عالم البنات النسائي كل ما يخص المرأة العربية من ازياء وجمال والحياة الزوجية والمطبخ
سلامٌ عناق الوردَ إليكم
…
كيف الحال يابنات ؟
ان شاءالله بخير
…………
أنا بنت عمري 16 سنه في ثاني ثانوي
بس مشكلتي مو عارفه احقق ذاتي……..
ودي اكون دكتورة اسنان بس الظروف الي اتعرض لها تأثر عليي وتخلي ماعرف ادرس تمام ولا اقدر انظم وقتي
يعني أنا ارجع من المدرسه 12 ونص اصلي واتغدى واذاكر حق كورس انجليزي للمحادثه
انا مسجله فيه عشان اقوي الإنجليزيه .. لانه مثل ماتعرفو الي يبي طب لازم يكون عنده لغه
المهم ..اذاكر و بسرررعه تجي 3 واروح للكورس وارجع 5 العصر اجلس اذاكر
واني فاتحه التلفزيون بس والله مو كل شيء اشاهده
واغلب الاوقات مسكره الصوت واهلي داايم يقولو لي انتي ماتذاكري وكله تشاهدي
والله انا اذاكر بس ماعرف اركز من الفوضى الي عارمه حياتي نفسيا ومن حولي
وماتجي 11 الا وانا هلكاانه وانام
وهذا روتيني اليومي الممل الي ماقدر حتى امارس هواياتي فيه ولا اتنفس
وثانيا ..
احس كل وحده من صديقاتي احلامها ضاعت
انا ولله الحمد تعرفت عن طريق النت على صديقات اغلى مايكون اهم من اشكي لهم
ويخففو عني ومن نفس منطقتي والتقينا وطلعنا نسايب من بعيد بعد
بس وحده منا اللعام مخلصه ثانويه عامه وجابت ماشاءالله عليها نسبه 98.8 %
وكان طموحها الطب وممتازه وتمام
بس جاها الخبر الي غير حياتها انها مانقبلت في جامعة الملك فيصل !!
وبعدين سجلت بالبعثات ولا انقبلت لا اهي ولا صديقتها وجايبين نفس النسبه تقريبا 98.6 %
والله مرينا بظروف جدا صعبه بالإجازه حالتها النفسيه كانت سيئه وهذا الشيء اثر فينا وصرنا مثلها والله مانتحمل اي كلمه
بس مع ذلك تخطت هالشيء
ودخلوها كليه الدمام تدرس حاسب ” هذا قدرها يعني تعبت وشقيت وحلمها ماقدرت تحققه “
وتغيرت لكن ماصارت تهتم بدراستها هاذي وتقول انها بتطلع وبتسجل بالرياض ” تتحمل الغربه ولا انها تقعد في الكليه
…………..
الثانيه في ثالث ثانوي كانت متفائله وحبابه ولحين بس كاره حياتها
اهي انخطبت ووفاقت بس المشكله طلع خطيبها مو متفهم ولا يحترم رايها كل شيء اهو يسويه بدون مايستشيرها …وكذب في كم شيء
كلمت اهلها ودايم يقولو لها انتي صار في عقلك شيء .!!
ولا يقولو لها مو حلوه تقعدي كدى بعد فاسخه الخطوبه
والله شفيها ؟؟؟؟ بنت حلوه وبعدها لسى صغيره والف من يتمناها
حاليا اهي فاقده الأمل وماتكلم احد بالبيت ومهمومه واهملت دراستها وهي من البنات الممتازات
ونسبتها كدى بتقل وماتقدر تدخل القسم الي تبيه .. واحس حرام تضيع مستقبلها بهالشكل
لكن فعلا الهم والحزن يأثر
………….
وغيرها وغيرها .. ماحد ماعنده هموم بهاالدنيا ..
ثالثاً :مشكلتي الي حاسه اني بختنق منها ..ابكي كل يوم عبى حالي
أنا لما كنت بمتوسط وبإبتدائي كنت بنت حبوبه واسولف مع الكل مع اني هادئه بس مع بنات الفصل مرحه واتعرف على صديقات واجد
جيت ثانوي وصرت انطوائيه !!
ماتعرفت على صديقات جدد ولا اسولف مع بنات الفصل
تعبت والله تعبت أنا مو من هالنوع ولا احب ابقى وحيده
احب اسولف واطلع واضحك وأمزح معاهم .. بس مادري وش الي يمنعني
كنت اقول من البنات مو تمام
بس احين وبعد سنه ونص معاهم احسهم بالعكس مرررررررره تمام ومزوحين وخفيفين دم
بس انا العله فيني مادري ليش مو قادره انسجم معاهم وأكون صداقات
قكرت اكثر من مره انقل من المدرسه واغير هالشيء
بس ارجع واقول في نفسي انا حبيت البنات والمدرسه بس ليش مو عارفه اتعامل وياهم ……
يعني غريبه انا بالنت صديقاتي اسولف معاهم بكل شيء بدون حواحز وعلاقتنا قويه الله لا يغير بينا
بس بالمدرسه ليش تغيرت مادري ؟؟؟
يابنات انا فتحت قلبي لكم ومابي تخيبوني
ساعدوني اذا عندكم خبره بأي شيء
عن جد نفسيتي تعبانه بشكل كبير وكل يوم من اجي انام ابكي ليش أنا حياتي منقلبه فوق تحت ؟؟
والله قلبي احسه حييل ضعيف وتجيني الآلآم من احد يقعد يشكيلي همومه لاني احس مو قادره اتحمل اكثر هموم
حتى يزداد عليي
ابغى اغيررررررر حياتي كلهااااا
ابي اضحك من كل قلبي
ابي ابتسم من جوايي عدل من دون ألم
ابتسامتي كلها تخفي ألم وحزن
شسوي ؟؟
أتمنى المساعده .. منكن
دمتم بود
