مرة زعلانة

السلام عليكم
بنات انا كرهت اهل زوجي بقوة خلاص ماعاد صرت اتحملهم
انا ولدت وجبت بنت ومن بعدها كرهتهم والسبب :
الحين بنتي يا عالم يا ناس توها مولودة لحمة ، يوم خرجت من المستشفى وجيت البيت لقيت اخوات زوجي ومعاهم بزارينهم وفي اخت زوجي صغيرة عمرها 6 سنوات توها اولى ابتدائي
المهم بزارين اخوات زوجي ( مو كلهم بعضهم) واخت زوجي المفعوصة غيرانيين من بنتي لأنها توها صغيره وحماتي تشيلها وتدلعها
صاروا يكرهوها ويعلقون عليها تعلقيات سخيفة ،وخصوصا اخت زوجي الصغيرة هذي بس تسب بنتي، ماعلى لسانها غير سب بنتي، يقولون مشوهه بسم الله علي بنتي ، ويقولون كلام وسخ عنها ما ابي اكتبه لأني ما ابي ابكي، طبعا هذا كله قدام اهل زوجي وهم ساكتين
بس انقهرت حيل على بنتي ، في البداية مشيتها ، وبعدين صرت اقولهم عيب ، بعدين لما شفتهم زودوها ، لدرجة يصحونها من النوم ، انا خلاص هجت عليهم سبيتهم وبغيت اضربهم
في ذي الساعة اهل زوجي زعلوا وتكلموا علي كلام وربي كبير مرة ، وتكلموا في اخلاقي وقالوا ما تحطين عقلك بعقل البزارين ومن هالكلام وشالوا عيالهم، يبغوني اسكت على قلة حيا عيالهم
بعدين هم ما يبغوني احط عقلي بعقل بزارين طيب ليش زعلوا على عيالهم لهالدرجة ، بدرجة تكلموا فيني ؟؟؟ والله حسيت في شي في قلوبهم مني ما ادري وشهو
ولا حتى قدروني وانا توني طالعة من الولادة وتعبانة وخياطة وحالة وعيالهم يجوون يتكلموا في بنتي غيرانيين منها ، والله بنات يتكلمون فيها كلام وصخ ، واهاليهم ساكتين
لا وبعد حماتي تقولي لالا ما قالوا كذا ، وانا والله شايفاهم بعيوني وهي تحلف تقول لا
كرهتهم ياناس وصرت ما اروح عندهم ، وقلت لحماتي معليش انا ماني جاية عندكم لأن بناتك اعتدوا علي بالكلام وهم شايفين عيالهم اشلون يتكملون في بنتي ويصحونها من النوم هذا وانا في بيتي يعملون فيها كذا اشلون لو جيت عندكم
وحماتي سكتت ، وبعد ما خرجت من النفاس تقولي تعالي وش فيك قاطعة وانا سكتت ، بس ما رحت عندهم ، بعدين صارت زعلانة مني
وش الحل ؟؟؟
انا ازعل على بنتي ، وكل الناس تزعل على عيالها ، الحين هم لما هاوشت عيالهم زعلوا ، طيب ليش انا ما ازعل على بنتي ؟؟؟ ولا حلال عليهم وحرام علي ؟؟
والحين بعد صاروا هم الكبار يعلقون في بنتي تعليقات سخيفة يقولون مشنجة ، اصلا كل المواليد يجوا ما يشدون انفسهم كنهم مشنجين مو بس بنتي ، بس احسهم من زمان يكرهوني والحين حطوا حرتهم في بنتي
وفي حاجة اخيرة مهمة : انا الاحظ بزارينهم يطاقون مع بعضهم كثير، البنات على الاولاد
وعندهم اكثر شي الاولاد يضربون البنات ضرب قوي والله ، والاهل يتفرجون ماشاءالله يقولون بزارين في بعض مالنا فيهم بكرة يكبرون
وشو ؟؟؟ حلوة ذي
الحين هم يبغوا بنتي عادي لا كبرت تنطق وتنسب واسكت واتفرج واقول عادي بزارين بكرة يكبرون
يعني بكرة بنتي تكبر على عقد نفسيه وتتربى على ضرب الاولاد لها ؟؟؟
حتى بدرجة حماتي تقول الولد هو اللي يعقل البنت ، وش التفكير الحجري ذا ؟؟
وين حنا فيه الولد يضرب البنت ويعقلها
صرت خايفة على بنتي منهم ، وربي لو واحد فيهم يفكر يمد يده لا اقطعها له
بس شسوي في اهل زوجي ؟؟ وهذولي البزارين اشلون اتعامل معهم ؟؟ وهل من حقي ما اجي بيتهم بسبب المشكلة اللي سببوها عيالهم بيننا ؟؟؟وهل انا غلطانة ؟
ساعدوني