عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مســـــــــــــــــــــــاكم ورد …
أكيد أغلبكم لاحظ إنتشار ظاهرة جديدة في سماء
المنتديات … أسمها الليالي الرومانسية ..
وكما قال المثل …(مع الخيل ياشقراء …)
محدثتكم شقراء .. قصدي مسمس.. حابة تهديكم
أحلى الافكار ..لقضاء ليالي لن تنسوها …لاأنتم ولا أزواجكم
والأفكار جميعها برعاية ( محلات حسنين ومحمدين أبو ريالين .. )
ليلة ( بخني وابخك )
المطلوب منك عزيزتي الزوجة ..لنجاح هالفكرة الخطيرة
هي علبتين بخاخ أحمر … إية بالضبط ماغيره .. اللي
يعبرون فية شبابنا عن مشاعرهم الجياشة على جدران منازلنا ..
تجيبنة … وتطلبين من سبع البرومبة … ان واحد
يتوزى في مكان .. في البيت … همن الثاني يدورة
ولين لقاة يبخ وجهه … وهكذا ..تتبادلون الأدوار ..
واللي يخلص بخاخة قبل يفوز ..ويطلب من شريك حياتة
اللي يبي … عاد وقتها ماعاد بتعرفون هي انتي الزوج
ولا هو الزوجة …لانكم كلكم بتكونون لون واحد ….
والسر في هاللعبة .. هي ان محاولة البحث عن شريك
حياتك ..والبخ في وجهه ..تثير بعض الخلايا في الدماغ
لزيادة جرعه الرومانصية في حياتكم …
ليلة (
النوبيطة الحمراء …)
الفكرة هنا .. هي انك تشترين نبيطة ..وتربطين فيها شريطة
حمراء (الخطوة ذي مهمة لإتمام الهدف ) …
همن تكلمين زوجك ..وتصارجين في التليفون ..
الحقني الحقني … بموت .. (طبعاً أنتي سذووب ..منتيب ميتة
ولا شي .. وهو بيجي يركض يحسب عندك سالفة ..)
وقتها لازم تتوزين في موقع إستراتيجي قدام الباب .. وتنشنين
النوبيطة أم شريطة حمراء …
وأول مايدخل ..
وززززززززززززززززززززززززززززززززززززززززززززززززز طع …
في عينة … لأن يقولون والعهدة على الراوي أن فية خلية
رومانصية خاملة متوزية ورى العين … لين صقعتيها ..
.بدت تشتغل .. همن عاد عينك ماتشوف إلا النور من الرومانصية
اللي بتنكب عليك من ورى هالصقعه …
ليلة ..( قواقع حوبينا)
المطلوب هنا زيارة خاطفة للراعي الرسمي ..( حسنين ومحمدين )
وشراء كل مالدية من القواقع والأصداف والشبكات …
وكل ماهو لونة ازرق … للمزيد من المصداقية .. وتحويل
غرفتك لبيئة بحرية صدز ..
ولاتخلين في غرفتك ولا ركن ماتعلقين فية شبكة ولا تلزقين
فية قوقعه … وخصوصاً الفراش ..تجين ياطويلة العمر
تكسرين باقي القواقع ..وتنثرينها من عند الباب ليييييييييييييييين
توصلين للفراش … ومايمنع من انك ترشين الفراش
بكم قوقعة مكسورة .. والمطلوب من سبعك ..انة
يمشي على القواقع المكسورة ..ليييييييييييين يوصل الفراش
وانتي واقفة متألقة بلبس حورية البحر .. تنظرين لزوجك
بكل رقة وحنان وهو يناقز على القواقع المكسورة ..
لأن العلماء أكتشفو أن رومانصية الرجل غالباً ..تقع
في مكان بين إبهام رجلة .. والإصبع الصغير …
لذلك لين نغزتي هالمنطقة ..راح تنساب الرومانصية
بغزارة … وراح تغرقين رومانصية … لين تدعين على الساعه
اللي سمعتي فيها عن مصطلح اسمة رومانصية ..
ضحكتواا ؟؟؟
أنبسطتواا ؟؟؟
طيب …
ألحين بصيحكم ..
سؤال مهم ..بسألة كل وحدة أرضت تاجرات العروض الزوجية
وزادت مدخولهم وعبت جيوبهم …
هل تتوقعين أن الرومانسية الزوجية . حلم تحققة لعبة سخيفة
او شرايط وفيونكات مربطة في كل ركن .أو بالونات مالية الغرفة ؟؟
هل ممكن تملكين قلب زوجك .. بجنحان فراشات تلبسينهم
ولا بزي خادمة أو نيرس تتحزقين فية قدامة ؟؟
سواء كان جوابك لا ..او نعم … بقولك رايي الصريح جداً
من خلال تجارب كثير مرت علي ..وقصص كثير سمعتها ..
يمكن بعض الرجال يضحك شوي على هالحركات … وممكن
يسوي نفسة مبسوط …
لكن هل تتوقعين ان هالشعور بيكون دائم .. متجدد ..
أو مثل عود الكبريت .. ولعتية مرة وطفى خلاص ..؟؟
هل ممكن نحشر شعور رائع … ولة معاني واسعه …
في ثوب ضيق .. نسمية الليالي الرومانسية … ونخلية
محشور فية للأبد … ؟؟
طيب .. مافكرتي وين كرامة أنوثتك … لما تلبسين هالألباس
وتهولين بعمرك هالتهويل ؟؟
بتسأليني وتقولين وش دخل كرامة أنوثتي ؟؟
بقولك :
أن لما تعودين زوجك ..أنة يشوف قشرة خارجية انتي لابستها …
ويبرمج مشاعرة أنها تشتهيك عشان هاللبس اللي أنتي لابستة ..
بتكونين أهدرتي كرامة أنوثتك لأنك ألغيتي دورها في جذبة لك ..
ألغيتي دور عيونك ونظراتها ..
ألغيتي دور صوتك … وهمسك .. ألغيتي دور ريحة جسمك
ألغيتي دور حركات جسدك … لأن لبس الخادمة والمهرج
اللي فوقة قتل إغراءة .. وحول إهتمام زوجك بدون ماتحسين
للبس اللي عليك …
بسألك …
أنتي أول ماتتزوجين كم سنة مخططة تعيشين مع زوجك ؟؟؟
سنة وسنتين و3 .. ولا طول العمر ..؟؟
طيب ..
تتوقعين ..بهالأفكار الدخيلة … واللي راح تعودين زوجك عليها
كل شهر أو حتى كل كم شهر …
ممكن تستمرين طول العمر تجذبينة لك بواسطتها ؟؟؟
كم فكرة راح تسوين ؟؟ أكيد كل مرة بتغيرين اللبس والديكورات ..
كم محل أبو ريالين راح تقشينة عشان تحافظين على مشاعرة …؟
لكن ..
لما تستغلين مواهبك الربانية .. واللي عطاك ربي .. بذكاءك
ودهاءك … ممكن تستمرين في ضخ روح الحب والشوق في
علاقتكم … بدون خسائر ..لا في جيبك ولا في كرامتك ..
تصدقون أن فية حريم آخر إهتمامهم هو جسمهم ورشاقتة ونظافتة
همن تجي تلبس هاللبس التنكري عشان تغري زوجها ؟؟؟
بالله وين الرومانسية اللي تطلبها ؟؟؟
لاتتوقعون اني ضد مفاجأة الزوج بيوم خاص . لكني ضد هدر أناقتك ..
ضد إعتمادك على أسلحة مزيفة ..وتجاهل حاجات أساسية ..
ضد إهمالك لجسمك والتخفي خلف أقنعه وقتية ..
مايمنع من بعض الحفلات الخاصة الأنيقة … مايمنع من تبادل
الهدايا بطريقة جذابة …
لكن قربعه ابو ريالين وخرابيط التاجرات والعابهم وعصيانهم المضيئة
وشخابيطهم … صدقيني .. راح تخلق لك كائن حي متطلب
ملول ..لايحس بالشغف تجاهك إلا عبر وسيط ..
لما تعودين زوجك على الاوقات الخاصة الأنيقة …
والجلسات الهادية اللي تكونين فيها ملكة .. بحركاتها ..
بهمساتها … بملابسها الراقية ..بمهارتها في إدارة حواسها ..
وبرمجة مهاراتها …راح تكسبين نفسك قبل أن تكسبين
زوج .. يتقن لغة جسدك ..
دمتي بكل الرقي والرومانسية]
ملطوووووووووووووووووش 😆 🙄
