عالم البنات النسائي كل ما يخص المرأة العربية من ازياء وجمال والحياة الزوجية والمطبخ
معليش العنوان طويل لكن المخرج عايز كيده 😆
تنويه 😆
انتشرت الحملات التوعويه على سطح الأرض ومن خلال الشبكة العنكبوتيه بشكل كبير في الأيام الاخيره مثل انتشار لوحات زين عالم جميل إنت الأزين في كل قرنه بالشارع .. على انتشار الحملات إلا ان تكريس حمله لتوعية الحريم من النادر مانشوفه وهذا مايجعل عدد الانتحاريات يزداد أكثر وأكثر ..! ومن هذا المنطلق راح ننطلق بحملة توعية خاصة بالحريم ومن نوع آخر برعايتنا ومعكم بس ياحلوين
،،،،
بعض الحريم عندهن ( عقده ) من التلفزيون .. حتى لو ماكانت هذه العقدة موجودة .. ممكن تجيك هالعقده بعد العرس .. وهذا حاصل كثير .. خاصة لمّا تجلس المره مع رجلها في الصالة.. وتب تسولف معه لكن هو معطيها الخامس ..! فاتح على قناة الاخباريه .. ومسوي نفسه ( هامور وهو حامور أصلاً ) متابع الاسهم.. وهو بالحقيقه خااااق مع المذيعة ويقول في نفسه إيه هذا الزين مهوب الخشبه اللي جنبي ..! <- من زينك انت وذبّتك عاد 😆 idea:
وإحنا نقول..اقسم بالله انتس جميلة وكيوت 😎 بس ترفقي بحالتس يا اختاه ، لاتطمسي مواطن الجمال لتتحولي من ( فتاة ) الى ( عصاة مكنسة متحركة ) نعنبوتس فشلتينا بين العربان ترى الدعوى مهيب تسذا .
سيّدتي.. بهالموضوع راح نقدّم لك كل النصايح الخاصه بجمالك “المخفي ” نعم المخفي ..! لاتوجد إمراه على سطح الارض قبيحه ..! كُل ماعليك سيدتي تطبيق هذه النصايح ومننا نبصم لك إنك راح تكونين أطلق من لميص وبليسا .
إذن إليكن بعض النصايح الفريده من نوعها <– الفضاوه لعبت بحسبتنا
(1)
وإنتِ في البيت توتس قايمه من النوم : 🙂 💡
محد يقدر يتوقع وش بيكون وضعه إذا قام من النوم من حيث ( الكشة ، السعبوله ، تنفخ العيون ولاتهون الأخلاق ) .. لا تخافي حواء بل بادري وبسرعه ( اي اطمري ) إلى اقرب مراية وهبطي كشتس .. نعم لبديها ورتبيها حفاظا على سلامة اللي حولتس عزيزتي :P:(
،،،،
(2)
المكياج وما أدراك مالمكياج ..!! 😥
عزيزتي حواء تعلمين جيدا انه لو تحبّين السماء و تلطّخين وجهتس من هالالوان منتيب قالبة باسكال مشعلاني فجأه سيدتي هذه أنتي فلا تراكمين طبقات الميك اب على وجهتس لتخفين ملامحتس ،، بل اكتفي بلمسات بسيطة ناعمة واتركي عنتس دمج الظلال ومطهن لين الاذن الله يصلحتس ➡
،،،،
(3)
رطبي جسمك 😆 hy:
عشان مايصير جلدتس تسنّه جلد عكرة الضب .. مهوب تدهنين بزيت عافيه ! دهّني جسمك بكريم مرطّب وعليك بمرطب جرجير مرتين على الاقل في اليوم .. بعد ما تخلصين من الكريم ضعيه في مكانه ولا تقربين لمّه إلا وقت التدّهن فقط .
تحذير .. لا تاكلين الكريم حتى لو صارت ثلاجتكم فااااضيه 😛
،،،،
(4)
براتمك ماتنشاف ..! معنا بنتشاف .. وزود عليها بتاخذين نشّاف 😛
بعض الحريم يحبون يخترعون باللي هو كل هذا عشان تصير أطلدز وحده ..بدون ما ياخذون في الإعتبار النتائج المترتبة على أفعالهن المتنيّله بستين نيله ..! بعضهن ماعندهن تكاليف العمليه عشان تصير براطمها اكس اكس لارج فتتهور وتمد هوز ( ليْ ) من غاز المطبخ لبرطمها وتنفخ لين معاد تفرقين هو وجهها من قدام وإلا من ورى .
كل ماعليك تجيبين قلم خطاط وتحددين حول الشفّه بمقدار نص سم .. بعدها جيبي الروج الأحمر أو البوردقاني أو أي لون المهم لا يصير بنّي محروقي وإلا لون من ألوان فيفي العبده وإبدأي بالمزج وبعدها راح تصبح عندك براطم كبار طبيبعه بدون أي غاز اصطناعي وبدون أي تكاليف .
،،،،
(5)
محد ركبته أحسن من أحد 😉
عزيزتي حواء السعوديه <- لاحظوا قلت سعوديه اهب على اللي في بالي ،، ركبتتس سودا ولانفع فيها كل الخلطات ..! مالتس إلا تستخدمين ( ليفة الموعين ) وتدعكينها خمس مرات يومياً بعدها ادهنيهن بفازلين عشان شسمه التشمخات اللي بتطلع بعدين .. (لاحد ياخذ بالنصيحه لاني كنت ثمله آن ذاك )
الجد عليتس بالهيلااااااهوب الشفاف تراه يزين الركب شعارنا هالمرّه .. محد ركبته أحسن من أحد 😆 🙂
،،،،
(6)
آآآآآآآآتشوووووووووو ….. قصري حستس جعل حستس للقص ..! 😡
كثير من الحريم يشتكون من أزواجهن .. تقول إحداهن .. انا لاجيت أعطس .. زوجي موب يقول يرحمك الله وكلام حلو .. ماتسمع إلا وجع قصري حستس جعل حستس للقص ..!
عزيزتي المطيوره .. لاجيتي تعطسين قصري صوتك قد ماتقدرين ولاتستلمين علبة المنديل وهاتك يامناشق تحوم التسبد
كوني راقيه وهاديه وناشقي بعيداً عن زوجك وأي شخص كان .. وصدقيني بعدها ماراح تسمعين كلمة وجع واخواتها ، بل راح تسمعين .. لبّا هالعطسه ! ❗
،،،،
(7)
إنّ الله جميل يحب الجمال وإحنا نقول لك ياسيّدتي كوني جميله ومرتبه في البيت وليس فقط في عرس بنت خالتكم ! ، نعم لاتقعدين بدرّاعه ومسويه تطقمين مع جدتك وتحتكين عشان شسمه <- ماودك تنصح أبد 😥
فيه بجامات حلوه بلاسينزا و نعومي و بومن سيكرت و اذا مستخسرينها على البيت فيه بطابا والهرم تجي طقم وبسعر حلو .. أعيد وأكرر طقم ..!
(8)
معذورة لو تكبّرت .. مغرورة يابخت الغرور 😆 idea:
انتبهي موب تصدقين ذا الحتسي .. ياما نشوف بنات بمجالس فاهمين البرستيج غلط ..! ولاجت تسولف ودّك تقولين لها يازينك ساكته ! 😛
جمالك وكشختك لن تكتمل من غير وجود روحك المرحه و الجميله ..!
وهذا مايجعلك جذابه في نظر الجميع حتى بنظر شغالتكم . ❗
،،،،
~ قبل لا أودعكم ترى منقوووووووووووول 😐
