عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم يافراشات المنتدى
صار شي معايا قبل كم سنة والى الان…….
بكتبلكم من البداية ايش الي صار وان شاء الله ماتطفشوا مني
انا كنت متزوجة من واحد والله مافي مثلة بالاخلاق الطيبة والوجه السموح (( الله يذكرة بالخير وين ماكان))
كنت حامل تقريباً بالشهر الثاني راح زوجي العمل في الصباح وهوا خارج حسيت انه فيني شي وقعدت اترجاااااه يوديني بيت امي بس قالي انا ساعتين وبرجع والله ماحتأخر وبيت امي بعيد عن مكان عملة
المهم راح لعمل وانا رجعت انام بس كان فيني قلق ماادري من اية ؟
وبعدها حاولت انام ومدري كيف نمت ………. ووقت ماكنت نايمة والله العظيم حسيت كأنة احد يشدني جوا السرير ويضغط عليا وحاولت افتح عيوني والله ماقدرت كأنة في احد مقفلها.
وبعدها حاولت اقوم من السرير ماقدرت كانت يدي كانها مربوطة بالسرير ووقتها جلست اقرى المعوذات و استغفر ربي الين قدرت اجلس وبقوة على السرير وجلست امكن ثانية ووالله العظيم احد جالس ورايا وجلس يسحبني على السرير تاني يبغاني ارجع انام ورجعت مدري كيف اتربطت على السرير تاني وشوية الى الاقي واحد قدامي هيئتة من غير ملامح وقصير وجلس يتكلم معايا يقولي لاتخافي مني انا اسمي ؟؟؟؟ (( ماابغى اقول اسمة وربي خايفة )) وجلس يقول مو بس انا الي معاكي انا في الصباح والتاني بالليل انا بحميكي وانا كنت بنفس الاحساس مربوطة بس دي المره كانة احد فاتح عيني وشادها بقوة عشان اشوف
وانا كنت اقرى المعوذات بقلبي وكنت بموت من الخوف والرعب وقمت والحمدلله وبقوة اتصلت على امي قلتلها دحين تجي تاخذيني بس كنت اكلمها بكل برود من الخوف ماصرت احس بشئ بجسمي
جلست عندها تقريباً 3 اشهر مااجي بيتي الى كل خميس وجمعة عشان زوجي ماعندة دوام وربي كنت ماارضى اخلية يروح المسجد يصلي من الخوف بس والحمدلله عدى الموضوع على خير.بس كنت بشوف اشياء غريبة بالبيت مااحب افتكرها مو بس انا حتى اخت زوجي انتبهت لما كانت بتزوري
بعدها انفصلت عنة لمشكلة صارت بيننا
واتزوجت زوجي التاني والحمدلله بس مره من المرات كنت نايمة وزوجي برضه راح العمل وشوي حسيت انة رجع وضمني والله نفس صوتة وانفاسة يقولي وحشتيني والله احبك وفرحت انة رجع بس لفترة بسيطة وشكيت واتعوذت من ابليس وصحيت من النوم ومافي احد بجنبي
مااستنيت دي المره امي لا وربي اخذت ليموزين لحالي رحت لبيت امي وانا مصدومة وربي اضحك بنفس الوقت
بس حبيت احكيكم شي صار معايا واللي تعرف ايش اسوي ياليت تقولي ولو وحدة بعيد الشر صار معاها نفس الشئ ايش بيكون موقفها ؟؟
