محمد وسعود وانا.!

اخواتي يعلم الله اني لم اكتب هنا الا من اجل اخذ المشوره منكم ومن اجل ان اغسل مابداخلى من هموم

اخواتي في تاريخ 10-3-1431 هجري توفى والدي رحمه الله عليه
طبعا قبل مايتوفي وبحكم اني البنت الاخيره اللى باقي بذمته وصاني على امور عده من ضمنها
طلب مني انه اذا تقدم لى ولد عمي واسمه محمد اني اقبل فيه وانه كان طول عمره يتمناه زوج لى بس انه ماخطب من ابوي وان ابوي ماقدر يقول له وهو على فراش المرض تزوج بنتي عشان مايرخصني وينزل من قيمتي
طبعا الفرق العمري كبير بيني وبينه
وايضا احس انه مو مناسب لى
ولكن ابوي كان يشكر فيه
ولكن كان فيه شي عجيب انه سبق ان خطب اكثر من مره والناس ترده لان امه وخواته قويات مره
وابوي وقت ماوصاني قعد يمدح فيه ويبين لى حسنات هالولد
طبعا وقتها انا كنت قاعده مع ابوي وكان اخوي وامي معنا
وقتها من قو الصدمه بكيت انا لاني ماتخيلت ابوي بيقول هالكلام بس اني ماقاطعته لاني ابيه يرتاح
يوم شافني اخوي قال يبه يمكن ماتبيه
قال اذا ماتبيه لاتزوجونها غصب وتراها امانه عندكم
–
بعدها بكم يوم توفى
–
ثم مرت فتره الحداد
وانا محتفظه بهالسر انا واخوي وامي لان ابوي طلب انه يكون امانه عشان مايرخصوني الناس ويقولن احنا ماتقدمنا الا عشان رغبه ابوك

–
بعدين جات عندنا بالبيت خاله الولد وهي تصير بنت عم ابوي
امي قعدت معها تسولف وشوي حكت لها وصيه ابوي
طبعا انا بغيت اموت من القهر لاني سمعت امي وهي تقول هالكلام لخاله الولد بدون ماتنتبه الى وجودي
يوم راحت خالته تخانقت مع امي قلت يمه هذا سر ومو من حقك تقولينه لاحد
وابوي وصى محد يعرف
الحين لو عرف بيجي يخطبني عشان وصيه ابوي مو عشاني انا

–
بعدها بفتره وتحديدا على نهايه شعبان خطبني شخص يقرب لى من يوم قالوا لى عنه ماارتحت ورفضته على طول
ووصل الكلام لمحمد
ولا تقدم ولا شي وهو عارف رغبه ابوي

بعد مارفضته وتقريبا على 4 رمضان كلمت بنت عمي اخت محمد تقول لامي نبي بنتك لمحمد وقلنا نكلمكم اول
قالت امي لها الخطبه من الرجال للرجال افضل وان شاء الله مايصير الا كل علم غانم هي بنتكم وهو ولدنا
وانا وقتها طرت من السعاده لاني توقعت انه تقدم من نفسه وقلت اكيد خالته ماقالت له
ويكفي ان ابوي اختاره لى ويكفي اني بحقق اخر امنيه لابوي
طبعا اخته ردت على امي وقالت
ان شاء الله بالعيد بنجي نخطب رسمي وتحديدا 2 يوم بالعيد
–
جاء اول يوم بالعيد كلم اخوي عمي اللى هو ابو محمد عشان يعايده
قال له عمي والله ياولدي كنا بنجيكم ولا الله قدر ولا نقدر ولا احنا بجاينكم
–
اخوي عشان لبق وماحب يحرج عمي حاول يغير السالفه قال احنا المفروض اللى نجيك
محاوله منه انه مايبين انه فاهم وش يقصد عمي لان الموقف صعب على كل الطرفين
رد عمي وقال لا انا كنت بجيكم بس مااقدر اجي ولا باجي
–
هنا حسيت انهم سحبوا

طبعا كان جرح كبير بالنسبه لى
حاولت اتصل في بنات عمي بحكم اني اسئل عنهم من فتره لفتره
كانوا يعاملوني رسمي ولا كاني بنت عمهم
بعدها سمعت ان البنات متكلمات بعد ماوصلت خالتهم الخبر لهم وبدون مايقولون لاخوهم واخوهم رافض الزواج مني
رفضني وجرحني

–
بعدها يابنات
تقدم لى شخص من العائله عمره مقارب لعمري ووضعه مقارب لوضعي وفعلا شاري
واستخرت الله وارتحت
وقلت لاخوي اني مرتاحه وراح اخوي ورد للمعرس الثاني خبر بالموافقه
–
من بكره تخيلوا وانا نايمه بنات عمي يتصلون على جوالى بالحاح بعد مالناس عرفوا اني وافقت على سعود
وهم لهم فتره مايكلموني وان كلمتهم كلموني بثقل
طبعا مارديت عليهم 😀
–
بالليل الا ابو محمد متصل على اخوي يقول ليه تزوج اختك لسعود وهي المفروض انها زوجه محمد بناءا على وصاه ابوك
تخيلووووووووووووووووووووووووووووووووووا الوضع اللى انحطيت فيه
قال اخوي والله ياعمي هو خطب مني وشاورت اختي ووافقت واعطيتهم كلمه
قال اسحب كلمتك منهم واختك بتتزوج ولدي حتي لو مايبي بس عشان امنيه اخوي
جاء اخوي يسال انتي موافقه على سعود ولا موافقه على محمد
–
قلت لا ابي سعود طبعا اخترته لارتياحي له ولني ماابي اجرحه وبعد ابي انسي جرح ولد عمي الاول وخصوصا انهم بيجبرونه على
راح وكلم عمي وقال له البنت ماتبي ولدك وتبي سعود
قال الله يوفقها وسكر بوجه اخوي
–
بعدين كلمتني اخت محمد
قالت ليه تعرسين وتخلين اخوي
قلت والله ونعم باخوك بس هو ماتقدم وانا اخوي شاورني وارتحت لسعود والله يرزق اخوك باللى افضل واخير مني
قالت لا نبيك انتي
قلت لو انتم متقدمين كان جدت بالامور امور
بس اخوي اعطي كلمه وصعب يسحبها وانا مرتاحه والحمد لله
وبس يابنات

——————–
طبعا انا من امس مانمت
لااسباب عده
1- قلت يمكن اني استعجلت فعلا
2- او اني ظلمت محمد معاي ويمكن كنت اخر فرصه له وخصوصا ان الناس يردونه اكثر من مره
3- قلت يمكن زعلت عمي
4- لو انا رفضت سعود بجرحه واحطمه
5- امي حسيت اني ماعاد اقدر اعطيها سر
6- ابوي تمنيت انه ماوصى
والله مدري وش اقول يابنات
بس حسيت ان فرحتي يتيمه مثلى 😆 hy:

————————–
تكفون ادعوا لى اذا ماعندكم شور لى