ماجد اخويا وحبيبي

السلام عليكم ورحمة الله

انا عضوة جديده كنت قبل ادخل الموقع اتصفح واطلع وخاصتا هذا القسم
واليوم حسيت اني بحاجه لمشورتكم ونصحكم واتمنى انكم ماتبخلو علي بالنصيحه

مشكلتي اني احب اخويا حب كبير مرررررررررررررررررررررررره اعتبرو اخويا وصديقي وكل حاجه
اخويا اكبر مني بـ 8 سنوات رغم ان عندي اخوان غيرو لاكن هو اكثر واحد انا متعلقه فيه
واخلاقو الكل يشهد فيها من البيت للدوام للمسجد مايحب السهر ولا يدخن ولا يكلم بنات ودايما يقول انا عندي اخوات وربي قادر يرجع كل شي اسوي فيهم
قبل عدة سنوات سارت مشكله بين اخويا وبابا وبسببها خرج اخويا من البيت وطردو بابا من الشركة ومنعو من كل شي المصروف والسيارة وكل شي حتى ملابسو ماسمحلو ياخد منها شي وكان السبب ان اخويا فاتح ماما وبابا برغبتو انو يتقدم لصديقتي ويتزوجها وكان مره معجب فيها وعائلتنا فيها تقليد يمنع اي شاب او بنت تتزوج من غير القبيلة
بعد المشلكة اشتغل اخويا وكون نفسو وفتح مؤسسة وشترا فلة قريب من فلتنا وشترا فله ثانيه بدروة العروس كان كل يوم يزورنا ويسلم علينا ويطلع معانا ويسهر والله يابنات حتى الشغالات يحبو اول مايدخل يجرو ينادو عليه مستر ماجد مستر ماجد يضحك ويتريق معاهم ويسئلهم اوديكم البقالة الاندنوسية وياضحك وتريقه
صديقاتي يحسدوني عليه وكل وحده تتمنى يكون من نصيبها حتى صديقات اختي الي اكبر مني يسموه مهند لأنو مره شال اختي في الدرة ودخلها السيارة مع صديقاتها ومسكو عليه الاسم

قبل سنة اتغير كل شيء اتعرف اخويا على وحده من بنات الرياض ماعرف كيف عرفها ممكن عن طريق النت وسار طول الوقت معاها على المسن وسار يقول انا ابغا اخطبها واتزوجها ابغاها بالحلال ولمن بابا وماما سمعوه حلفو على رضاهم عليه انو مايخدها وبدأت المشاكل تكبر وانا دخلت نفسي وسرت واقفه ضدو واقول مستحيل تتزوجها
وبصراحه يابنات انا اول ماشفت صورتها على المسن انقهرت عارفه بتقولو اني غلطانه انا معترفه بغلطي بس لمن شوفتها سمره ومره نحيفه واخويا ابيض واشقر قلت في وجهو انت بجد تتزوج هذي قال ليه عندك مانع قلت شوف سمرا ووحشه وانت احلى منها 100 مره قال اوك دوري على وحده حلوه وشقره وملكة جمال لاكن شرط يكون عندها زي قلبها وانا اوعدك اني اتركها

الاسبوع الي راح طلعت معاه مطعم ولمن قام يطلب دق جوالو وشفت اسمها انقهرت ورسلتلها رسالة قلت لو سمحتي لاتزعجينا ولمن رجع اخويا جات رسالة وقرأها وانقلب وجهو وقال انتي رسلتي من جوالي قلت ايوه صرخ فيني قال انتي زوتيها ومن اليوم الي يغلط عليها معناها غلط علي وحطي في بالك والله لو خيروني بينكم وبينها حختارها لانها ماضرتكم ولاغلطت عليكم ودايما تقول اهلك لاتقطعهم وخليك معاهم وانتو دايما تغلطو عليها وانا ساكتلكم واقول حيجي يوم تقدرو سكوتي وصبري وقام قال انا مروح اوصلك ولا السواق يجي ياخدك ورجعني على البيت وطول الخط وهو ساكت ولو اتكلمت مايرد علي

ثاني يوم الفجر اتوفت بنت اختي ديما عمرها 10 سنوات وهو مره متعلق فيها ويحبها وهي كمان مرات تناديه بابا ماجد وتقول اتمنى يكون هو بابا لمن وصل دخل الغرفه والدكتور عندها قام شالها وسار يدور في البيت ويبكي وماما تقول رجعها على السرير لاتحركها اخدها ودخل الملحق وقفل الباب وسار يصرخ يقول الاثنين خسرتهم في نفس اليوم بعد نصف ساعة طلع وقف قدامنا وهو يبكي ويقول الله لايسامحكم الله ينتقم منكم ويحرق قلوبكم زي ماحرقتو قلبي عليهم انا مافهمت وسار يطالع فيني ويقول افرحي الي تبغيه سار

والله طول فترت العزاء وانا افكر في كلامو وحسيت اننا ضلمناه كثير وقسينا عليه هو مايستاهل الي سويناه فيه حتى ماما دايما تقول هو اكثر واحد بار فيني ومايردلي كلمة

اخر يوم عزاء طلع من عندنا وماندري عنو اي شي جوالو مقفل العمل يقولو اخد اجازة اصحابو يقولو ماشفناه ولاكلمنا

حسيت اني ظالمة واني قهرتو وهو صابر وساكت

يابنات انا خايفه عليه واخاف لو رجع مايسامحني لاني غلط في البنت كثير وسويت بينهم مشاكل كم مره

بابا يقول خلوه حيدور ويتعب ويرجع لحالو ويقول والله ماحياخد وحده من غير القبيلة

ايش اسوي نفسي اوقف معاهخ واريحو نفسي اصلح غلطي بس مادري كيف

انصحوني ولاتبخلو علي برأيكم

وادعو انو يكون بخير ويرجع قريب

طولت عليكم سامحوني