مـــ هـــم / إعادة النبض لقسمنا .. !!

صباحكم / مساءكم .. سكر .. ونشاط
يا هلا بكل من نوّر موضوعي ، كيفكم وأخباركم إيييه؟!

من عنواننا يا حلوات تفهمون المغزى ، صح ؟ ^^
طيب ندخل في صلب الموضوع على طول..
زي ما احنا شايفين قسمنا ميت كلياً والمواضيع آخر واحد له أشهر أو أسابيع !!
خلونا نناقش أسباب هالخمول وليش صار قسمنا كذا بعدما كان مشرق ويضج بالنشاط..
طبعاً أنا رح أعرض الأسباب والمشاكل اللي شفتها وأدت إلى هذا الوضع المحزن..
ورح أعرض كمان حلول وكيف ممكن نتعاون عشان نسترجع منتدانا القديم تدريجياً..

يلا بسم الله!

أول سبب/
اللي أعتقد إنه أثر ع منتدانا هو المواقع الاجتماعية..
فيس بوك ، تويتر ، آسك .. وهالأشكال من المواقع =/
أعتقد إنها سلبت كثير من صديقاتنا ورفيقاتنا ، وخصوصاً محبات الأنمي..
لأن هالمواقع مليانة أوتاكو ومدمنين أنمي بالإضافة لسهولة التواصل وعدم ارتباطك بقوانين معينة!
أعترف إن هالمواقع سلبتني أيضاً لكني ما زلت متمسكة بالفراشة ، لأنه هو أول مكان تجمعت فيه بمحبات
الأنمي واللي يشاركوني اهتماماتي وصاروا من أغلى صديقاتي ولا يمكن استبداله!
أعتقد إن هالمواقع مو عذر مهما حدث ، نشوف مواقع ومنتديات أنمي عريقة وإلى الآن مستمرة ونشطة..
ليش احنا استسلمنا كذا؟
– أمنيتي أشوف صديقاتنا اللي كانوا هنا يرجعون ونتجمع مثل أول.. =_=

السبب الثاني/
تعطشنا للإعجاب والردود و و .. يعني.. عارفين صح ؟ وأنا أولكم هههههههه
للأسف احنا لما نحضر موضوع ونتعب فيه ونحطه في المنتدى ما نلاقي أي تفاعل أو ردود تبرد بالخاطر..
لذا يصيبنا الإحباط وبعده الخمول وعدم الرغبة بالعطاء لأننا ما وجدنا المقابل اللي يستحق العناء..
الحل برأيي ، وأتمنى يكون الكل مؤيد لي ومتعاون ولو لفترة التنشيط..
إننا نعمل المواضيع وننزلها بدون ما ننظر لأمر الردود والإعجابات..
رح نعطي بلا مقابل وفعلاً اللذة في العطاء ، وما تدرون لعل المقابل يأتي فيما بعد ونكسب نشاط منتدانا
بعد هالفترة الطويلة من السكون والغبار!!

سبب ثالث /
وهو أحد أهم وأكثر الأسباب ألماً !!
اللي هو تغيير ستايل المنتدى! ليش ليش ليييييييييش !؟؟
ليش يا مكتوب ؟ ليش يا ياهو ؟؟
تغيير الستايل كان ضد ذوق كثيرين من عضوات المنتدى..
والشي الأكثر إزعاجاً هو مسألة ربط الحسابات..
كثيرين فقدوا حساباتهم وحاولوا يسترجعوها والموقع ما تعاون معهم نهائياً..
كان أضعف الإيمان إنهم يصلحوا لهم حساباتهم ، لكن للأسف الآن الكل رحل وما بقى إلا عدد قليل لدرجة إنه يحصى على الأصابع =”(
وهالنقطة مع الأسف مالها أي حل غير من طرفنا يا عضوات بحيث نتأقلم ونتقبل الوضع..
~> وأغلبنا قدر يمشي نفسه والحمد لله..

* كيف ممكن نستعيد نشاط قسمنا ؟ سين وجيم كثيرة تهمكم خلونا نشوفها سوا ~

1- كيف أشارك بتنشيط القسم؟

ببساطة يا عزيزاتي ، نكتب مواضيع!
سواء تقارير أو غيرها لكن ما نطلع عن مجال الأنمي ، ومواضيع مو أي مواضيع..
أكيد بنتعب فيها لأن مافي شي جميل من دون تعب ، بس لعيون الفراشة أنمي بنجتهد!

2- تمام! يعني أجيب أي موضوع عن الأنمي والكرتون؟

لا طبعاً يا غاليات! مو (أي) موضوع كذا أجيبه!
رجاااااءاً الالتزااام بالقوانين!
يا ناس تعبت وأنا أقول اقرأوا قوانين القسم!
أنا أشوف مواضيع تنزل مؤخراً لكن معظمها منقولة وموجودة في منتديات أخرى
وهذا شي تم التأكد منه وبالتالي أضطر أغلقها..
بصراحة للأسف لما أشوف موضوع منقول هذا يسبب لي إحراج، لأني عارفة إن قسمي يحتاج مواضيع وتنشيط..
لكن؟؟ منقول؟ يعني مخالف! يعني لازم أنفذ دوري كمشرفة وأتخذ معاه الإجراء اللازم.. وهذه أمانة في شغلي زي ما تعرفون!
لذا أتمنى أي وحدة تحط موضوع ما تحرجني ولا تحرج نفسها وخلونا نطلع إبداعاتنا !

3- أوكي كتبنا مواضيع ونزلناها والتزمنا بقوانين المنتدى ، فين الردود على تعبي يا حبيبي؟

أكيد كلنا رح ننتظر ناس تقدر تعبنا ، لكن هالمرة خلونا نتغاضى عن الأمر..
ما رح ننتظر الردود ، إن أتت كان بها وإن ظل الموضوع مهجور فعادي جداً!
أنا عن نفسي رح أحاول بكل جهدي أرد وأقيمكم واللي يفرحكم باسويه ^^ ~

4- طيب عندي قدرة أعمل مواضيع وأكتب بس ما أعرف أضبطه بفواصل وكذا ! إيش الحل؟

عندنا موضوع خاص بالتصاميم ومثبت يعني أي شي تحتاجونه من تصاميم وغيره بإمكانكم إدراج طلبكم هناك
واحنا .. (أو أنا بالأصح -_-) تحت أمركم ^^

5- ممكن تعطيني أفكار لمواضيع أنمي ؟ مخي فاضي! xD

أوكي يا عسولات المواضيع كثيرة، وأعتقد أغلبها تم ذكره في موضوع القوانين..
عندك التقارير (شعبيتها كثير والناس تحب التقارير) ، عندك مواضيع الصور لو عندك مجموعة صور كبيرة ممكن تحطينها في ملفات مضغوطة وتنزليها..
بإمكانك تأليف قصة على شرط الالتزام بالقوانين الموجودة، وكذلك عمل المسابقات..
وأي أفكار حلوة عندك ما نقول لها لا طبعاً ^^

6- أبغى أسوي تقرير بس ما أعرف كيف..!
أي تقرير ناجح لابد فيه من عناصر أساسية ، ويزداد جمالاً بإضافة عناصر ثانوية..

العناصر الأساسية:
– مقدمة
أي موضوع لازم له مقدمة وكلنا نسويها بشكل عفوي =)
– معلومات عن الأنمي
معلوماته العامة زي الاسم وسنة الإنتاج والأستديو وهكذا.
– القصة
لازم تكتبي لمحة عن قصة الأنمي، لاحظي قلت (لمحة)! تكلمي باختصار يعني عن إيش أحداث الأنمي؟ وخليها بأسلوب تشويق يشعل فضول الشخص عشان يتابع!
واحذري من رواية قصة الأنمي كاملة لأنها تعتبر حرق عالمشاهد وهذي نقطة مو في صالحك! وكثير تفشل تقاريرهم بسبب هالشي!!
– الشخصيات
ما يكون التقرير تقرير إلا بوجود معلومات عن الشخصيات!
هنا كمان لازم تراعين الاختصار وعدم الحرق، هي كذا الناس تحب تتشوق وتتحمس مع الأحداث ما تكون عارفة إيش بيصير ومين بيموت ومين بيبقى حي !!xD
– روابط الحلقات
مهم جداً تحطي الروابط، إذا الموضوع ما بيعطيك مصدر لمشاهدة الأنمي فإيش فايدته؟
صحيح تهمني المعلومات لكن تهمني الروابط أكثر =]]
طبعاً لازم تنتبهين لحفظ الحقوق، إذا كنتي نقلتي روابط من منتدى ثاني لازم تذكرين
حقوق المترجمين ورافعي الحلقات، هذا تعبهم ولازم نقدرهم عليه.
– خاتمة
مثل المقدمة يعتبر شي عفوي والكل يكتبه..

عناصر ثانوية ترفع من مستوى تقريرك:
– صور ورمزيات للتحميل ،
إذا لقيتي مجموعة صور حلوة حطيها بملف مضغوط وارفعيها..
كثير ناس يحبوا يجمعوا صور سواءً للتصميم أو يستخدموها للبروفايلات والواتس وكذا..
– تقييمك للأنمي
البعض يحب يشوف آراء الناس وبعضهم يحكم عالأنمي من شعبيته وشهرته ومحبة الناس له..
لما إنتِ بتمدحي الأنمي اللي كتبتي عنه تقريرك ممكن تزيدي من حماس المتابع إنه يحمله ويشوف ^^

طبعاً هذي أشياء بسيطة جداً اللي ذكرتها هنا ،
والدافع الوحيد هو أملي بأن القسم ينشط مرة ثانية زي زمان وأحسن..
لذا ما زال هناك تفاصيل أكثر وكيف تخلون موضوعكم مميز.. بإمكانكم زيارة الرابط التالي:

http://satfrequencies.com/girls/alfrasha77/thread1418052/

اممممم أعتقد هذا كل اللي عندي وهذي أغلب الأسئلة اللي ممكن تحيرنا..
بس أي شي تحتاجون مساعدة فيه أو أي سؤال أو محتارين بحاجة لا تخجلون..
أنا موجودة وهذا واجبي، وكلنا نبغى نرتقي بقسمنا.. ^^
هذا كل شي اليوم ويا رب أشوف نتيجة ابتداءاً من هالأسبوع.. وأنا معكم بإذن الله..
طبعاً لو شفتوا أي تقصير مني فسامحوووووني ..

وووو سلامتكم ..~ ^^