنا أقوى أنساك ..وين بنتقابل الليلة؟
خالد ــ وين ماتبين …بس ها يبي معاج الواجبات …لان اليوم مارحت الكلية مثل منتي خابره ..
ــ من عيوني ..
خالد ــ تسلم عيونج ..يلا باي اشوفج الليلة في مكانا المعتاد؟
ــ وحنا عندنا مكان غيره؟
*****************
الدانة ــ انتي للحينج ماخلصتي من سالفة الاسم؟
بدر البدور ـ أكيد ما ارتاح ..قمر مرتاحه بسمها لان لو نادوها بالاسم الاول بس بيكون عادي ..بس انا..اللي مايناديني بسمي كامل يناديني ببدر بس …مليت يا عمتي ..
الدانة ــ اسمج حلو ..
بدر البدور ـــ مدري شطرى على ابوي علشان يسميني هالاسم التعبان ..
الدانه ــ والله انج بطرانه …احمدي ربج ..أنا رايحه لغرفة قمور ..
بدر ــ كالعادة ماتعجبج سوالفي فترورحين لقمر ..والله اني ما احب انطق اسمها عن لاتحسب اني امدحها ..
الدانة ــ ردينا لموال قبل؟؟
بدر ــ اييه ..وانتي بعد لاتنادينها قمر ناديها قهر ..
الدانة ــ جب يا بدر ..
قمر ــ هلا عمتي تعالي ..
دانة ــ اتصلت فيني عبير ..تقول خلينا نمرها نسوي كيك معاها لحفلة اخوها اللي بيرد من السفر بعد يومين ..
قمر ــ خالد؟؟
دانة ــ ياني أكرهه ..أتذكر أيام قبل كله كان يطقني صج حمااااااار ..
****************
شيماء ــ راح أشتاق لك ..
خالد ـــ أنا بسافر بكره الصبح ..مايمديني اوصل بسرعه للبيت .أبي أفاجأهم ..ولا ياحياتي كان بقيت معاج ..
شيماء ــ اقول لك رح اشتاق لك تقول لي قصة حياتك؟
خالد ــ لا تتبجحين ..تذكريني ببنت عمتي ..أكرهها …والله اكرهها ..وما أطيق أشوف ويهها ..
شيماء ــ صحيح انك قليل ذوق ..انا وين وانت وين ..قول لي راح أشتاق لج بعد ..شتخسر ..
خالد ــ شيماء ..من تعرفت عليج ..قلت لج ..علاقتنا بتنتهي في اليوم اللي بسافر فيه لهلي..وأنا خلصت الجامعه وتخرجت من شهر ونص..بس نطرت اضبط اموري.. اليوم آخر يوم بيني وبينج..تقولين لي راح اشتاق لك؟؟
شيماء ــ فكرت ..يمكن تكون وزنت الامور وانك تحبني ..
خالد ــ اليوم عيد ميلادي وين هديتي؟
شيماء ــ مثل عادتك ..كالعادة …تغير الموضوع ..أنا بروح وانت هاذي هديتك ..باي.

انتهيت من البداية والتعريف..
خالد تخرج من كلية الطب.. وتم لين آخر لحظة يساعد شيماء في الواجبات.. وأخيرا بيرجع لبلاده..
ومن هنا ببدأ اللحظات بأسلوب مختلف 100%
___________________________________

ــ مع السلامة ..
شيماء ــ مع السلامة …
طلع خالد سلم الطيارة وهو محتار ..طبعا بعد ساعة وشي بيرجع لبيت أهله اللي ماشافهم من أربع سنوات..بس شلون استقبالهم بيكون له؟؟ بيفرحون بشهادته وانه دكتور وكل هذا بس في قلبه حسره بسبب الموقف اللي صار من اربع سنوات له ..بينسون الموقف ولا بيحاسبونه؟
في الطياره حاول انه يقطع الوقت بالقراءة ..لكنه مل.. طل من الدريشه وغابت أفكاره..تذكر الموقف السخيف اياه.. مايدري وين كان مخه لما خذ شيماء بيت أهله في أول اجازة..مايقدر ينسى النظرة اللي ارتسمت على وجوه اهله كأنها خيبة امل..شيماء لقيطة..عاشت طول عمرها في ملجأ..ولما خلصت الثانوية التحقت مثله بجامعة الاردن يدرسون الطب البشري ,,تولع في شيماء وايد ..لدرجة انه خذها لبيت اهله..طبعا بيت اهله ناس محافظين شيكون شعورهم لمايدخل عليهم ابنهم مع رفيجته؟؟؟

****

ــ تاكسي ,,
(الدوحة تغيرت وايد عن قبل ..اربع سنوات غربة ..بيتفاجأوون فيني لاني قلت لهم اني بوصل بكره..كلها نص ساعة ..وينتهي هالقلق اللي أمر فيه (

عبير ــــ في ايش سرحانة؟
دانة ــ ولا شي ..
عبير ــ شقالت لج ام قمر اليوم علشان تختبصين جي ؟
دانة ــ ولا شي ..
(قمر الهبلة …أكيد قالت لعبير شي) ..
عبير ــ ماقلتي لي لقيتي مدرس انجليزي؟
دانة ــ لاء ..خاص مالقيت واحد زين بس في المعاهد في حصص وأنا ما أبي حصص لان الي مافهمته شي معقد شوي..
عبير ـــ لا يا خالد أخليه يدرسج انتي وقمر وبدور ..
دانة ــ كم مرة قلت لج اني ما اطيق اخوج هذا ؟؟
عبير ــ اسكتي..امي من درت انه بيي ..حبست عمرها في الغرفة ..بعد سواد الويهه اللي سواه مو عارفين شلون بنقابله ..
دانه ــ عادي كأن ماشي صاير ..
عبير ــ عاد انتي من متى ماشفتيه؟؟
دانه ــ من عشر سنوات لما يا آخر مرة لأمي في المستشفى ..الله يرحمها ..اذكر ضربني على راسي وصرخت مخترعة فضربني مرة ثانية فتميت أصيح …أكرهه الحمار ..
عبير ــ حمار ريلج ,,اتركي اخوي في حاله ..وأخيرا بكره بيي ..قلبي عاد يدق بقوة من زمان ماشفته ..الباب يطق اروح أشوفه ..
ارجعت دانة لهمومها .. الانجليزي ..الفصل الاول يابت كل الدرجات شبه كامله ماعدا لاانجليزي بينها وبين الرسوب نص درجة..
نايف قال بيدور لها على مدرس ..بس الحين موسم الامتحانات بدى ..والثانوية محد بيكون متفرغ ..

****

ربكة غريبة في الصالة ..
ليش ماينفتح الباب؟
فتحت عبير الباب ..عرفها عبير ..بطلت حلجها شكبر حس انها بتبلعه ..
ــ مابتدخليني البيت؟؟
عبير ــ خالد؟؟ ييت ..يماااااااااااااااااااه الحقي خالد يا ..

**

قمر ــ دانة شالربكة اللي في البيت ؟؟
دانة ــ مدري ..
قمر ــ اطلعي شوفي ,,أنا براقب الفرن ..
دانة ــ مالي خلق …روحي انتي ..
دخلت العنود وبطنها العود يسبقها ..
ــ اخوي خالد يا .
رفعت حواجبها قمر دهشة ودانة حاست بوزها معصبة ..
طلعوا اثنينهم للصالة ..

****

شالجمال اللي يشوفه وقف جدام عيونه؟؟ اول مرة يشوف وحده بهالجمال..من هذي ام العيون الناعسه والشعر الحرير اللي نازل على جبهتها ..خدودها التفاح ذاته ..قمر ..قمر ..مستحيل تكون اخته بشاير ولا اخته صالحه اللي هم في السعودية ؟؟…هذي لعنود وهذي عبير …من هذي؟؟
سمع شهقة من وراه ..كانت امه ..بسرعه باس راسها وضمها لحضنه..وامه ما مسكت نفسها من الفرح الزغاريد شغالة .. ابنها الدكتور رجع أخييرا ..

***

عيونه تروح وتجي على للي لفتت نظره …
عبير ــ أخوي ..هذي بنت ابن عمتك ..قمر الزمان ..
خالد ــ قمر ؟؟ …سبحان الله اسم على مسمى ..
قمر ؟؟ وهي قمر .. قمر حست بنظراته فاستحت ..خالد كان وسيم ,,,رزه ..طويييييييييل …وعيونه كبيره وحلوة ..
عبير ــ وهذي طبعا مانسيتها دانة ..
التفت خالد لدانة في نفس اللحظة التفتت له ..
خالد شاف وحده يكرهها ما يقدر يطل في ويهها ..
دانة شافت واحد خايس متأكده أنها تكررهه وايد . نذل ..مدت بوزها ..وبنفس خايسه ــ مبروك الشهاده ,,
خالد بطريقة مستفزة ــ أكيد مبروك لي… حاصل لج تصيرين دكتورة ..
دانة ــ مستغنية عن وجع الراس ..
دخلت المطبخ معصبة ..ودخلت قمر وراها ..
دانة ــ دخلي شعرج كله طالع ..
قمر ــ هذا ياعمتي اللي كنت تسبينه طول الوقت؟؟ حرام عليج يهبل ..يينن …ماقدرت على نظرة منه …
(دانة حست انه ماتطيق تسمع عنه شي وخصوصا المديح(
دانة ــ قمور جب …راسي يعورني ..هذي آخر كيكة ونرجع البيت عندي امتحانات لازم نخلصها ..
قمر ـ ياعمتي ,,,علشاني خلينا نيلس ساعة وحده بس لين يي خالج ..
دانة ــ خالي موموجود ..مابيرجع لين المغرب ..
قمر ــ يا عمتي ..شوي بس شوي ..
دانة ــ اوكي اخلص هالكيكة ,, واروح اتمدد في غرفة عبير …صحيني بعد ساعة ..
قمر ــ من عيوني ..

***

خالد كل قلبه وفكره مع قمر ..واو ..عجيبة ..جمال رباني خارق ..والجسم ولا منيكان ..

فتحت عيونها بثقل ..حست ان الغرفة غريبة عليها … لحظات تذكرت انها في بيت خالها ..لكن ..مافي ضو نهار في الغرفة ..
الساعة كانت ثمان ونص ..
نزلت تحت وتفآجأت بالكل في جلسه سمر ..وبينهم قمر ..
غمزت لها علشان يروحون …

***

في السيارة ..
ــ انتي ماقلتي لي انج تبي ترجعين تدرسين؟؟ وأنا وصيتج تصحيني بعد ساعه ..أشوفج نسيتيني ثلاث ساعات نايمة ..
قمر ــ عمتي ,,,يا خال ابوي ولزم علي أتعشى .. وبعدين راح الصلاة لو يدري انا ماتعشينا بيزعل ..
دانة ــ الحين شقول لامج لادرت ان خالد رجع؟؟
قمر ــ آآآآآآآآآآه ..خالد ..
دانة ــ شفيج مسبلة عيونج؟؟
قمر ــ يهبل ..يهبل ..أأي عمتي ..من كلامج كرهته صج …لكن اليوم ..غييير ..
دانة ـ ماشاءالله وحكمج هذا استنتجتيه في هالثلاث ساعات اللي قعدتيهم معاه؟؟
قمر ـــ عمتي ..انسان مثقف مهذب وسيم ..
دانة ــ الحمدالله والشكر …والله مافيه ولا شي من هالقلتيه ..انسان نذل واطي ..ماتعرفين شسوى قبل ..
قمر ــ شسوى؟؟
دانة ــ ماني متكلمة على الريال ..يمكن تغير ..ويمكن الله يكتبه من نصيبج ..ماني قايله ..
قمر ــ ياعمتي فديتج .قولي ياعمتي ..
وتمت تحن لين ارضخت دانة ..

نزلت من السيارة وهي منصدمة ..
دانة ندمت انها قالت لها ..
قمر ــ عمتي علشان جي كرهتيه كل هالمدة؟؟
دانة ــ اييه ..بس انتي مالج علاقة في الموضووع ,..هالموضوع صار من زمان أكثر من عشر سنوات ..
قمر ــ بس يا عمتي ..ليش كنتوا تطاققون دايما؟؟ قبل اللي صار ؟
دانة ــ مرة صدته يغازل سحر رفيجة نوير وقلت لخالي ….
قمر ـ هو يكرهج لهالسبب ؟؟؟؟
دانة ــ لا …هو يكرهني علشان العواقب اللي يات على راسه بعد هالسبب..مسكين أكل طق وبهدلة..وفوق هذا خالي حبسه في البيت شهر كامل ومدري شسوى بعد ..
قمر ــواللي صار من عشر سنوات ..لين الحين انتي حاقده عليه مع اني ماظن انه طق وايد …..
دانة ــ هو كسر يدي من الطق..ولما شافته امي ياتها نوبة قلبية من الخرعة علي..صراحة ..هو ما غلط بحق امي..أمي قلبها تعبان ..وماتتحمل …الله يرحمها ..
قمر ــ الله يرحمها يدتي..أنا لو مكانج كان ذبحته..بس يدتي ماماتت الله ستر..وعاشت بعدها كم سنه..الله لطف فيه ولا الحين كان الكل يلومه ..
دانة ــ ومن قال لج اني مالومه؟؟ النوبة اللي تعرضت لها امي كان لها مضاعفات ..لولا هالنوبة كان امي معانا الحين ..
قمر ــ عمتي ..ماعرفت لج ساعة تلومينه وساعه لا …بعدين هذا عمرها ومكتوب لها ..ومحد يقدر يغير اللي صار ..
دانة ــ اسكتي خلاص …خلينا نتصرف عادي وبعدين نخلص كلامنا ..
قمر ــ عمتي ..أعتقد اني أحب ….خلاص ..أنا متأكده ..
دانة ــ لا تستعجلين ..لاحقة على كل شي ..

الحلقة الثانية ..
لا يستعجل ..مو حلوة ينكب على البنت مرة وحده..خله ثقيل شوي ..هي لولا عمتها …كان آخذ راحته معاها ..تمدد على السرير …ونام ..
***
الدانة في اسوأ حالاتها ..منيرة نازله فيها شتايم وسب ..ونايف مو موجود علشان يسكت منيرة ..
منيرة ــ أنا بنتي ثانوية وعندها دراسة مب شغالتج تآخذينها تخدم بيت خالج..أنا أتحملتج وايد..كافي انج مأثرة على بناتي وكله يعصوني ..
على هالمنوال استلمت منيرة الدانة ..
الدانة ــ أنا بريحج مني ..وبروح بيت أخوي ناصر ..
ركضت الدانة لغرفتها وطلعت شنطة حطت فيها كل أغراضها.
قمر ــ أرجوج عمتي لاتزعلين ..لا تتركينا ..
بدر ــ عمتي لا تروحين …لولاج كان حنا طفشنا من زمان …أرجوج عمتي انتي ونستنا في البيت ..
الدانة ــ مليت..أنتوا تبوني علشان أونسكم ..لكن أنا شاللي يحدني على كلام امكم لالي يسم البدن.. أنتوا الحين ماتبوني أظل إلا علشان وناستكم؟؟ كله انتوا تبون تبون ..ولا قد مرة قلتوا عمتي شاللي أفضل لها ..
شلت شنطتها واطلعت من البيت ..
ــ راجو خذني الوكرة ..
راجو ــ زين ماما ..
(راجو سواق ام الدانة ..وماقدرت الدانة تطرده ..فطلبت من ناصر انه يخليه (
قمر ــ عمتي الوكرة بعيده والساعة الحين تسع ..وين رايحه كل هالطريق ..والمدرسة؟
الدانة احتارت .. ــ وين أروح ؟ وين أروح ؟؟
قمر ــ روحي بيت خالج ..أقرب للمدرسة ولبييتنا ..
الدانة طالعت قمر نظرة احتقار ــ تبين تستغليني علشان تشوفينه؟؟
قمر ــ لا والله عمتي ..لاء …
الدانة ــ أنا رايحة بيت خالي ..بس بعدين بروح الوكرة ..
قمر ــ كلها شهر ونخلص المدرسة ..ومنها خالد يدرسج انكليزي ..
الدانة ــ مع السلامة ..
طبعا …كان أسوأ شعور مرت فيه الدانة …مالها ويهه تتكلم وتقول اللي صار ..
أبو خالد ــ الدانة ؟؟ شييايبج هالحزة يابنتي؟؟
الدانة ــ قوة خالي ..بتخليني واقفة عند الباب؟؟
أبو خالد ـ البيت بيتج ..تعالي ..
***
خالد كان نايم في غرفته ..ولاحاس باللي حوله ..
***
ـــ خالي أنا قلت أيي أدرس هنا لان البنات مثلي ثانوية بس هم قسم علمي وأنا أدبي …وأنا أبي عبير تساعدني في الانجليزي ..اذا ماعندك مانع ..
ابو خالد ـ أنتي بنت الغاليين أمانع بوجودج في بيتي؟؟ البيت بيتج ..خذي راحتج ..
حست براحة .. لكنها تذكرت أن خالد موجود …بتتحاشاه ..وبتظل في غرفة العنود طول الوقت ..
دخلت الغرفة ودموعها اللي كبتتها طلعت .. حست أن مالها حظ أبد …قدرها أنها تشقى … وتتشحطط …
طلعت ورقة وكتبت عليها شعورها …
لاتظلميني يالدنيا .ولاتعذبيني .أمي يابتني بالصدفة …
ولا تحكمين علي بالشقى .ترى النور في حياتي يطفى …
اتمنى ان الحظ يمشي معاي ..ونية الناس لي تصفى …
وتصطلح أموري ..والجروح اللي في قلبي تشفى ..

)أهم شي ..أحبس نفسي في هالغرفة ,,ولا أحسس حد أني موجودة ..لا أحتك بخالد ..ألتزم دراستي ,,,,وبس !(
**
ــ صباح الخير ,,
خالد ــ صباح النور ..
عبير ــ بتروح للمستشفى من اليوم؟؟
خالد ــ لازم أشوف تعييني …جهزتي لي ريوق؟؟
عبير ــ الحق عليه لاتخلصه العنود ..صايرة ديناصور ..
ابتسم خالد ..ونزل تحت ..
ــ صباح الخير ..
العنود ـ هلا خلود ..صباح النور بدكتورنا .. اقلط حياك ..
خالد ــ وين عبير؟؟
العنود ــ راحت تصحي دندون ..
خالد ــ دانة؟؟ بنت عمتي؟؟
العنود ــ اييه …
خالد ــ قطيعه ..وهذي شتسوي هنا؟؟
العنود ــ بتم شهر على قلوبكم ..الله يعينكم ..
خالد ــ الله يجيبك يا طولة البال ..شهر؟؟
العنود ــ ثانوية ..ما بتشوفها وايد .. تراني اليوم انشاءالله بعد الدوام ما بيي البيت ..برجع بيت ريلي ..
خالد ــ كيفج ..
العنود ــ بعد ماخذت غرفتي ما لي خاطر أيلس هني..
خالد ــ أنا ماطيق هالبنت دقيقة ..شلون بتحملها شهر؟
العنود ــ ما أدري .يلا باي الحين .. أسمع صوت سيارة …أكييد ريلي ..
**
ابتسمت دانة بانكسار ..
ــ صدقيني ماني يوعانة ..وأنا هني أدرس ما ييت علشان أزعجكم ..فانسي اني موجودة ..واذا يعت بخدم نفسي بنفسي..
عبير ــ دانة ..يلا اهون عليج اتعب في تجهيز الريوق وماتتريقين؟؟
دانة ــ الدريول تحت جاهز ..بروح الحين ..وخشي لي الريوق اذا رجعت بآكل ..لاتخافين ..
تهربت دانة من عبير وتحججت بلبس ملابسها ..
***
العنود ــ هذا دريول بنت عمتك ..مب ريلي ..
خالد ــ كملي ريوقج …أحسن لج ..متى موعد الولادة؟؟
العنود ــ بعد ثلاث شهور ..انشاءالله ..
نزلت دانة من فوق وحطت غشوتها على ويهها ..
العنود ــ مابتتريقين؟؟
دانة ــ صباح الخير ..أنا مستعيله ..
وأول ما تأكدت أنها طلعت من الباب ..
العنود ــ زين ذكرت تصبح علينا ..
خالد ــ بس مالاحظتي ان محد رد عليها؟؟
عبير ــ مالكم شغل في دانة ..أرجوكم إذا لي خاطر عندكم لاتحسسونها انها غريبة ..
خالد ــ وهي شتسوي هنا ؟؟
عبير ــ شكلها متخانقة مع مرت أخوها ..بس ما ترضى تقولي …متحججة انها ياية تدرس بهدوء ..
خالد ــ المهم بعد شهر لايكون أشوف ويهها هنا ..
عبير ــ خالد أنت للحينك؟؟
خالد ــ للحين ولبكرة ولبعد سنة …هالبنت حاولي قد ماتقدرين تطفشينها من هنا ..
عبير ــ هذا وأنا ناوية أطلب منك تدرسها!!
خالد ـ هالبنت لاشفت ويهها أنغث ..تبيني أجابلها ساعتين ولا ثلاث ؟ آسف ماعندي وقت ..
عبير ــ مالكم شغل فيها …ولا حد يضايقها ..اذا لي عندكم خاطر …
*****
دخت المدرسة وهي تحاول تبتسم …
ليلى ــ صباح الخير الدانة ..
دانة ــ صباح النور ..
ليلى ــ وين قمور وبدور ..
دانة ـــ بيتأخرون شوي ..جهزتي لي أوراق الانجليزي؟؟
ليلى ــ جهزتهم لج .. ..بعطيج اياهم بعدين ..
دانة ــ فديتج تسلمين لي ..
ليلى ــ ماسويت شي وانتي تستاهلين ..
دانة ــ عاد يبتي كافي؟؟
ليلى ــ يبت مارس وجلكسي و سنيكرز …
دانة ــ أنا يبت البرينجلز …الهوت والسولت والاونيون ..مثل ماطلبتوا ..
ليلى ــ وريموه يابت الميرندا والشاني.. ومثل ما اتفقنا قمور بتييب الحب والمكسرات ..سناء المصاص والعلوك ..
دانة ــ اوكي …في الفرصه نلتقي؟؟
ليلى ــ أكييد ..في الصف القديم ….أوكي؟؟
***
كان الضحك على أقفى من يشيل ..والجلسة كانت روعة …
سناء ــ عاد بنكرر هالحفلة ..لازم .
ليلى ــ بس المرة الياية مع ميوزك وراب ..
قمر ــ من قال لكم مافي ميوزك وراب ؟؟ شتبون ايمنيم؟؟ لوز يور سيلف ان ميوزك؟؟
سناء ــ عندج سوري ماما؟؟
قمر ــ لا والله . …بس ..في بيونسيه نايتي قيرل!! وفي بريتني سبيرز اي لوف روك أند رول ..
ريم ــ حطي بريتني ام نوت أقيرل ..
دانة ــ حرام عليكم شتخربطون ما أفهم شتقولون ..
ريم ــ بغني بس محد يضحك على صوتي ..
قمر ــ غني أرجوج غني ..
ريم ــ ام نوت اقيرل ..نوت ييت أوومن ..اول اي نيد از تايم ..امومنت ذارز ماين …وايل ام بتوين ..ام نوت اقيرل ..
دانة ــ بس بس ..مافهمت من الكلام اللي قلتيه الا كلمة وحده وومن ..
ريم ــ الاغنية معناها..أني مب فتاة ..وماصرت امرأة بعد ..كل اللي احتاجه هو وقت ..لحظة تكون ملكي ..ودام اني في الوسط ..ماني فتاة ولاني امرأة ..هذي البداية بس ..
دانة ــ غني شي عربي دام صوتج حلو ..
ريم ـــ اوكي ..تمشي معاج اغنية لمحمد عبده؟؟ سمي ؟؟
دانة ــ تمشي ..غني ..
قمر ــ خلوني أحط لكم بيونسيه احلى ..
ريم ــ ترى اغنية كلماتها لج عليها ..
قمر ــ اوكي ..بحط لكم شي بسيط …لوز يور سيلف ان ميوزك ..
سناء ــ عندج أسيري ها ..هي اهي؟؟
دانة ــ لاتحطون شي ما افهمه ..
سناء ــ هالغنية كلنا مانفهمها …خلي نرقص علبيها .
الدانة ــ انا رايحة البيت ..
ليلى ــ مايصيير تروحين انت وقمر ..
الدانة ـ قمر مابتروح ..بروح بروحي .,,باي ..
الدانة حست انها مزيفة ..تكابر وتضحك بدون صدق..بس هي محتاجة اشياء ووايد … طلعت من المدرسة مختبصة ..
(شفكر فيه ؟؟ أنا هبله؟ وين أروح بيت ناصر ؟ ؟؟ أنا نعسانه ..مو من النوع اللي يتأقلم في مكان غريب ..ماقدرت انام أمس ..وماراح أنام طول الايام اللي يايه …(
حست بقهر وانزلت دمعة من عيونها ..
ــ اووه اوراق الانجليزي نسيت اعطيج اياهم ..دانة؟؟ ليش تصيحين؟؟
ــ ليلى ..مشكورة ..
ليلى ــ دانه ..ليش دموعج ..ارجوج دانة انت غالية علي ..قولي لي اللي في قلبج ..
دانة ــ مافي شي ..
ليلى ــ دانة ..من ييتي الصبح وانتي مو على بعضج ..شصاير؟؟
دانة ــ رهبة من الامتحانات …وعقدتي من الانكليزي ..
ليلى ــ لا ..ما أصدق أنتي بحياتج مااهتميتي لهالاشياء ..
دانة ــ قبل غير والحين غيير …نلتقي بكره؟؟
ليلى ــ تذكري ..أنا موجودة دايم …اذا حبيتي تفضفضين لي ..
دانة ــ الله يخليج لي … ولا يحوجني لغيرج ..عن اذنج ..السايق ناطرني ..
****
عند الباب كان موجود ..ترددت الدانة …وقالت انها مابتدخل قبله ..
***
تنهد بعصبية ..
(مالي خلق اتواجهه معاها ..هالبنت أتشائم منها ..خليها تدخل أول (
بعد ربع ساعة ..
)خليني أدخل اول دامها مانزلت من السيارة (
(خليني أنزل تنقعت هنا والسبة هالمغرور …(
*
وتصادموا ..لفت دانة إلا كتف خالد ملتصق في كتفها ..كانت تتحاشى تطالع له وهو نفس الشي.. واللي صار انه هو هي تصادموا ..
محد اعتذر ومحد تنحى ..وكملوا طريجهم عناد في بعض ..
اركبت للغرفة وهو راح للمطبخ ..
***
ــ بنتلاقى في الصف القديم ..
صكت التلفون …وابتسمت ..
عبير ــ ماتغديت ولاتريقتي ,,الحين ماتبين تتعشين؟
دانة ــ قلت لج .. لا يعت بخدم نفسي بنفسي ..والان الحين طلبت من ليلى تطلب لي من مكدونالدز وحسبت حسابج في وجبه ..وبأي لحظة دريولها بيوصلها لنا ..
عبير ــ ليش الاكل من برا ؟؟ وأنا أطبخ زيين ؟؟
دانة ــ يلا بلا تغلي علي ..قلت لج اني في بيتي بآخذ راحتي …وما أبيج تزعجين نفسج بخدمتي ..
**
حاس بوزه وهو متردد ..
عبير ــ شعندك ؟؟
خالد ـ هذي قمر كم عمرها؟؟
عبير ــ كبر عمتها ..سبعطعش …
خالد ــ مخطوبة ؟؟
عبير ــ لا ..هنا السالفة شكلها جد …انت من صجك؟؟
خالد ــ عيل أمزح معاج؟؟ من صجي البنت فلقة قمر ..ما أبيها تطيير من يدي ..
عبير ــ كيفك …اللي سمعته انه محد خطبها لين الحين ..بس امها متشددة معاها وايد …هي واختها ..
خالد ــ وهذا هو المطلوب ..وين امي خليني أكلمها ..
عبير ــ في غرفتها ..بس أفضل ماتكلمها اليوم ..
خالد ــ ليش؟؟
عبير ــ استقر أول في شغلك ..داوم فيه ..وبعدين افتح موضوع الزواج ..
خالد ــ رايج وايد في محله …باي ..
عبير ــ مع السلامة ..
**
ام خالد ــ دانة ..دانة ..
دانة ــ هلا خالتي ..
ام خالد ــ اخوج نايف على التلفون ..
(هذا نايف …شقول له الحين لاطلب مني أرجع؟؟ (
دانة ــ الو ..السلام .
نايف ــ وعليكم السلام ..شلون تطلعين من البيت بدون ماتقولين؟؟
دانة ــ نايف لا تصارخ علي .. أبي مكان أدرس فيه بروحي ..
نايف ـ تروحين تضقين على الناس في بيتها ؟ وشلون تعيشين في مكان فيه ريال غريب .
دانة ــ اي ريال؟
نايف ــ خالد ..
دانة ــ أرجوك عاد هذا ريال؟؟ وينه وين الرياييل ..هذا بزر ..ياهل ..
نايف ــ استحي على ويهج في بيت الريال وتتكلمين عنه جي ؟؟
دانة ــ خلاص نايف فكني من ويع الراس هذا ..
نايف ــ تعالي ردي البيت ..
دانة ــ نايف ..أنا كنت بروح بيت ناصر ولا بيت ثامر …بس انا عندي امتحانات وهم ساكنين بعيد ماني قادرة على الطريق ..
نايف ــ ردي بيتي ..
دانة ــ نايف ..أنا انهنت في بيتك …ومرتك ماتبيني .. عندي امتحانات ومالي خلق لعزار الراس أبي أركز ..ولا تخاف علي في بيت خالي أنا هنا في غرفة العنود طول الوقت وصدقني مافي أي احتكاك بيني وبين خالد ..
نايف ــ مالج شغل في منيرة ..وان قالت لج كلمة بعد اليوم مابيصير طيب لها ..ويلا بلا ثقالة دم وارجعي البيت .
دانة ـــ نايف ,,آسفة ..ماني راجعة ..سو اللي تبي ..ماني راجعة ..مع السلامة ..
صكت التلفون في ويهه أخوها وهي تأفف ..
ــ أنا بزر!!!!
عضت دانة على شفايفها …هالصوت تعرفه ..خالد!!!!
**
خالد كان ماسك أعصابه بالغصب وهو يسمع الدانة شلون تتكلم عنه …بزر؟؟ ياهل ؟؟؟
خالد ــ ريال عمري خمس وعشرين سنه داخل على الست وعشرين تقولين عني بزر؟ متخرج من كلية الطب في جامعة الأردن بتقدير جيد ..وتقولين عني بزر!!!
الدانة اسكتت .
خالد ــ ماتتكلمين آنسة دانة ..اشوفج انخرستي؟؟
الدانة ــ اييه …بزر ..عندك اعتراض؟؟ شتبي تسوي تضربني؟؟ تطقني؟؟ ..جرب …جرب وتشوف من هي الدانة حسن ..
خالد للحظة كان بينسى نفسه ويضربها …بس مسك نفسه ..كانت ومازالت انسانة قليلة أدب لسانها طويل ..
خالد ــ الدانة حسن ..مشتطة وايد بنفسج …ماألومج ..عليج لسان ماشفت أطول منه ..
انسحبت الدانة للغرفة …وهي معصبة..بس شسوت؟؟ مو عدل تسب الريال في بيته …وبعدين معاه حق ؟؟؟واحد بمكانه ماينقال له بزر ..بس شتسوي ؟؟ تكرهه من كان صغيير ..وللحين مشاعر الكره في قلبها تجاهه ..
**
أما خالد ..فحط نية سودا لدانة …بس تذكر كلامها ..أنها ثانوية وان زوجة اخوها اهانتها .. فسكت ..وماقال شي ..والا كان شرشحها …
**
بعد اسبوع من هالموقف ..
قمر ــ قولي لي …شلونه خالد؟؟
دانة ــ ما أدري ..أنا أحبس نفسي في الغرفة طول اليوم وما أطلع إلا في الفير …أكل وأصلي وأرجع أنام …
قمر ــ أمانه ..ماسأل عني ؟؟
دانة ــ وأنا شدراني ماسمعتيني من قبل شوي؟؟ أقولج ما أشوفه..
قمر ــ عاد هالاسبوع بنغيب ..ما أدري شلون بتبدرين حالج هناك ..
دانة ــ ماعليج مني .. المهم انتي وبدرو ادرسوا ..
قمر ــ بزورج ..
دانة ــ كيفج ..ادري انج مو ميته علي ..بس تعالي الساعة ثمان يكون توه راجع من المستشفى ..
قمر ــ الساعة ثمان؟؟ شيطلعني من البيت؟؟
دانة ــ مابيكون موجود قبل هالوقت ..عبير قالت لي ..
تدخلت ليلى ـ ها دانة من هذا اللي تتكلمين عنه ؟؟ عامر؟؟
قمر ــ لا ..خالد ..ابن خال عمتي ..
ليلى ــ اييهع وهالعامر من خطبج مارد؟؟
دانة ــ لا ..مارد ..أحسن ..قت لكم أكبر مني بوايد ..وكانت أختي نوير زوجته …ما أقدر أحل مكانها ..
ليلى ــ زين ماعنده عيال ولا بنات ..
دانة ــ عنده ولد …بس تربيه امه..
ليلى ــ ربيه انتي .ابن اختج ..
دانة ــ حرام عليج ..عمري سبعطعش سنه ..وهو عمره اربع وثلاثين …كبير وايد ..وولد اختي مب صغيير …عمره خمس سنوات .
قمر ــ الله يرحمها عمتي نوير …
ليلى ــ زين وشقصة خالد ..
قمر ــ هذا ابن خال دانة ..دانة تكرهه …مع انه مافيه شي ينكره ..
دانة ــ قصدج مافييه شي ينحب ..
ليلى ـ شكل قمور هي اللي ذايبة ..
دانة ــ عليج نور ..يلا الحين بروح مع السلامة وأشوفكم أول أيام الامتحانات ..
ليلى ــ قمور منتي رايحة قبل لاتقولين لي كل شي ..
قمر ــ وهل أجرؤ؟؟
ليلى ــ أحلى عربي !!
**
فكر خالد ..وقرر انه يفاتح أمه بموضوع الزواج ..
طق الباب ..
ام خالد ــ مفتوح ..
دخل خالد ..
ــ عالقوة يمه ..
ام خالد ــ الله يقويك ..ادخل …
****
دخلت دانة البيت واستغربت ان خالد موجود ..طلعت لغرفة خالتها تسلم عليها قبل لاتدخل الغرفة …
لكنها اسمعت الكلام ..
ام خالد ــ انت شتخرف ..وبنت عمتك؟؟
خالد ــ بنت عمتي؟؟ أنا أقولج أبي بنت ابن عمتي ..شدخل هذي في الموضوع!!
ام خالد ــ يا وليدي بنت عمتك موجودة تآخذ وحده عيال عمها رايدينها؟؟
خالد ــ أنا سألت عبير قالت محد خطبها !
ام خالد ــ يمه ابن عمتك حاط عليك الامل انك تآخذها! رفض وايد بس علشانك … والبنت اللي تبيها عيال عمها يبونها ..هي وختها ..عيال ناصر يبونها ..
خالد ــ بس يمه ..أنا أبيها ..البنت عجبتني ..
ام خالد ــ الدانة لك ..وهالشي انتهينا منه من زمان ..
خالد ــ مب بكيفكم ..الدانة ما أبيها ..ولا أطيق أشوف ويهها .. تبيني اتزوجها ؟؟؟
ام خالد ــ أحلى من بنت اخوها …شتبي بعد؟؟ وأخلاقها احسن ..
خالد ــ ما أبيها قليلة أدب ولسانها طويل ..
ام خالد ــ ياكبرها عند الله …دوينه؟؟ والله في حياتها ماغلطت على حد ..بنت محترمة وأنا اللي ربيتها!!
خالد ــ يمه أنا خابزها وعاجنها هالبنت ما أبيها ..بروح الحين المستشفى ..دبريني وفكيني منها ..
دانة في هاللحظة ارتبكت وركضت للغرفة وصكت الباب على نفسها …ما انتبهت ان شيلتها طاحت جدام باب غرفة ام خالد ..
طلع خالد وتعثر فيها …رفعها واستغرب ..حطها على جنب وكمل طريقه …
****
الدانة ماقدرت تنام ولا تدرس ..ولا تشتهي تآكل ..لفت نفسها في اللحاف ولا قامت ..عبير طول اليوم كانت في السوق. وام خالد ..مرت عليها بس تظاهرت انها نايمة .
………..
الساعة ثلاث ونص الفير ..طلعت دانة من الغرفة ..وشافت شيلتها …خذتها ونزلت المطبخ ..تشرب قلاس حليب ..
وهي تراقب الحليب لايغلي ..سمعت صوت وراها ..كان خالد ..
البست شيلتها بسرعة ..
كان شايل بيده أغراضه .وغترته …وعلى ملابسه بقع دم .اخترعت دانة ..
خالد لما شاف ويهها ..ابتسم وقال ..
ـــ آثار الشغل ..توني طلعت من المستشفى .. ..كان في حادث ..
دانة ــ أحط لك كاسة حليب؟
خالد ــ ياليت …
انتبه خالد للشيله اللي كانت لابستها ..كان فيها خطوط زرقا ..فاستنتج انها هي نفسها اللي كانت جدام غرفة أمه ..
حاول انه يغطي الدم اللي على ثيابه علشان ما تلوع جبد الدانة ..
الدانة ـ خالد ..
خالد ــ لبيه ..
الدانة ــ اوعدني وعد ..
خالد ــ وعد؟؟
الدانه ــ اييه …
خالد ــ اذا اقدر عليه ..
الدانة ــ خالد اوعدني انك ماتتزوجني …أنا ما أبيك ..ولاقادرة أتخيلك زوج لي!!!!!!!!
(بس ؟؟ ماطلبتي شي …من عيوني ..لاني أبادلج نفس الشعور !!! (

الحلقة الثالثة ..
(بس ؟؟ ماطلبتي شي …من عيوني ..لاني أبادلج نفس الشعور !!! (
كانت أمنية دانة أن خالد ينطق بهالجملة ..وأمنية خالد بعد …بس للأسف ..الأمنية ماتحققت لأي منهم ..
خالد…… كلام دانة كان وقح معاه …شلون تتكلم بهالطريقة عنه؟؟ ما أبيك؟؟ مو قادرة أتخيلك زوج!!! ششايفته علشان تتكلم معاه بهالطريقة ؟؟ سواقهم ولا الصبي ؟؟
أما دانة فغمضت عيونها ناطرة الوعد ..
خالد ما علق ..خذا كوب الحليب اللي حطته قدامه وطلع من المطبخ..سمعت دانه خطواته ..وانصدمت ..توقعته يقول لها اي شي ..يوعدها ..وهي كلمته بطريقة استفزازية علشان يرد بعصبية انه مايبيها..ليكون زعل؟؟ يمكن أن يكون خالد رجل حساس؟؟ خليني أخذ منه الوعد ..هذا هو المهم ..
خذت كوب الحليب مالها …ولحقته ..
ــ خالد ..خالد ..
كان على الدري ..وقف ..صعدت دانة علشان ماتصرخ ..
دانة ــ خالد ..لا تآخذ كلامي على انه اهانة ..أنا كان قصدي انك مثل أخوي ..وما أشيل بقلبي أي مشاعر تجاهك تنجح هالزواج ..
خالد ــ وانتي ليش واثقة اني بتزوجج؟؟
دانة ــ أنا أعرف ..وبس ..وأنت مو مثلي تنغصب على هالزواج .
خالد ــ نعم؟؟ .تعرفين وبس ؟؟ دانة أنا ما أقدر أوعدج بشي..بس أنا واثق من شي واحد..أني أكره فكرة أنج تكونين زوجتي ..
انصدمت دانة ..الاشمئزاز اللي على ويهه …والتحقير اللي مغلف كلماته وصل لها ..حست باهانة ..راحت غرفتها بهدوء.. رجعت للسرير ..وتمت لين الصبح والارق رفيجها …
أما بالنسبة لخالد …حط راسه ونام …ولا فكر في الموضوع أبد ..
*******************
ابتدا مارثون الامتحانات..ودانة مرتبكة وايد ..عبير قد ماتقدر تساعدها..كان محد يشوف دانة في البيت..كانت كله حابسه عمرها في الغرفة تدرس .
بالنسبة لخالد ..كان مركز بشغله.. (محد كان يحبه في القسم اللي يشتغل فيه..لانه كان وايد جاف معاهم ولا يعرف شي اسمه دبلوماسيه ولاشي اسمه مجاملات..كان انسان صريح جدا لدرجة السخرية..عنده كل شي جد ..مافي شي اسمه هزل أو وقت راحة ..فالكل يتحاشاه .(
الممرضة ــ دكتور حالة تسمم …
خالد ــ مرريها بدكتور بهاء …خلي يسوي اللازم ..أنا عندي هنا حالة حرجة ..
الممرضة تمت واقفة تراقب خالد وهو يحاول ..
خالد ــ وليش واقفة ؟؟ ماتروحين؟؟ المريض لايموت وانتي اتتفرجين ..
انتهى خالد من الحالة اللي عنده ..وراح لمكتبه ..
شي واحد كان الكل يمدحونه في خالد …انه رجل يعتمد عليه ..في الاوقات الحرجة..رغم أن عمر تعامله معاهم ماتعدى الثلاث أسابيع لكنهم اكتشفوا هالميزة فيه ..
وفي المكتب كان موجود …
فهد ــ قالوا لي أنك رجعت ..لكني ماصدقت …
خالد ــ فهد؟؟ وينك ياريال؟ ماشفتك من زمان …
فهد ـــ صار لي ثلاث أسابيع في الدوحة ,,واستخسرت أشيل التلفون أكلم ربعي .
خالد ــ لا عاد …بتلومني أنا ؟؟؟ التهاني ملت الجرايد برجوعي …ماعرفت تتصل تهني؟؟
فهد ــ قول نطرت الاتصال الاول منك ..
خالد ــ شخبارك يا ريال؟؟ شسوت فيك هالدنيا؟؟
فهد ــ رفيجك صار مدير بنك ..وأبو سالم ..
خالد ــ صحيح؟؟ مبرروووك … وأنت متى عرست؟؟
فهد ــ من سنة ونص ..أحسن من رفيجك مناحي المسكين تزوج من ست سنوات ..أول ماتخرجنا من الثانوية ..
خالد ـــ انت من صجك؟؟
فهد ــ اي والله والحين عنده ماشاءالله أربع أطفال ..
خالد ــ أربع؟؟ وهذول من وين بيوكلهم؟؟
فهد ــ يمشي حاله لاتخاف عليه …أنت شخبارك ياريال ..ماصدقت لما قالوا لي انك ييت هنا الدوحة من كم سنه .
خالد ــ لاتشتط وايد .. ييت يوم واحد بس ورجعت أكمل دراستي ..وماطبيت الدوحة إلا هالسنة !!!
فهد ـــ زين خلصت شغلك؟؟
خالد ــ لاء ..ماخلصت ..
فهد ــ الساعة سبع ..وماخلصت شغلك؟؟
خالد ــ أنا اليوم مستلم الشفت لين الساعة 12 …لان اثنين من الدكاتره خذوا اجازات اضطرارية ..
فهد ــ لا …وأنا كنت متأمل بسهره صباحي؟؟؟
خالد ــ ليش وين ام سالم عنك؟؟
فهد ــ اليوم بتبات عند أهلها ..فقلت أسهر معاك ..
خالد ــ أنا من الساعة عشر الصبح وأنا هنا ..ما تزحزحت من المستشفى والمكان الوحيد اللي بروح له بيكون البيت ..بس مشكور على العزيمة ..وانشاءالله قريب ..نتلاقى ..
فهد ــ أنا كنت مار عليك ..آخذك في طريقي ..بس بما أنك مابتطلع من هنا ..بروح بروحي للديوانية ..الربع ناطريني ..ولاتنسى ..مرة ثانية انشاءالله ..
خالد ــ وأنا على الوعد ..
**********
الساعة 1:37دقيقة .. في غرفة الطعام .. الكتب كلها مفروشة جدامها ..
دانة خلاص انهارت ..القواعد هي فاشله فيها امية في المية ..وماتقدر تدرسها ..بكره الامتحان .. ما مسكت دموعها .. لان خلاص النعاس أهلكها .
ومافي وقت ..عندها بس خمس ساعات ..
ــ ليش تصيحين؟؟
عدلت شيلتها ومسحت دموعها ..
ــ مافي شي ..أنت الحين رجعت؟؟
خالد ــ اييه يا زوجة المستقبل !!!
انقبض قلب الدانة …وحست أنها ماتتتحمل أي شي …انهارت في الصياح بقوة ..
خالد اخترع ..مفعول كلمة جي خلتها تصيح؟؟
خالد ــ دانة شفيج أنا أتطنز ..
دانة صاحت أكثر وهي منهارة خلاص ..
خالد ــ والله اني أتطنز خصوصا لما سألتيني عن يياتي وروحاتي ..
دانة ــ انت مالك شغل فيني والله ماني ناقصتك فارج عاد ..وراي بكره امتحان ..وماعندي وقت ..
خالد فهم السالفة ..امتحان ..ثانوية ..
خالد ــ امتحان ايش؟؟
دانة ــ انجليزي ..
خالد ــ لهالسبب كنتي تصيحين؟؟
دانة ــ اي ..ولا ..
خالد ــ عجيب هالجواب ..(تذكر أن عبير طلبت مرة منه أن يدرس الدانة بس هو طنش ..حس بالذنب انه ماساعدها إلا في الوقت الضايع ..(
خالد ــ دانة أنتي مادرستي شي؟؟
دانة ــ درست كل الكلمات وتدربت على المواضيع والريدنغ كل شي .بس في قواعد ما أقدر أفهمها ..ما تدخل مخي .. وبيركزون عليها عاد ..
خالد ـــ وريني يمكن أقدر أساعدج ..
دانة ــ هذي وهذي وهذي …
خالد ــ سهله ..بشرحها لج ..
دانة ــ لا …حرام توك رجعت من الدوام ..لا ..أكييد أنت تعبان ..
خالد ــ لاء …ماني تعبان ..وبعدين مابتاخذ من وقتي شي .. وريني ..
الساعة 3:50
خالد ــ دانة ..دانة ..
دانة ــ ها ..
خالد ــ انتي نمتي مرة ثانية؟؟
دانة ــ ها .؟؟
ضحك خالد …
دانة ـــ ليش تضحك مع هالويه ؟؟
خالد ــ روحي نامي ..عندج امتحان الصبح ..روحي ..
دانه ــ لا …ماخلصت ..
خالد ــ روحي يلا …. خلصتي كل شي ..روحي ..
دانة ــ زين ..
راقبها خالد وهي تطلع على الدري ومات من الضحك لانه خذت ربع ساعه يلا وصلت غرفتها ..حس انه مرضرض.. ..ومحتاج ينام ..قام لغرفته ,..وحط راسه ونام ..
*****
الساعة 6:40 صباحا ..
عبير ــ دانة ..دانة ..قومي الحقي بتتأخرين عن المدرسة ..
فتحت دانة عيونها بالغصب ..ولا اراديا نطت من على السرير رجعت شعرها الطويل لين نص ظهرها في المشبك الكبير اللي تستعمله والبست بسرعه ومالبست جوتي البست شحاطة البيت والشيلة والعباة وشالت شنطتها الصغيرة..ونزلت تحت لغرفة الطعام …لقت كل أوراقها مرتبة والريوق زاهب ..ماكلت شي من الخرعه .. خذت أوراقها وطلعت للسايق اللي كان مجهز السياره ..
دانة ــ راجو ..بسرعه راجو للمدرسه ..
مسكت أوراقها وهي مختبصه ..راجعت أشياء بسيطة …
راجوــ ماما .وصلنا ..
نزلت بسرعه ..وكانت قمر واقفة عند الباب وهي مختبصه ..
قمر ـــ الحقي دانة ..الحين اوراق الامتحانات تتوزع ..ركض أمانه ..
دانة ــ قمور وأنتي ليش مادخلتي لجنتج؟؟ شخصج فيني ؟؟
قمر ــ أنا استأذنت ..دقيت على جوالج لين عيزت مارديتي كلمت عبير ..اللي كانت نايمه ..اركضي ..
وأخييرا وصلت لللجنه ..دخلت قمر للجنتها ..ودخلت دانة اللجنه مالتها ..
لساعة كامله حاولت دانة حل الريدنغ والرايتنق والكلمات ..ولما خلصت راجعت وتأكدت وبعدين طلعت ..

تريقت وهي تبتسم ..طول ماهي تتذكر جلستها مع خالد أمس ..كان زيين وايد معاها لأول مرة,,وكان ذكي ..شرح لها كل القواعد مع أمثله بسيطة ..بعدين تعمق فيها بأمثله صعبه .. والحلات الشاذه ..ولما يا عند الاشياء البسيطة قفلت هي ونامت ..
ليلى ــ اللي ماخذ عقلج ..يتهنى به ..
دانه ــ عقلي موجود .محد يتجرأ يآخذه مني ..
ليلى ــ هذا الباين ..وينج اليوم خرعتينا ..قلنا هونت عن الامتحان ..
دانة ــ راحت علي نومه .. كنت أدرس لين الفير ..ونمت ..ومحد في البيت اللي أنا فيه صحى بدري ..
ليلى ــ يعني قمور هي اللي أنقذتج ..
دانه ــ اي وال?