عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
كيفكم يابنات وش اخباركم
بحكيكم قصتي من طقطق للسلام عليكم
انا كتبت موضوع اذا تذكرون وانا مره خايفه ومكتئبه طبعا كنت اراجع في التاسع كل اسبوع والاسبوع الاخير قال الدكتور اذا ماولدتي نهايه الاسبوع بنولدك بالطلق الصناعي انا قلت له ماجبت جديد كل ولاداتي بطلق بعد نهايه التاسع بأسبوع قال مو لازم انتي امشي وان شاء الله خير للمعلوميه مامشيت ولايوم في التاسع المهم كان موعد ولادتي في 21 من شهر 8 ولماعدا لي اسبوع رحت للدكتور تاريخ 28 يوم الاربعاء سوا لي تخطيط وقال وضع الجنين كويس نولدك الجمعه وانا كانت نفسيتي زفت وتجهزت قبله وجهزت بناتي ووديتهم والشغاله لامي على اساس موعد
طبعا زوجي رحمني فديت قلبه وقعد يترجا الدكتور يدخلني تنويم ويعطيني طلق صناعي لين وافق الدكتور الكلام هذا على الساعه2 وافق الدكتور ولما جا بيكتب تنويم قاله زوجي بنروح نتغدا ونرجع قال الدكتور اكتب التنويم اذا جيت لكن قبل ال5 علشان ماتقفل العياده
رحنا وانا زي المحكوم بالاعدام واللقمه يالله تنزل بس اغصب علشان ما اجوع وقت الطلق رجعنا وكتب التنويم وكان معه دكتور مصري وقاعد يقول انا بعطيها الطلق الصباح وانا انافخ واقوله اقول بالليل لما حسوا اني كشفتهم تخيلوا وش قال المصري
قال هو انتي عاوزه تسهري الدكتور معاكي لحد الصبح 😀 😆 hy:الله الله يعني ينام وانا اتقلب على جمر الغضى
المهم الزول يبغى يفسر كلام المصري لصالحه قال افرضي اعطيناك الطلق ومامشى حاله واحتجتي قيصري وش حنسوي لازم تكوني تحت اشرافي
طبعا دخلت الكشك الساعه5 ونص وودعت زوجي وفيني ضيقه عجيبه ماعمرها جتني دخلت وحطولي تخطيط والممرضه تقول مافيه طلق زيرو قلت لها اجل كان شفتيني اضحك؟
المهم جابوا المغذيه والبدايه من هنا جات وحده الله لايرده ماهي مسلمه ربطت يدي لين تنفخت عروقي وبس حطت المغذيه جات تأخذ برواز دم والايطير دمي ويتناثر ويالله لملمو الشغله وانا شاكته ماقلت شي حطوا مغذيه عاديه وانا كل شوي اقوا للدكتوره الصينيه متى الطلق وهيه تقول ماقال الدكتور طيب متى تقول اصبري اصبري
بعد صلاه المغرب حسيت وانا على السجاده بضعف ويأس وجلست ابكي والله ماعمري خفت زي هالمره واحس ماعاد بشوف بناتي
جلست استغفر واقراء قرأن لحد ماهديت وانتظرت وانتظرت والساعه تمشي ببطئ شديد والتلفون مره امي تقول متى بتجين وانا اصرفها وانا معزومين للعشا ونومو بناتي يمكن مانرجع الامتأخر وامي صدقت او بالاحرى سكتها لين تشوف النهايه
ومره زوجي يسأل
طبعا الممرضات يصرون عليه اني انام وانا اصر اني مافيني نوم حسبالي لو جلست صاحيه بيجي الامر الملكي طبعا كنت لحالي في الكشك ومافيه احد غيري طفوا النور وطلعوا على اساس انام والساعه عشره جات وحده وبعدها الثانيه والثالثه وحده بتولد وواصله ووحده بتسوي تخطيط ووحده تعبانه والدكتوره بتكشف عليها المهم الساعه 11 ونص جاء الدكتور يمر قبل ينام قالي اكشف وعييت نادى الدكتوره وقالها تحط لي نص تحميله قالت مفتوح نص صانتي بس وراحت انتهت مناوبتها وجات وحده ثانيه مصريه طبعا كان فيه وحده وولدتها على 2 وجلست لين 4 وبعدين طلعوها التنويم وانا اشوف ولدها اقول ياحظها ماشاء الله
طبعا صفيت لحالي مره ثانيه ويسوون تخطيط مافيه طلق وأسأل الدكتور متى تشتغل التحميله قالت لي انتي حتتوسعي وأنتي مش حاسه أصبري بس
ولما أذن الفجر صليت وجاتني نفس الضيقه وجلست ابكي وأبكي والدكتوره تهدي فيه والممرضه تحاول تسكتني وا،ا اقول أنا ماتعودت أبعد عن بناتي لأنهم صغار وماينامون الافي حظني المهم اتصلت على زوجي وقلت تعال وانا ابكي وبعدين هديت شويه قالت الدكتوره خليني اشوف كم سانتي ولما فحصتني قالت مااااااااااااااااااااااااااااشاء الله 3 سانتي والرحم لينه والراس اريب >>>>>>>>>بالمصري
قلت يعني متى اولد يعني فيه امل لو قبل المغرب بكره قالت قبل الظهر أن شاء الله
ولما جا زوجي كانت الساعه 6 وجلست ابكي واسولف له لين هديت وارتحت بعدين قلت له روح نام واذا ولدت كلمتك
وهوه تعب لما شافني ابكي وصار يدوخ ويالله يوقف على رجلينه وماتركته لين تأكدت أنه وصل البيت
بنات بروح اتسحر وارجع خبركم اكلت رمضان كله
استنوني
رجعت لكم
>>>>>>>>>>>>>>
طبعا راح من هنا ورحت على سريري وقلت في نفسي لاولاده ولانوم اقل شي اريح نفسي تمهيد للجاي وأناااااااااااااااااام لين الساعه ثمانيه اسمع اصوات ومادورت
وفجاءه الدكتوره المصريه فتحت ستارتي ومعها دكتوره مصريه منقبه وقاعده تعلمها عن حالتي وسكرت الستاره نص وراحت اطالع بجنبي فيه وحده مثلي مطوفه واسلم عليها وكيف حالك وبس
المهم 8 ونص ناديت الممرضه وقلت ابغى الحمام لان تعرفون المغذيه تملى المثانه ردت الدكتوره حنان
ايوه انتي عاوزه ايه يارنيييم
قلت ابغى الحمام قالت متى اخر مره عملتي ( 00000000)قلت اصلا ما اكلت شي قالت قيا لك ( وجا الفرج)
قالت اكشف الاول بعدين روحي قلت طيب نزلت راسي مره وبدت تفطع حاجه جوا بيدها مدري كيف اوصف بس عرفت انها بتفك المويه وتحرك اصبعها بقوه يمين ويسار انفكت المويه وجريت الممرضه علشان تجيب القطن الابيض اللي يكون تحت المؤخره قلت ااااااااي وش سويتي قالت ااااااااشش دنتي احسن منهم انتي متوسعه 4 سانتي
وعلى طول راحت جابت ابره الطلق وفي المغذيه وقالت انتي حتولدي قبل مايجي الدكتور محمد لانها عارفه لو شفته اني بقطعه باسناني
وهي راحت ماعاد شفتها ولما راحت جلست اسولف للي بجنبي والاتجيني طلقه قويه في اسفل بطني وانا يتغير وجهي واصيح في الممرضه تسكر الستاره ويالله وحده ورا وحده واقول نادوا الدكتوره بسرعه فيه طلق قوي مره وتكشف الممرضه قالت6 سانتي وامداها ترمي الجونتي الا بدا يدفع ويكلمون الدكتوره ويودوني غرفه الولاده وهم يقولون لاتدفي لاتدفي والدكتوره تجري ويالله لبست البالطو ولما قربت دفعه وحده وهي تصرخ حتخنئيه حتخنئيه اثاريني رافعه الحوض وانا قاعده اقول ارفعي السرير علشان ينزل ظهري وفجأه قلت لها حرام عليك حرام عليك ليش مارفعتي راسي قالت بدل ماتشكريني تقولين حرام عليك هنا انا انتبهت اني ولدت والله أني كنت أحسب انه لسا ماطلع من سهوله الولاده قلت ولدت؟؟؟
قالت الحمد الله على السلامه قلت وش جبت سألت الممرضه قالت ولد حتى الدكتوره تفأجأت من سرعه الولاده ونسيت تعرف اش جنسه
قلت شكرا يادكتوره وجلست ادعيلها ادعوا لها يابنات الله ينور طريقك ياحنان وينولك اللي ببالك انسانه يدها سحريه
ووقت الخياطه قالت تبغين تجميليه مع انك مش محتاجه قلت لها لا بس رجعي كل شي تمام وفعلا وربي ماحسيت طلول الاربعين بـألم الخياطه وزوجي الحين يدعيلها
اللي صار يابنات من تيسير رب العالمين والاسباب كالتلي
اول ماعرفت اني حامل الكل زعل وانا قلت اللهم انب رضيت فرضني
السبب الثانب لما اشتد خوفي وكربي لجأت للرحمن الرحيم وصرت اقوم الليل واقراء واستغفر كل ما تذكرت وادعي
شفتوا المعجزه بدا الطلق يشتغل 8 ونص ووالله العظيم اني ولدت 9 تمام يعني ولاده في نص ساعه
واحمد لله اولا واخرا وهذي كانت احلى ولاده لاحلى فارس
