من منكن تستطيع ان تطفئ ناري ولو بكلمة

بسم الله الرحمن الرحيم
حاسه الدنيا ضايقه فيني , واحب واعز انسان اصبح اليوم اكره انسان على قلبي . من المغرب وضغطي مرتفع ومصدعه وابغى احد اشتكي له ماني لاقيه .. مافيه الا انتم اخواتي
اكتب لكم وانا ابكي .. الله يوفقكم بردو نار صدري بأي شي ..لاتتركوني لهمي .
زوجي كان متزوج قبل مايتقدم لي وعنده ولد ولما طلبني رفضته نهائي لأني مااقدر اعيش وفي بحياتي )مو حياته هو ( امرأه ثانيه .
لاكن سوى المستحيل واقنعني انه اساساً ملتزوجها برغبته انما برغبة والده ـ وهذا صحيح ـ استخرت ووافقت وانا خايفة . المهم امضيت الآن من زواجي اربع سنوات اصبح بيننا ولد .. سمعت اشاعات كثير مثل انه يروح لها او يسهر عندها وكل مره كان يكذب هالكلام وان مافي بينه وبينها الا الولد ويسبها ويشتمها ويطلع فيها عيوب الدنيا ويقول انها تطلع هالإشاعات عشان تخرب بيننا, وكنت اقتنع مو سذاجة او غباء لاكن لأن ماعندي دليل أكيد , انما كان كلام اسمعه وبصراحه كنت أخاف لأن الكلام مو مره ولامرتين يعني بشكل دائم ومستمر .
اليوم اتصلت الهانم في جواله وهو يتحمم .. وانا عمري مافتحته لأنه مسوي له قفل . لاكن رد ابني الصغير وطلع اخوه وجلس يكلمه وقفلها .. ورجع اخوه يتصل ولما قربت من الجوال لقيته مسميها في جواله )منااااي(وهي اسمها منى مدلعها يعني.
انصدمت ولمحت له بدون عصبيه لاكن بتريقه عشان مايحس اني غيرانه علية , لاكن خلالالالالالاص احس اني كرهته تأكدت انه كان مستغفلني كل هالسنين . لاوانا اللي كنت متفقه معاه الصبح اروح اسحب له قرض عشان يسد ديونه . عشان كذا كان يسايرني ويخبي عني عشان فلوسي لأني عمري ماوفرت عليه حاجة اول مايطلبني اعطية .
اش رايكم ! كيف راح اتعامل معاه ؟ وكيف اطفي ناري ؟ الله يرزقها ويسعدها اللي توقف معي بمصيبتي .