عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم …
قصتي طويلة … للي يحب الإختصار .. يمكن لأني وايد كاتبه تفاصيل
ترددت وايد اني انشر الموضوع .. خصوصاً اني خاص فيني إلى أبعد الحدود …
لكني غامرت … عشان ارواح كانت ضايعه مثلي ف يوم ..
مادري ليش يا ف بالي اكتبلكم قصتي … بس ما اكتبها إلا للعضه وانا مب
مستفيده شي لو ألفت وجذبت .. ومن خاطري اتمنى ما اشوف شي يعور قلبي
زود ماهو يعورني من سب وتجريح … بس ابي المراهقات يتعضون ..
بس ابي الخوات ينتبهون لخواتهم .. اكتبها يمكن في وحده تستفيد .. ويمكن
وحده تمر باللي مريت فيه .. ..
اليوم تذكرت غلطة عمري وجني نسيتها عشان اذكرها .. جرمي الكبييير الذي
اذنبته .. واللي يسرق النوم من عيوني ويحرمني راحة البال ..
اخاف خواتي من ضمة القبر اخاف اجابل ربي .. اخاف من المستقبل واحس
صدق ها عقابي .. اني اموت وانا حيه .. اني ما اقدر اخبر حد .. اني احتفظ بسر
اكبر عني بوايد .. ..
ايامها …. توني كنت ف الـ 17 .. كنت طفلة والله .. ولا زلت ف أوائل
العشرينات لكن احس نفسي كبرت … وكله بإيدي ..
طلع في حياتي بدون مقدمات .. في عز ضيقي في عز أزمتي في عز حزني على
اعز شخص مات ف عايلتي ….
طلع شخص يتبعني مثل ظلي .. رديته مره مرتين ثلاث ..
وكله بسبب .. بنت عمي .. ربيعتي .. حبيبتي .. اختي ..
عطته كل معلوماتي .. تفاصيلي .. واختار عز ظروفي ودخل حياتي ..
رديته ف البداية واصررت وايد …
ولكني طحت فريسه سهله ..
اكتبلكم هالسطر واحس بحرقة .. طول عمرنا نسمع عن قصص البنات ويا
الشباب بس ماتوقعت اكون جزء من هالقصص المكرره ..
وخطوتي الاولى اللي جرتي للهاويه .. كانت اني عطيته فرصه … وسمعته ..
عطيته مجال يتكلم بعذر اني ابا اعرف كيف يعرفني ..
ولأنه يعرفني ويعرف كل شي عني .. دخل من الباب اللي بيوصله لي ..
الدين .. هيه خواتي الدين ..
بديت اسمعه واسمعه ..
بس اسكت .. ويضيع وقتي بالساعات .. لا دراسة لا مشغلة ولا حتى رقاد .. ما
انام إلا كم ساعه .. يشغل كل يومي .. وربي شاهد مذاكره ما اذاكر بس هو
همي ..
من كثر ماتعودت على كلامه .. مره سافر وما كان يتصل وايد .. ايلس
اصيييييييح على سيادتي ويدي وحليله خايف ويحضني ويقرا علي ..
كنت احس عمري بين نارين .. ناره والخوف من ربي ..
كلامه فاضي وسطحي .. بس كنت فارغه ابي شي يملي هالفراغ ..
وتوهمت اني احبه وانا والله لا احبه ولا شي .. تعلقت فيه ماتعرفون كيف ..
وبدت علاقتنا المريضة ..
في البداية كان غير .. كنت احس بإحساس حلو .. يمكن لأنه كان شبه مثالي ..
ومن كثر ماحبيته قررت إني افاتحه اننا نبعد لين ما ربنا ايسر الأمور لأنه جيه
قالي ف بداية العلاقة كلميني بس شوي وعقب بنقطع وبييج بالحلال ..
ومن طلبت منه نبعد .. مؤقت لين ما الله يجمعنا بالحلال .. والله صار وحش ..
حس اني اهدده .. حس انه بيفقدني .. وبدى يهددني بأهلي .. وقالي اعرفهم واحد
واحد ..
والله خواتي عقبها .. صار مهووووس مهوووووس فيني .. كل ساعتين يتصل
والله كل كل كل ساعتين .. في البداية كان اهتمام .. لكن صار هوس .. وصار
يضغط علي .. والله خواتي لو ماخبرته اني كلت يحشرني .. اتسبح وهو ع
الخط .. اخبره منو طرشلي مسج .. واقراله المسجات .. اقوله منو زارنا ويا
ويلي لو نسيت .. لو تأخرت عن الساعتين بدقيقه .. يحرقني بكلامه ..
تخيلوا اروح الكولج وانا مب راقده إلا ساعتين .. وارجع اكلمه طول اليوم
ونفس الموال انام قبل الدوام بشوي .. وف دربي للكولج اكلمه وف الرده اكلمه
وبين الكلاسات وف البريكات .. ولو قلتله
برقد هلكانه يعصب .. لو رقدت بدون ما احس .. يعصب وينقهر .. ليش رقدتي
اكيد ماتبيني وانتي مب متربيه وانتي وانتي .. يوم اتذكر احس حرام هالطفله
اللي فهالسن ينقال لها كل هالكلام الجارح ..
ادري والله انه بيدي .. بس حرام طفله تتعرض لكل هالمعاناة .. بس لأنها تبا اهتمام ..
المهم …. وياويلي لو ما اتصلت .. يسبني سب .. والله ماينقال ..
بس اكثر كلمة ترن ف بالي .. بدوسج .. كان يعيدها ويتلذذ لمى يسمعني اصيح ..
خوفي منعني ابتعد .. لأني بديت ف طريج مااقدر اتراجع منه .. وكل مشاعر
الحب اللي توهمتها كانت متبخره .. ولا بجى منها إلا الخوف من تهديداته ..
وبس كنت طول يومي حابسه نفسي لا اكل ولا شي .. بس افكر كيف اتخلص من هالياثوم ..
بس يبي يعذبني بأي طريقة وعقب لمى اصيح لدرجة اني اختنق واكفخ عمري بأي شي يدامي … يرتاح .. ويصيح معاي ويراضيني .. والله مريض نفسي ..
وكنت عقبها اسكت وما ايي طاري الفراق مع اني كنت ابي الخلاص وكان لمى يحس اني بعدني افكر بهالشي يرجع يهددني بأهلي ..
صدق كنت اخاف بس بعد ارجع اطلب منه يودرني وصار هالشي كم مره … تعرفون شو كان يسوي؟
ايي عند باب بيتنا ويهرن ويحشر الدنيا .. ويسبني يسبني لين مايرتاح ..
وانا ف غرفتي اصيح بدال الدموع دم .. اترجاه يرحم ضعف ابوي ويدي المرضى .. يرحم كرامة اخواني وخوالي اللي انا ماصنتها .. يخاف الله فيني ..
وهنيه بدى الانحدار ..
تبيني اسكت .. صوري عمرج اللحين .. تبيني اسكت .. قوليلي احبك ..
تبيني اسكت .. قوليلي .. قوليلي قوليلي ..
تبيني اسكت انحدري معاي لأوصخ وادنى درجه .. لدرجة والله ساعات لمى
اتذكر اشمئز منه واشمئز من نفسي .. كيف كان يستغلني .. كان يقولي انتي
وايد شخصيتج ضعيفه .. انتي مهزوزه انتي وانتي وكان صادق ..
وكان سيل طوووووووويل من الطلبات والله ماينقال ..
تبيني اسكت ..
تبيني اسكت …………. طلعي معاي ..
مافقدت عذريتي .. لكن فقدت روحي فقدت الصفاء والنقاء والعفة .. فقدت
السعادة .. والله فقدت السعادة .. ودي ارجع اضحك من قلبي شرات قبل .. بس
احس ها عقاب .. وانا استاهله ..
قبل كنت مرتاحة البال .. اللحين راضيه الحمدلله لكني خسرت شي مايتعوض … شي يكون ف القلب .. ماعرف بشو اوصفه ..
تدرون ..
كنت اسكر عنه .. وايلس اصيح واكفخ عمري واذبح اذبح اذبح عمري من الضرب واسجد وادعييييييييييييييييييي و ماعرف اقول لمنو يطلعني من هالورطه ..
والله لمى اتذكر كيف كان حالي ..
كيف كنت ضايعه وخايفه منه اصيييييح على عمري ..
والله مره متصله لواحد كنت العب معاه يوم صغيره عشان يساعدني … شوفو اليأس !!!
والله متصله فيه .. تجرأت أفكر بهالشي ولا تجرأت اصارح اهلي ..
وعقب تراجعت ..
والله ماعرفت شو اسوي ماعرف كيف اخليه يحل عن حياتي ..
بس يا يوم .. حسيت اني صدق .. مابجى شي اخسره ..
غلقت موبايلي اسبوع ..
واول مافتحته بشوي اتصل ..
كان بارد .. اتذكر صوته .. وكلامه بالحرف ..
.. وينج ؟ .. قال بطريقة قاسيه خلتني ابدى اصيح رعب ..
رد سألني وانا سااااااااااااكته .. وبدى يصارخ علي .. انتي وين .. حمار انا ماتخبريني .. تبيني أأدبج ؟ .. انتي ماتادبتي بعدج .. بتشوفين شو بسوي فيج .. بدووووووووووسج بدووووسج
خواتي حسيت قلبي انقبض .. واختنقت وطحت ع الارض ..
ويلست اصيح بخوف وصمت .. حسيت لحظته اني بموت وصرت بس اصيح ..
لدرجة انه خاف ويلس يهديني ..
سكرت عنه .. ولا إرادياً اتصلت بالشرطة .. والله خواتي حسيت بالذذذذذذذذذذل .. الذل الذل الحقيقي ..
اول مارد علي الشرطي يلست اصيييييييييييييييييييييييح .. قلتله بيفضحني ..
بيذبح ابوي بيذبح يدي الله يخليك ساعدني .. تصدقون انه بغى يصيح من كثر ما اشفق علي ..
ونفس الوقت رد اتصل فيني عالخط الثاني .. قلت للشرطي بهستيريا .. يتصل فيني بيذبحني اكيد يعرف اني اتصلت فيك .. الله يخليك لا تخبره خلاص مابا مابا شي ..
وسكرت ف ويهه .. كنت والله مثل الميانين من الخوف ..
ورديت عليه .. قالي تعرفين شو بسوي فيج ….. بفففففففضحج ..
هنيه يتني قوة مادري من وين .. قلتله ماتقدر .. انا خبرت عليك الشرطة .. بياخذون حقي منك .. انا ماباك .. مليون مره قلتلك ماباك ..
والله والله انه يلس يسبني .. لدرجة اني سكرت واتصلت ف الشرطي ميته ميته من الصياح واترجاه لا يسوي شي .. وماعطيته حتى فرصه يتكلم ..
وعقب ماتميت ارد على حد .. وبس تميت ادعي بالستر .. بس لحظتها كنت اتمنى اموت ولا انفضح .. كنت خايفه من نار الدنيا .. واللحين خايفه من نار الآخره ..
والشرطي حليله حرق موبايلي.. ورديت عليه عقبها .. يلس يترجاني ما اخليه .. قالي بيأذي غيرج .. قلتله ما اقدر اغامر .. الله يخليك انسى الموضوع
والله كلمني بنبرة خيبة ما انساها .. و ودعني وانا صدق حاسه انه خايف علي .. قالي الله يحفظج ويستر عليج .. حسيتها والله من قلب قلب قلبه ..
تخيلوا ف غرفتي بروحي .. يالسه عالارض حتى ريولي ماتشلني .. اسمع الشرطي يودعني ..
هنيه صدق كنت بموت من الخوف .. ومنو بجالي لحظتها ؟
هنيه صدق يلست ادعي .. وادعي ..
وكنت والله مشتاقه لربي ..متحسره اني نسيت عشان شخص واحد لا راح ولا يا ..
دقايق ولا يوصلني مسج ..
مسجه الأخير كان … انا مابأذيج .. انتي ف درب وانا ف درب ..
! ! !
شوفو كيف جبان وانا اللي ضيعت نفسي خوف منه ..
شوفو كيف انسحب بس من مجرد كلمة ..
بس هالي قاله .. ومن يومها ماعرف عنه شي .. بس على اعصابي بس خايفه .. بس متلومه ..
بس حاسه بتأنيب الضمير ..
والله لأول مره اراجع التفاصيل بهالدقه ..
ماتعرفون كيف اتحسر .. كيف اندم .. كيف احس بقلبي ينزف دم ..
وفي نفس الوقت ماحس هاييج الانسان نفسها هي انا اليوم .. انا غير والله .. انا لو يمر حذالي واحد اشرد عنه ..
وين اغامر وادخل ف علاقة ..
ما اقصد اجاهر بمعصيتي والله .. لكن يمكن ف حد يستفيد ..
اتمنى اتمنى لو وحده بس تستفيد ..
اتمنى اللي تكون ف وضع مشابه لوضعي ماتتردد .. ماتخسر نفسها عشان واحد ينحسب عالرياييل ..
انا وياج لو كل الدنيا ماتفهمج انا بفهمج .. لأني مريت بهالشي .. وارحب بأي وحده تباني اساعدها ..
ادعولي هاللي اباه .. بس دعواتكم ..
اختكم … منقول
