عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته..
اخواتي عضوات المنتدى انا انسانه اكررره المقدمات عشان كدا راح ابدأ على طول بموضوعي وهو كالآتي..
عندي بنت عمرها 7 شهور ونصف الله يحميها ويخليها ويقر عيني بصلاحها ويقر اعينكم بصلاح ذرياتكم يارب العالمين,هذي البنت.. شيبتني وتعبتني وجننتني وعلى قول البعض طلعتلي قرون. من اول يوم جبتها فيه جابولي هيا في المستشفى طليت فيها وضميتها واعطيتها صدري بعدت راسها وطلعت لسانها ووجهها اتقرف قلت خلاص شكلهم رضعوها وشبعانه رجعتلهم هي تاني يوم اتكرر نفس الشيء تالت يوم رابع يوم خامس يوم رجعت البيت ومافي احد يرضعها لكن على نفس الحال كملت شهر وهي تتقرف كل مااعطيتها صدري والمشكله والمصيبه مو بس تتقرف من صدري حتى الرضااااعه اللي كل الاطفال يحبوها تسوي معاها نفس الحركه وتقرف واذا غصبتها تبكي لكن انا جلست وراها وراها لحد ماتكمل رضعتها بالقوه وبالغصيبه احضنها وامسك اياديها واضغط على راسها عشان لاتلفه واخليها تكمل رضعتها بالغصيبه والله والله جلست على هذا الحال 6 شهور لكن طبعا كل مابتكبر مكرها يكبر معاها وتزيد تصر ماترضع وتتحرك يمين وشمال وتبكي بصوتها وتدف رضعتها باياديها واذا لزم الامر عندها تستفررررغ كل اللي غصبتها عليه انا خلاااص وصلت لمرحله تعبت وبكيت حزن على بنتي خفت تموت من ضعفها وصغر حجمها احيان يعدي عليها اليوم كامل والله مافي في بطنها الا رضعه او نص رضعه وبالقوه وفوق فقدان شهيتها هذا كانت تستفرغ كثييييييييير يعني ارضعها وتفضل تقلس تقلس على دفعات لمدة ساعه تقريبا ايش بقي في معدتها الللللللله اعلم.. المهم صارت نفسيتي زي الزفت واعتزلت الطلعات من البيت عشان اتفرغلها وابكي ليل نهار عليها وماتركت طبيب ولا تركت عياده الا ورحتلها وزوجي رااااااااااافض اجيب لها فاتح شهية لانه سمع لو الطفل اتعود على فواتح الشهية يصير ماياكل ابدا الا بيه المهم جا يوم ونصحتني ام زوجي اروح لطبيب معين وقالتلي انه ممتاز وكان زوجي وهو صغير يروح يتعالج عنده المهم ماصدقت خبر وشلت بنتي ورحنا دخلت رجال كبير في السن مصري وشكله مريح والله ترتاحي لشكله ولكلامه وهدوءه المهم كشف على بنتي وطمني واعطاني طريقه والللله ادعيله اللى الان اعطاني جدول وفيه تعديل شخصي مني جربته على بنتي وبعد اذن ربي بنتي انعدلت شهيتها وهو كالآتي:
اول نقطه غير حليبــــــــها الى حليب رونالاك..ثاني نقطه قال الطفل في سن 6 شهور ومافوق يحتاج اقل شي الى 7 وجبات في اليوم 3 منها طعام و4 منها حليب او العكس..
بالنسبه للطعام:
وقت الوجبه:عند استيقاظ الطفل صباحا ** الكميه:ربع كوب او اقل ** الماده:فواكه مطحونه
وقت الوجبه:اذان العصر ** الكميه:ربع كوب او اقل ** الماده:خضار مطحونه
وقت الوجبه:بعد العشاء ** الكميه:ربع كوب او اقل ** لبن زبادي او سيريلاك بمنقوع التمر
__________________________________________________ _________
بالنسبه للرضعات:
رضعه 120 مل على 4 ملاعق حليب رضعه عند نوم الطفل ورضعتين اثناء نومه يعني وحده وقت ماقيدها بتنام انومها عليها وارجع ارضعها بعدها ب3 او 4 ساعات ووحده ع الفجر ..
__________________________________________________ _________
طبعا اذا قدرتي تغيري شي للافضل او تعملي اكله تشوفيها افود لطفلك اوا اذا قدرتي تزيدي الكميه او عدد الرضعات مايمنع ابدا,,بالعكس افضل هذا الجدول اقل كميه وقدر ممكن يحصل عليه الطفل في هذا السن واول ماتحسي بتقبله له لاااازم تزيديه شويا شويا تزيدي كمية الوجبات وعدد الرضعات وتحاولي توصلي الرضعه ل150 مل على 5 ملاعق وتستغلي فترات قيلولته وتعطيه رضعه فيها المهم قالي الدكتور اهم حاجه تحاول قدر الامكان ماتخلي معدتها فاااضيه اكثر من ساعتين حتى لو بس ملعقه وحده سيريلاك المهم ماتفضى معدتها ابدا لان هذه الطريقه توسع معدتها شويا وشويا وتخليها تحس بالجوع…
واولا وخيرا الفضل مايرجع للطبيب الفضل والمنه يرجع لرب العباد,انا ايقنت وآمنت واتأكده انه والله مهما رحت للاطباء وللمستشفيات في النهايه هم بشر ماراح يشفولي بنتي والله مايشفيها الا اللي خلقها رب العباد وحده اتوجهت له بقلب صادق والله نومت بنتي واتوضيت واتوجهت للقبله بوخشوع بكيبت بكيبت بكيت ودعيت ربي شفيها ويفتح شهيتها وجبت كاسه صغيره حطيت ربعها ماء زمزم وملعقه صغيييره عسل ومزجتهم ببعض وجبت آيات الرقيا بالعسل وآيات الرقيه الشامله من النت وادعية الرقيا وكان عندي كتيب راائع اسمه *ارقي نفسك واهلك بنفسك* قريت كل اللي اقدر عليه ونفثت في الكاسه ودعيت ربي ان يكتبلها الشفاء فيه وسرت اعطيها منه كل يوم ملعقتين في الصباح على الريق وفي المساء قبل النوم نقط بفمها فقط والله والله واللللللللله ان بنتي اتحسنت كثييييييير ووزنها تعدل وطلعتلها اسنان والحمدلله عظامها اتحسنت وسارت تجلس بالمسانده اللهم لك الحمد والمنه والله مااحد راح يحس بيكي الا هو…
بس انا ابغى اطلب منكم طلب وبالله عليكم لاتزعلو مني والله يااخوات العين حق وانا ممكن اكون بأحسد بنتي بكلامي هذا بس اطلب منكم تذكرو الله وتقولو *ماشاء الله تبارك الله* الله يسعدكم عشان خاطري ربي عالم كيف تعبت عشان وصلت للمرحله هذه واتمنى ربي يباركلي فيها ومايروح تعبي هباء .. ويعلم رب العباد مانزلت موضوعي الا لحبي لكم ولاني متأكده ان فيه امهات كثير تعبو مع اطفالهم زيي وحبيت افيدهم لوجه الله تعالى…
تحياتي لكم…
