موقف لا أُحسد عليه & كيف نحمي اطفالنا من عمليات الأختطاف؟؟

السلام عليكم ورحمة الله وبركاته
اسعد الله جميع اوقاتكن بالخيرات

اليوم راح احكي لكم اصعب موقف مر علي في حياتي ..
قبل اربع او خمس شهور الى يومي هذا إذا ذكرته أحس قلبي بيوقف .. وابكي غصب عني ..
بأكتب لكم موقفي لننتبه اكثر لفلذات اكبادنا حفظهم الله ورعاهم ..

بعد ان انجبت طفلتي الثانيه .. اصبحت لا احب الذهاب الى السوق مع اهلي كعادتي حتى انني نسيت متى اخر مره ذهبت معهم بسبب طفلتي حفظها الله ففي صغرها كانت ترفض البقاء في العربيه.. فاضطر الى حملها ..وعندما اصبحت تمشي ترفض البقاء في سيارات الاطفال او ان يمسك احدنا بيدها وتريد ان تذهب كما تشاء ..
وبذلك اصبحت لا أذهب الا مع زوجي .. لأنها تستمع اليه وتلتزم بأمره ..
وبصراحه مع زوجي لا احمل هم ولدي وبنتي فهو إما يمسكهم بايديهم اويركبهم سيارات الاطفال .. وانا اتسوق كيفما اريد ..
ولكن .. اضطريت في إحدى الايام للذهاب الى السوق ولانشغال زوجي طلبت من اخي ان يذهب بي الى السوق ..
وبالفعل ذهبت انا وهو وطفلاي وبما انهم يمونون على خالهم ومايحب يزعلهم استطاعوا اقناعه بعدم الركوب في السيارات بالرغم من اصراري ..
وقالي لاتشيلين هم انا بانتبه لهم .. وبديت اتسوق ومن محل الى اخر حتى دخلت محل اعجبتني البضاعه وانا جالسه اقلب بين القطع حسيت هدوووووووووووووء تام خفت والتفت مافي احد بالمحل الا انا ..
خفت وطلعت بسرعه من المحل والقى اخوي وولدي والعاملين في المحل اللي كنت فيه وبعض المحلات الاخرى مجتمعين عند المحل المجاور ..رحت لاخوي وسألته وش فيه قال التماس في المحل قلت وين ولدي وبنتي قال شوفيهم معي قلت له وين معك ما اشوف الا الولد قال اهدي اهدي اكيد دخلت المحل ويشيل الولد ويدخل المحل وانا رجعت للمحل اللي كنت فيه فاضي تماما خفت يكون احد العاملين دخلها في المخزن الخلفي للمحل دخلت مالقيت احد رجعت زي المجنونه واخوي يسأل الرجال وانا احس اني خلاص بنهار وادعي يارب لا تحرمني منها يارب تحفظها لي يارب يارب
شافني عامل من المحلات اللي دخلتها قبل وفهم اني ادور على بنتي قال شوفيها راحت من هناك واروح مسرعه ابي الحق عليها لاتطلع من البوابه الا حرمه ماسكتها بيدها ونازله على الدور الارضي هنا انجنيت خفت الحرمه تاخذها ولا الحق عليها والناس قدامي كثير وبنتي مو عاداتها تمشي مع احد ماتحب احد يمسك يدها ..واللي ماتعرفه ماتعطيه وجه
وقامت الافكار تلف وتدور في راسي لايكون الحرمه سوت لها شيء..
ما حسيت بنفسي الا انا اركض جهتها وانزل مع السلم الكهربائي ركض وهي كانت بأسفله والبوابه قدامها ..
واصيح عليها اعطيني بنتي قالت : لا ما أعطيك اياها ..
وبنتي تناظر فيني عادي توقعتها إذا شافتني بتركض لي بتبكي شيء لا عادي مسكت يد بنتي اسحبها واقول هاذي بنتي اعطيني اياها قالت لا انا بأسلمها للامن وانتي خذيها منهم اخذت بنتي من يدها وقلت لها بنتي وش فيك انتي
وقتها قالت لي اتقي الله فيها كيف تخلين بنتك لحالها وتبعدين عنها
قلت انا ما تركتها لحالها كانت مع خالها وفجأه اختفت من عنده
قالت اذا ما تقدري تنتبهي لها خليها في البيت ..
وراحت ..
هنا خلاص رجولي ماعاد تشيلي وقمت ارتجف وابكي واحضن بنتي مو مصدقه انها كانت بتضييع مني ..
واناظر في الحرمه ادعي لها ان كانت صادقه انها كانت بتوديها للامن مو قصدها شيء ثاني ..
واخوي فوق انجن يدور عليها وولدي ياقلبي عليه يبكي على اخته
ما أدري كيف تذكرتهم ودقيت على اخوي وطلعت من السوق
جلست كم يوم ماني قادره انام واتخيل كيف راح يكون حالي لو بنتي ضاعت مني
تذكرت ابتهال المطيري وغيرها من الاطفال اللي انخطفوا ومالهم اثر ..
يارب ترحم حال امهاتهم واهاليهم وتسترهم في الدنيا والاخره

بصراحه كان موقف لا أحسد عليه موقف من اصعب مواقف حياتي ..

كيف نحمي اطفالنا من عمليات الاختطاف ؟؟

لما اتذكر الموقف اتذكر لما سمعت الشيخ عادل المقبل في برنامج رأت عيني ..
يقول :
عودوا ابنائكم على دعاء الخروج من المنزل :
عنْ أنسٍ رضيَ اللَّهُ عنه قال : قال : رسولُ اللَّهِ صَلّى اللهُ عَلَيْهِ وسَلَّم : « مَنْ قَالَ يعنِي إذا خَرَج مِنْ بيْتِهِ : بِسْم اللَّهِ توكَّلْتُ عَلَى اللَّهِ ، ولا حوْلَ ولا قُوةَ إلاَّ بِاللَّهِ ، يقالُ لهُ هُديتَ وَكُفِيت ووُقِيتَ ، وتنحَّى عنه الشَّيْطَانُ »
يقول الشيخ من قالها عند خروجه مؤمنا بما ورد في الحديث كفاه الله كل شر ووقاه وابتعد عنه الشيطان .. وقد اطلق الرسول صلى الله عليه وسلم قوله كفيت ووقيت ولم يحدد بشيء فدل على كل الشرور من سحر وحسد وعين ورفقاء سوء وغيره..

بعد سماعي لكلام الشيخ وكان وقتها عمر الولد اربع سنين والبنت سنتين حفظتهم الدعاء ليحفظهم ربي من كل مكروه ..
وعودتهم ما يخرجون من البيت الا يقولون الدعاء .. وعلمتهم ان اللي يقول هالدعاء ربي يحفظه ويحميه ..
وبالفعل ماشاء الله ما يطلعوا مع باب الشقه الايقولوا هالدعاء
ولما نخرج او يخرجوا مع ابوهم اقول ((استودعتكم الله الذي لاتضيع ودائعه )) و (( استحفظتكم الله وهو خير الحافظين ))..
واحرص ما استطعت على تحصينهم بالرقيه الشرعيه ..
وانا كلي يقين بأن الله سيحفظهم لي ويحميهم بحصن منيع ما دمت ارقيهم وادعوا لهم ..

ايضا علينا بالإضافه الى التحصين والدعاء أن ننبه اطفالنا أن لايذهبوا مع اي أحد غير الوالدين والاقارب.. مهما كانت الاسباب .. ونخبرهم بأن هناك من يخدع الاطفال ويدعي انه صديق الاب او يريد اعطاءه شيء ثم يسرقهم ..<< مع عدم التوسع في ماقد يحدث حتى لا يصاب الطفل بخوف او قلق ..
وأن لا يستسلموا لمن يأخذهم بالقوه..
كذلك تعليمهم رياضات الدفاع عن النفس كالكاراتيه وغيرها فهي تقوي ثقة الطفل بنفسه بالإضافه الى تقوية بدنه..
ايضا نعلمهم انه في حال لاقدر الله ابتعد عن الابوين ان لايطلب المساعده من اي احد بل يلجأ الى رجل الشرطه او الامن ..ونعلمهم حفظ اسماءهم كامله اسمه واسم ابيه وعائلته ..

اسأل الله أن يحفظ بناتنا وأولادنا من كل مكروه .. وأن يحفظهم من بين ايديهم ومن خلفهم وعن ايمانهم وعن شمائلهم ..
وأن يكفينا الشرور ماظهر منها ومابطن ..