وأخيرآ صرت مثلكم وكتبت قصة ولادتي

الحمدالله على سلامة كل الواااالداااااات والله يهون على كل الوااااصلاااات والله يرزق كل الي ماحملوا
يارب ياكريم
انا بقول لكم قصة ولادتي الي صار لها 5 شهور الحين طبعآ انا بكريه وولدت يوم 1/8/2010 _ 20/8/1432
قبل هذا اليوم زهقوني الناس من كثر السؤال متى تولدين ومتى تولدين ألين ماحسيت اني ممله من جد
حتى زوجي اذا دق على احد ومارد عليه يرجع يتصل اول كلمه يقولها هاه بشر
المهم آخر اسبوع لي بالتاسع كانت الدكتوره تقولي كل شي اوكي بس البيبي مو بالحوض حاولي تمشين كثير وتعالي لي اسبوع الجاي لو ماشفت أي بوادر راح اعطيج طلق صناعي
زوجي انهبل يقول لا تسوينه احسه تعذيب ومايصير تسوينه وانتي مافيج اي بوادر للولاده
وامي تقولي سويه علشان مايتضرر البيبي واهم شي انه بصحه
انا فكرت مع نفسي وبصراحه حسيت اني ابد مافيني ولاده ونشيطه وزي الفل قلت ماابي اسوي ورحت لها وقلتلها قالت الدكتوره ليه لازم اسوي بعدين البيبي يتعب وماادري ايش… طبعآ هي من دخلت التاسع وهي تقولي عندي 10 حركات للبيبي في 10 ساعات باليوم لو قلت الحركات على طووووووول تعالي
فقلت للدكتوره انه دامه يتحرك طبيعي معناته لسه بدري علي وانا بكريه اكيد بطول شوي… الدكتوره دمعت عيونها علي وتقول انتي مثل بنتي انا بغيت اصيح بس مسكت نفسي المهم جا يوم الاحد الي هو يوم 41 يعني عديت التاسع بيوم برضو طلبت تسوي لي طلق صناعي قلتلها لا قالت طيب بسوي تخطيط قلتلها اوكي مو مشكله رحت لفوق وسوت لي تخطيط لنبض البييبي بعدها الله يكرمكم دخلت الحمام
وفي الحمااااااااااااااااام نزل معاي الله يكرمكم دم ومت من الخوووووووف بس كانت امي معاي وماابي اخرعها طلعت من الحمام ولبست عباتي وقلت يافكيييييك سبحان الله امي قالت لحظه مو رايحين ابي اروح للسوبر ماركت الي جنب المستشفى وانا بهالوقت مشيتي وصوتي ونظراتي كلها ترجف وقاعده افكر ارجع للمستشفى ولا اروح للبيت بعدين فكرت قلت لازم ارجع اخاف عقب هالتعب و9 الشهور يروح بسبب غبائي
قلت لامي برجع للحمام قالت توج رايحه قلت ماادري شفيني ابي مره ثانيه وارجع للمستشفى وقبل ماادخل كلمة ام زوجي ( ماكلمت زوجي علشان مايتخرع ) وام زوجي مشالله من النوع القويه وتعرف شلون تهدي قمت قلتلها الي صار قالت ارجعي للدكتوره هذي بوادر ولاده قلتلها طيب وتوني داخله للمستشفى الا امي بوجهي هههههههه ( قلب الام سبحان الله ) قالت شفيج قلتلها هاه لالا ولا شي شوي الا ام زوجي تدق مره ثانيه لانها مو مستوعبه انا شقلت مسكينه كانت نايمه ومافهمت وش اقول بالضبط
وانا اكلمها طبعآ امي سمعت كل شي ودخلتني للدكتوره غصب قامت الدكتوره تضحك وتقولي نعم يا نوف
قلتلها صار معاي كيذا وكيذا قالت لا هذا من الكشف الداخلي مافي شي قلت اوكي ورحت لبيت اهلي
وهناك كلمة زوجي وقلتله الي صار وعطاني هذيك التهزيئه لاني انحشت من المستشفى المهم انا سكت وخليته يطلع الي بقلبه لما خلص قالي بالليل امرج ونروح نمشي قلتله اوكي
اي استغفر الله الدكتوره قالت لي قبل مااطلع من عندها اني اخذ خروع ورحت للصيدليه وطلبت خروع
واخذته معاي البيت بس قلت ماراح اشربه الا بالليل قبل ماانام
وفعلآ جا زوجي المغرب واخذني للظهران مول ومشينا وبعدين رحنا لسعد الدين وشرينا آيس كريم وتشيز كيك ورجعنا للشقه طبعآ طول اليوم اتصالات من ام زوجي ومن امي يبوني اشرب الخروع غصب وانا ماااااابي مو مستعجله المهم خلصنا وجا وقت النوم ورحت للمطبخ وسويت لي قرفه وحطيت فيه خروع وشربته ودخلت انام الساعه 2 بالليل قمت وحسيت بمغص قلت يمكن ابغى الحمام عادي واروح للحمام وارجع يمكن جلست ساعه كيذا اروح واجي ومافي شي ( للحين مو مستوعبه انه طلق) لما جات 4 ونص قومت زوجي
وقلتله الظاهر فيني طلق وعلى طوووووووول فزع ( اول مره زوجي يقوم بهالسرعه دايم يتعبني بالقومه)
قلتله ماابي اروح للمستشفى قال ليه قلت بس اخاف يحوسون فيني خليني قادره اتحمل قال كلمي امي وشوفي كلمة خالتي وقلتلها قالت لا انا ماابيج تجلسين ويجي فيج شي صيري تحت نظرهم آمن لج قلت اوكي
واخذت شنطتي ولبست وطلعنا .. بس ركبت للسياره زوجي كلم امي طبعآ امي من النوع الخواااااااف
وماكنت ناويه اقول لها بس زوجي مارضى قال مهما كان هذي امج وراح تزعل لو ماعلمتيها فقلت له كلمها انت وفعلآ مثل ماتوقعت توترت وخافت وماوصلنا لبيتنا الا وهي بالشارع تنتظرنا مسكينه
ركبت السياره تحسبني جالسه اصيح واولول بس انا قعدت اسولف عادي واضحك علشان ماتخاف وبرضو زوجي واضح عليه انه متوتر
وصلنا للمستشفى كان فااااااااااااضي بس حنا فيه عكس لما كنت اجيه بالمراجعات
كشفت علي الدكتوره المناوبه وقالت 3 سانتي انا حسيت بفرحه ماتنوصف ( اقول بنفسي وأخيرآ بفتك من الدبه)
كلمت دكتورتي قالت نوموها ألين اجي اشوفها وخلوها تمشي رحت انا وامي وزوجي للغرفه وفطرت وبديت امشي مع زوجي جات دكتوره مصريه زي العسسسسسسل وكشفت علي قالت مشالله 4 سانتي
بعد ساعه تقريبآ جات دكتورتي قالت اهلين نوف وآخيرآ جيتي وكشفت قالت 5 سانتي يالله ودوها غرفة الولاده ورحت معاهم وامي وزوجي وراي اول ماشفت الغرفه خفت لاني بدخل لحالي قام زوجي ناداني
قامت السستر الفلبينيه تناديني يالله يالله الي يسمعها يقول هذي الحين بتولد
قام زوجي صرخ عليها قالها لحظه شوي بكلمها بس وجلس يذكرني بالاذكار ويقولي لاتخافين وانه بيحاول يدخل او بيوصي احد يدخل معاي
وبس دخلت كل الي بالغرفه مااعرفهم هذا الي خوفني شوي الا تدخل الدكتوره المصريه انا بس شفتها
صرت مثل البزران اصيح وماسكه يدها اقولها لاتخليني ( مع اني مو حاسه بألم ولا شي بس خايفه لاني مااعرف احد) قامت تضحك تقولي وانتي برا مشالله عليج والحين طلعتي خوافه المهم قالت بس بشوف شغله وبرجع لج( تسكتني) جاتني وحده ثانيه سوريه زوجي موصيه علي وجلست جنبي ترفع من معنوياتي الله يجزيها خير وطبعآ التخطيط علي شوي الا اشوفهم بدو يهذرون بالانجليزي وانا فاهمه انه الكلام عني بس ماادري وش يقولون بالضبط جاتني دكتورتي وأخييييييييرآ وقالت لي انتي لازم عمليه لانه البيبي نبضه ضعيف قلتلها اوكي وشالوني لسرير ثاني وجا دكتور التخدير وجلس يقولي وش فطرتي اليوم وكم عمرج ومن بعدها ماحسيت الا وانا ولدت وخلللللصت اول ماحسيت اني فقت ابي اكح بس مو قادره من الألم
واسمع سستر فلبينيه تقولي في ترجيع قلتلها لا وبعدين شفت الباب ينفتح وامي بوجهي وبعدين شفت زوجي وحسيت بأيده ماسكتني اول شي سئلته انا وش جبت قالي بنت ورجعت دخت مره ثانيه
وبس دخلت غرفتي حسيت اني احسن وصرت اتكلم واسولف بس فيني دوخه وصوتي مبحوح طبعآ
وببسسسسسسس هذي كل السالفه والحمدالله على البلاغ
يؤؤؤ نسيت اقولكم جبت بنت زي القمر وسميتها كندا

نصيحه لكل بكريه استمتعي بكل لحظه تمرين فيها حتى بلحظة الطلق والولاده لانه كل شي جديد خلي شعور التشويق هو الي يطغي عليج اكثر من الخوف وراح تشوفين شلون الولاده ممتعه بإذن الله
واشربي ماي زمزم ويستحسن انتي الي تقرين فيه الادعيه والقرآن لاتخلين احد يقرا لج
ولاتسوين مثلي وتنحاشين من المسشتفى لو شفتي اي بوادر ولاده ههههههه