لكل فراشة قويه .. محاربه .. الرجاء الدخول

صباحكم ومساكم كل خير

اخباركم اخواتي ان شاء الله الكل نرتاح ومبسووط

على فكره ثاني مره اكتب الموضوع بعد مااتقفل بالغلط بس لعيونكم كل شي يهون

اول شي قبل ابدا حبيت اقولكم اني حبيت وارتحت لمنتدى الفراشه مو عشان مواضيعه

يشهد ربي عشان الاخوات اللي هنا واللي بعضهم كلامهم زي البلسم ومحترمات ربي يسعدهم

وانا متابعه لكم في اغلب الاقسام مع قلة تواجدي وقلة ردودي

اخواتي .. فراشات .. ياغاليات ..

انا حبيت اطرح موضوع واتمنى ان الوضع يتحسن ويرجع زي زمان ونرتقي بأخلاقنا قبل كلامنا

في الفتره الاخيره لاحظت زي مو اغلبكم لاحظ كثرت التشمت والهجوم والافتاء << خط احمر هنا

وراح اقسم الموضوع على نقطتين .. اول نقطه الهجوم على الزوجه الثانيه .. وانواع الزواج

والنقطه الثانيه الردود الجارحه على اخواتنا العازبات

اقرئي اولا اختي كلام الله وحديث حبيبنا محمد صلى الله عليه وسلم ..

قال تعالى (إِنَّمَا الْمُؤْمِنُونَ إِخْوَةٌ َ) (الحجرات:10) ويقول الله تعالى: ( إن هذه أمتكم أمة واحدة)

وقال الرسول صلى الله عليم وسلم :”أفضل الإيمان أن تحب لله، وتبغض لله، وتعمل لسانك في ذكر الله” قال: وماذا يا رسول الله؟ قال: “أن تحب للناس ما تحب لنفسك ، وتكره لهم ما تكره لنفسك ، وأن تقول خيرا أو تصمت”.

عزيزاتي .. في قسم الحياه الزوجيه .. وطال الموضوع للاسف قسم الأرامل والمطلقات موضوع التشمت

والهجوم وصارت تنزل مواضيع لمجرد بدأ معركه او هجوم على بعض واحنا في الاخير كلنا اخوات ومسلماااات

اضرب لكم مثال بدون تحديد اسماء وبدون اي هجوم شخصي ..

موضوع الزوجه الثانيه اللي انتشر هنا وبكثره ووصل الهجوم لقسم اخواتنا الارامل والمطلقات

لدرجه ان ينزل موضوع هناك يطلب من اخواتنا هناك انهم يجلسون في بيوتهم ويخدمون اهلهم ولا يتزوجون

رجل متزوج << اصبحنا نقدس الرجل بشكل كبير وبشكل مبالغ

اخواتي انا مااطلب منكم ماتطرحون موضوع الزوجه الثانيه لكن يجب على كل انسانه مسلمه

تراعي الله في ردها وفي موضوعها يعني مستحيل كل البنات يتفقون على رايك اختي انتي

كل وحده لها وجهه نظر مختلفه وعندما يطرح الموضوع مو مطلوب منكم تغيرون وجهات نظر كل البنات

المطلوب كل وحده ترد برايها وماتهجم على رد اختها اللي قبلها او في صفحه سابقه

نعلم كلنا ان كل وحده متزوجه ترفض تكون لها شريكه وتتمنى طول عمرها زوجها يكون لها وربي يسعد كل

وحده متزوجه ويهنيها لكن اللي مكتوب من قبل تولدين راح يصير + الرجل هو اللي يبحث مو البنت

يعني لو يبغى يتزوج بيتزوج ولو رفضت هذه البنت بيشوف مليون غيرها وراح تجي اللي توافق

وطبعا هذا مو تقصير من الزوجه ان زوجها يبحث بس الرجال انواع واجناس وصفات مختلفه

لكن هذا مايعني ان اللي تخالف رايك سوف تصبح طبينك او ضرتك ويكون الرد قاسي وفيه سخريه وابعدوا

كل البعد عن الافتاء في انواع الزواج من مسيار الى مسفار الى الخ لان الشيوخ وهم شيوخ اختلفوا ودائما

في فتواهم يقولوا والله اعلم وماعمري شفت كلمة الله اعلم في رد اي اخت مهاجمه

في الاخير تذكروا ان الزوجه الثانيه هذا النصيب اللي ربي كتبه لها ومو من حقي او حقك تهاجمين عليها

وكل انسانه وظروفها اللي سمحت لها من زوجه ثانيه او مسيار او غيره

النقطه الثانيه الردود الجارحه على اخواتنا العازبات وهناك بعض الامثله سوا من ردود متزوجات

ردود قاسيه في قسم الارامل والمطلقات ومواضيع تطلب منهم البعد عن المتزوج او يصبحوا في قائمه

القسم المكروه او اللي مايطول العنب .. واستغفر الله العظيم

انا مااتمنى لاخواتي المتزوجات الا كل خير وراحة بال وسعاده في الدارين ولكن لاينسون انهم امس كانوا

عازبات مثل غيرهم والدنيا يوم ابيض ويوم اسود هذا حالها << لايضايقكم كلامي

حبيباتي ماراح اطيل عليكم الكلام اكثر من كذا لان اعلم اني اتكلم مع اخوات مسلمات فاهمات

واعذروني واسفه كل الاسف اذا كان موضوعي كثير او فيه بعض الكلمات الجارحه

لكن ماتعبت وكتبت هذا الكلام الا من حبي لمنتدى الفراشه وحبي للاخوات الناصحات اللي هنا

وبعد ماشفت ان المخاصمات كثرت وطغت على محبة الاخوات

واتمنى من كل قلبي نبعد عن الحقد والحسد وتصفية الحسابات لاننا في الاخير كلنا سواسيه

اخوات مسلمات مافي احد احسن من احد الا بالتقوى

واخيرا .. ولاتنسوا قول الله تعالى ..

{ مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ } سورة ق الآية 18

وصلى الله وسلم على افضل الخلق

ملاحظه : اللي تحب تدور في ملفي عن مواضيعي 😆 🙄