متضايقه من نفسي :(

بنات انا مرره متضايقه وحزينه

من يوم ماوعيت على الدنيا وعمتي اخت ابويا عايشه معانا في البيت لانها مااتزوجت هيا اكبر من ابويا في السن

كانت بمثابة امي التانيه , ربتني وربت اخواني كلهم وكانت تعاملنا كااننا عيالها بالضبط

بس سبحان الله انا بالدات كانت تحبني بطريقه عجيبه و من كتر حبها فيا على طول تدافع عني سواء كنت انا على صح او خطا

هيا كبرت كتير في السن , وانا اتزوجت وسافرت بعثه مع زوجي ٣ سنين , خلال الفتره دي سبحان الله الكبر بان عليها كتييييير

كاانها كبرت فيها ١٠ سنين

وانا بصراحه كنت ندله يادوب اكلمها مره كل شهرين او ٣ شهور مع انها تفرح كتيييير لما اكلمها ودايما تقولي ان شاء الله مااموت الا لما اشوفك واشوف دريتك

المهم اني السنه دي لما خلاص رجعت السعوديه عرفت انها تقريبا خرفت , وما تعرف بعض الي حولها بس مايعدي يوم الا وتقول لكل الي في البيت جيبولي (ام اسامه) الي هيا انا 🙁

لدرجة انها مره مسكت اختي الكبيره وحلفتها واترجتها تجيبني لها عشان تشوفني

المهم اني رحت زرتها (هيا في مدينه تانيه غير الي انا اسكن فيها حاليا) المهم رحت زرتها وقبل ماادخل قالولي اهلي لاتستغربي

لو ماعرفتك لانها ماسارت تعرف كتير ناس من العيله لانها خرفت ولان نظرها مررره ضعيف

المهم دخلت وقلت السلام عليكم , والله مجرد ماسمعت صوتي فزت من سريرها وحظنتني كتير وجلست تبكييييي وتقول (دحين قرت عيني دحين قر قلبي الحمدلله اني شفتك قبل مااموت) وكل شويه تعيدها وتحضني

و والله اني من وقت مادخلت عندها لوقت ماخرجت وهيا عينها مااتشالت من عليا , حتى لما اقوم ابغى اسوي شي لولدي تخاف تقولي فين رايحه لاتغيبي عني ماصدقت اشوفك 🙁

بعد زيارتي لها بفتره بسيطه جدا اهلي قالولي سبحان الله عمتك كاانها كانت منتظرتك وخلاص اخدت الي كانت منتظرته , سارت ماتتكلم ولا تقدر تروح الحمام الله يعز القراء لحالها حتى الاكل لازم احد يااكلها

وامس وصلني خبر وفاتها الله يرحمها ويغفر لها ويسكن روحها الطيبه الجنه

الغريب في الموضوع ان الكل لما عرف خبر وفاتها كانو يبكوو حتى الصغار , الا انا عيني مانزلت ولا دمعه وحده !!

رغم اني مررره احبها وفضلها عليا من بعد الله كبييير

طبعا سافرت اشوفها قبل الدفن

اول مره في حياتي اشوف انسان ميت قدام عيني المنظر كان يخوف طبعا وفتحت وجهها وسلمت عليها اكتر من مره لكن برضي مابكيت

الكل يبكي الا انا

حاسه كااني مصدومه او مفجوعه مااعرف , رغم انها حرمه كبيره في السن ووفاتها كانت متوقعه لكني انصدمت

كنت اشوفهم يبكوو واغبطهم على نعمة البكا لاني مني قادره ابكي

شغالة عمتي الي هيا لسه مالها عندها الا اقل من سنه لقيناها لوحدها في السطوح وماسكه فستان عمتي تشمه وتبكي

وانا لا !!

شغالها اول مره شافتني امس في العزا ولما عرفت اسمي فرحت تقولي كان نفسي اشوفك من زمان لان عمتي كانت دايما تقولي وحشتني بنتي ام اسامه وتجلس تحكيها عليا

قالت لي كدا وعيونها كلها دموع , وانا عيني مافيها ولا دمعه وحده !!

في الليل بعد ماراحو المعزيين جاني اكتئاب فضيييييع اول مره احس فيه , اول مره احس اني ابغى ابكي ومني قادره

وحده ربتني وعاملتني زي بنتها المدلله وانا مجرد مااتزوجت ماسرت اكلمها الا فين وفين

شفتها وهيا مكفنه قدامي وخرجت جنازتها من البيت قدام عيني وانا مابكيت عليها ولا نزلت لي دمعه وحده

حاسه نفسي مخنوقه ومتضايقه من نفسي

اخواتي كل الي اطلبه منكم انكم تدعولها بالرحمه والمغفره , وتدعولي ان الله يسامحني لتقصيري في حقها

اللهم اني استودعك واستامنك عمتي عليا وروحها الطيبه , اللهم ابدلها دارا خيرا من دارها واهلا خيرا من اهلها