هل الزواج هوا الحل لكل مشاكل البنت؟

السلام عليكم..
ما ادري ايش اكتب او ايش اقول لكن حسيت نفسي مهمومه و نفسي افضفض و يا ريت الاقي عندكم الحل او على الأقل شاركوني همي..
انا عمري 22 سنه اتخرجت السنه الى فاتت من الجامعه لأني داخله قبل سني المدرسه , و الحمدلله على قدر من الجمال و الكل بيشهد …(مادح نفسه يبيله رفسه 😆 idea:)
و الحمدلله انا مره مبسوطه في بيت اهلي و كل شي تمام علما انو انا كنت البنت الوحيده بين 3 اولاد الين ماجات اختي الصغيره قبل 5 سنين..
ماعلينا..
مشكلتي بدات من سنه و قاتلتني و كل يوم عن يوم بيزيد همي من اقرب الناس ليا و هما اهلي..
يعني انا اتخرجت من الجامعه و كنت بانيه احلام في راسي ايش حشتغل و ايش حسوي.. لكن مرت سنه من اسوء السنين في حياتي و املي في الله كبير انو راح تنفرج انشالله..
انصدمت بالمجتمع و في الناس و عيونهم و انصدمت من اهلي و اقرب الناس ليا..
طبعا السنه الى فاتت 3 او 4 من بنات العيله اتزوجوا الله يسعدهم و يتمم عليهم.. 3 اكبر مني ب 4 سنين و وحده اصغر مني ب سنتين,,,
و من بعدها بدأت عيون الناس تجي عليا .. متى حتتزوجي؟ ما انخطبتي؟ شكلك حتعنسي..
ناس بيقواوا مزح و اسمعي يا جاره و ناس بيتكلموا جد..
اهلي كل يوم يرموا كلام .. متى حتتزوجي؟ متى حتروحي بيت زوجك؟ انتي شكلك حطولي معانا..
علما انو جوني 3 خطاب السنه الى فاتت بس لاكن الرفض كان من اهلي..
طيب ليش بتحسسوني بالعار؟ ليش بتحسسوني انو الزواج هوا العصمه من الخطأ؟ ليش بيحسسوني انو البنت بس تتخرج من الجامعه تكون زي الهم على قلب اهلها! يستنوا اللحظه الى فيها تطلع فيها من بيتهم..
يعني لو انتي بنت و روحتي بيت صحبتك و رجعتي متأخر الويل ليكي ! و انتي بنت مو محترمه!
لكن لو انتي متزوجه و رجعتي انشالله 5 الفجر عادي مافي مشاكل..
تعرفوا انا متخرجه بتقدير ممتاز لكن يا ريتني مادرست جامعه و لا اتخرجت..
لأني قاعده سنه في البيت الشغل ممنوع! ليش؟ لأنو حيأثر على فرص الزواج لول..
يعني الزواج هوا الباسبورت الى يسمحلك تعملي كل حاجه في..
يعني هادا الكلام و انا عمري 22 سنه طيب لو الله ما كتبلي زواج و صار عمري 30 ايش حيعملوا اهلي؟ حيرموني؟ حيقتلوني لاني جبتلهم العار..
ساعات ادعي اقول يارب ارزقني الزوج الصالح عاجل غير اجل بس عشين اهلي يرتاحوا و استغفر الله بعدها حتى ما اوريهم وجهي..
انا عارفه اني طولت عليكم.. بس ساعدوني برأيكم ايش اسوي؟ و اذا في احد نفس حالتي يشاركني همي……