عالم البنات النسائي كل ما يخص المرأة العربية من ازياء وجمال والحياة الزوجية والمطبخ
سلاااااااااام يا فراشاتي الغاليات
جاتني اليوم فكرة حلوة و قلت خليني أحطها عالمنتدى 😳
و هي أنو أي وحدة عندها فكرة مشروع تجاري ناجح و ما يحتاج رأسمال كبير تجي تكتبها هنا عشان الكل يستفيد و اللي تبغى تبدأ مشوارها تاخذ لها كم فكرة إيش رأيكم؟ 😥
رح أبدأ أنا و اللي تدخل تكمل أو تقول رأيها:
1- التصميم:
لو عندك موهبة تصميم سواء للمواقع و الإعلانات أو للأزياء أو للمجوهرات أو أي شيء فأنت معك مفتاح الثروة الماسي. التصميم أكثر شي مطلوب في العالم و ما يحتاج رأسمال و لا شهادة.. بس اعملي كم تصميم و اعرضيها على مدونتك أو سبيسك أو منتداك و شوفي كيف الخير رح ينزل عليك زي المطر
2- التنسيق:
وهو قريب من التصميم يحتاج موهبة. لو عندك فن و ذوق في تنسيق الحفلات أو ترتيب المناسبات أو الزهور أو تغليف الهدايا كمان هاذي مهنة مطلوبة بقوة و تكسب ذهب و ما تحتاج رأسمال كبير و لا شهادة
3- التعليم:
ما أقصد وظيفة في مدرسة، أقصد لو عندك أي شي تعرفيه و غيرك ممكن يحتاجه تقدري تعملي دورات أو تسجلي سي دي تعليمي و تبيعي من غير ما تحطي يدك على خدك و تستني الفرج من غيرك
5- الخياطة و الكوافيرة و الطبخ
طبعا معروفة. لو عندك هواية الخياطة أو الطبخ أو المكياج فأنت محظوظة. شوفي الخياطات و الكوافيرات ياخدوا بالآلاف في الفستان الواحد و العروس الواحدة.
6- التأليف:
لو عندك موهبة أدبية أو شعرية أو عندك خبرة في مجال معين أحسن ما تخليها مدفونة فيك خليها تشوف النور و الناس تستفيد منك و انت تستفيدي.
7- الترجمة:
لو ما لك في التأليف و عندك لغة أجنبية قوية اشتغلي مترجمة حرة، الترجمة مطلوبة بقوة في عصرنا عصر العولمة و خصوصا اللغة العربية عليها طلب كبير. أنا نفسي اشتغلت ترجمة حرة في فترة من الفترات بس دحين انشغلت. الترجمة الحرة أقصد غير الوظيفة في مكتب ترجمة أنا قاعدة أسرد لك المشاريع اللي ممكن تبدئي فيها من البيت بنفسك بدون رأسمال و بدون مساعدة من أحد. اعملي بحث على النت و شوفي كمية الطلب على الترجمة
8- السمسرة أو الدلالة
لو ما عندك خبرة في شي و لا شهادة و لا موهبة عندك إمكانية تشتغلي في الدلالة. يعني تجمعي إعلانات اللي طالبين مثلا عقار و اللي يبغوا يبيعوا و كذا تكسبي عمولتك.
9- المندوبية
لو ما عندك خبرة أو إمكانية في كل ما سبق مالك إلا تشوفي وحدة من الشركات الكثيرة اللي يوظفوا مندوبات بالبيت بنسبة و هكذا تبدئي مشروعك التجاري و تكوني زباين بدون ما تحتاجي رأسمال
10- اللي بعدي تكتبه
شوفي يا فراشة كيف أن عندك إمكانيات و خيارات كثيرة جدا عشان تبدئي حياتك و ما تستني مساعدة من أحد.. لا عاد و حدة تحط يدها على خدها و تشتكي البطالة و قلة الرزق 
يللا فراشاتي أستنى ردودكم الحلوة 
