(ليش البنات اللي قليلات حيا عايشين حياتهم وانا العفيفه يأنبني ضميري في كل ذنب) معدل*

السلام عليكم ورحمة الله

من دون مقدمات اكتب لكم الآن وانا في حاله اقسم بالله يرثى لها لعل من فيكم من لو اقسم على الله لآبره ان تخففوا علي ضيقتي وتدعون الله ان يبدل حالي من حال إلى احسن حال لذلك اعذروني على قلة الترتيب فالكلام ولكن بحاول اطلع كل اللي احس فيه

اولا انا انسانه متدممممره نفسيا وتعذيب الضمير ياكلني اكل من داخلي ولاادري كيف افتك من هالشي

فالبدايه انا عمري 25 ما ازكي على نفسي لكن ولله الحمد انسانه ذات جمال ودين وكل اللي حولي يثنون على هالشي فيني ويمكن هذا اول شي عذبني نفسيا ,, لما كنت فالمتوسط كانو يجوني خطاب واهلي يرفضونهم بحجة سني ودراستي وكان عندي ولد عم مطوع وكنت ادعي ربي ليل ونهار وبكل صلاه انه يكون من نصيبي ومن مدح اهله لي حسيت ان فيه نيه يخطبوني له وكبر هالشي فيني ودايما ادعي لين خلصت الثانوي وتفاجئت خطب وحده اقل مني بكل شي لو احكيلكم قد ايييش تعبت م تتخيلون من وانا صغيره ادعي يكون هالادمي لي واهله دايما يلمحون لي وبالاخير يكون لغيري مااخفي عليكم للحين وانا ابيه !! للحييين ابيه مع انه مبسوط مع زوجته وجايب عيال لكن للحين مااحس فيه احد مثله وانا من صغري ابي واحد ملتزم ويمكن عشان مافي بعايلتنا واحد ملتزم مثله وهالشي هو اللي خلاني اتعلق فيه ولاني قادره اتخلص منه لاحول ولاقوة الا بالله ,

بعد قصتي ذي دخلت الجامعه وبدت الانسانه ذي اللي تكلمكم تتغير من العفه والطهاره والالتزام لاحققققر واوسخ بنت مدري شلون اشرحها لكم بس زي اللي تقول ان طول هالسنين دعت ع الفاضي استغفرالله العظيم ’ كنت اشوف البنات اللي كنت اسميهم قليلات حيا متوفقين بحياتهم وعايشين احسن عيشه وانا مافي شي ابيه وجاني ,سويت زيهم صعت وكلمت شباب وطلعت لدرجة اني اسوي اشيا البنات هذول الصيع مايسونها ؟؟ مع ذلك كنت اصلي واقرا وردي قبل لااطلع معهم حتى قيام الليل اسكر من اللي يكلمني اصليها وارجع اكلمه وربي مدري كيف اجتمع فيني الفحش والطاعه احس اني منافقه واضحك على نفسي وعلى ربي , كان تأنيب الضمير يجيني دايما واترك الشباب بحجة التوبه اتوب شهر بالكثير وارجع , كانت عقدتي لما تجيني وحده وتقول انتي حلوه ولا انتي ليش للحين ماتزوجتي اقسم بالله ياأني اجلس ايام ماانام من هالكلمه طيب ليش تمدحوني واحس اني منبوذه ؟ دامني حلوه وطيبه ومعجبتكم ليش م تخطبوني لاحد من عيالكم , هذا الشي اللي خلاني اكلم شباب لانك متأكده اني بعجبهم وعلقت ناس فيني كثير وتركتهم عشان تبرد حرتي وابي احس بشعور الرفض زي ماهم يرفضوني , كنت اموت لما اشوف واحد علقته فيني وبعدها توفق بحياته طيب انا اعرفه زين لايصلي ودايما يسمع اغاني وانا احسن منه ليش هو يتوفق وانا لااا ليييش حتى البنات اللي خربوني كلهم تزوجو ومبسوطين بحياتهم ولين الحين يكلمون شباب ويخونون مع ذلك مبسوطين وكل وحده تجي تنفش ريشها عندي انا متأكدهههه انا احسن منهااا اخاف ربي ولو بتزوج مستحيل اخون وبحطه فعيوني وبصونه بس لييش يصير فيني كذا , بعد ماتخرجت انخطبت وماقدر اوصفلكم الفرحه اللي شعرت فيها وقتها انخطبت لواحد فيه ككككل المواصفات اللي ابيها واهم شي انه كان مطووع زي ماانا ابي بالضببط وكنت اضحك على نفسي وشلون كنت مستعجله على رزقي بعد ماملكت طلع انسان متلبس بلبس ملااك وتطلقت رجعت انتكست حالتي لازوج لاوظيفه لاصديقات حسيت اني انسانه مغضوب عليها ومهما سويت ماراح يسامحني ربي اللي خلاني احس بهالشي مره كنت اتفرج برنامج فتاوى اتصلت وحده على الشيخ تقوله ياشيخ انا اعرف ان الحمى تكفر الذنوب وانا لي ست سنين ماصابتني قالها انتي مسويه ذنب كبير قالت لا قال إلا ردت عليه ايه والله انا قتلت ام زوجي , بعد ماسمعت هالكلام صابتني الوساويس من زماان انا ماقد سخنت تخيلوا حتى لما البيت كله تجيه السخونه ومعروف انها تنتقل من واحد لواحد فالبيت الا انا ماتجيني مع اني مناعتي ضعيفه تذكرت ايه
(ومن الناس من يعبد الله على حرف فإن اصابه خير اطمأن به وان اصابته فتنة انقلب على وجهه خسر الدنيا والاخره ذلك هو الخسران المبين ) الايه ذي لما اقراها ابكيي كثثثثثير احس انها لي يمكن كنت اتقرب من الله عشان يوفقني واخذ اللي ابيه لكن مادري انا عجزانه اتكلم ياخواتي والله بموت من الهممم والبكيي بس ابي اعرف ليش اللي حولي ككككلهم توفقوا وتغيرت حياتهم وانا للحين من ردي إلى اردى مع انهم ماتابو مثلي بس تركوه عشان مايقدرون يكملون فيه ياكثنر مايجي فبالي اني اروح لعرافه تشوف وش وضعي بكره لين متى بستمر على هالحال ولا انا هذا حضي ولا انا معيونه ولاوش به حالي كذا .. انا لي فتره اقرا سورة البقره كل يوم ويس والحمدلله احس اني متحسنه لكن اول مايكلمني احد من خوياتي واشوفهم يتفشخرون قدامي بالخيانه وكلمت فلان وكلمت علان انغبببن كل هالذنوب ومرتاحه وانا اللي تايبه مانام من تأنيب الضميرر اني عصيت ربي ولين الحين ساتر علي وهم يجاهرون بخطاياهم ولاعليهم يوم اشكي لامي تقول لي لهم الدنيا ولك الاخره ان شالله وهالشي يريحنييي اذا هذا حضي فالدنيا ان شالله ان ربي كاتبلي فالاخره شي احسن ودايما ادعي يارب لاتجعل الدنيا اكبر همي ,, اعذ روني حاسه اني كلامي مره ملخبط ومو مفهوم والله اني اكتب وابي وارجع اكتب اللي مافهمت شي تعتبره مجرد فضفضه ,

بس ابيكم تدعون لي ان ربي يريح قلبي ويرضى علي ويغفرلي
واستغفرالله العظيم من كل ذنب عظيم
في امان الله

سبحان الله ياخواتي نسخت الموضوع وفتحت المذكره بحطها فيه احتياط لايروح الكلام اذا حطيت ارسال لقيت هالكلام
قال الحبيب صلى الله عليه وسلم:
( إذا رأيت الله عز وجل يعطى العبد من الدنيا على معاصيه ما يحب ، فأنما هو استدراج )
ثم تلا قوله عز وجل:{ فلما نسوا ما ذكروا به فتحنا عليهم أبواب كل شىء حتى إذا فرحوا بما أوتوا أخذناهم بغته فإذا هم مبلسون }. ( الأنعام : 44 )

وَالَّذِينَ كَذَّبُواْ بِآيَاتِنَا سَنَسْتَدْرِجُهُم مِّنْ حَيْثُ لاَ يَعْلَمُونَ [ سورة الأعراف – الآية 182 ]
النفسُ تبكي على الدنيا وقد علمت *** أن السعادة فيـها ترك ما فيـها لا دارٌ للـمرءِ بعد الموت يسكُنهـا *** إلا التي كانَ قبل الموتِ بانيها فإن بناها بخيـر طــاب مـسكـنُـه *** وإن بناها بشر خـاب بانيـها

الحممدلله يارب على سترك الحمدلله على كل حال