وسافرت شغالتنـا فترقرقت منا الدموع.. وسافرت معهـــــــــــا

اصبروا في البدايه خلني اكمل آكل بسكوت ابو مربع مالكم دخل 😛

الموضوع من عنوانه بئا انتا وهوا لاتقولون وش ابي
انا بحتسي عن الشغالات واثرهم على الفرد والمجتمع ( قلبنا تعبير ) 😐

الزبده بقولكم عندنا شغاله اول ماجتنا وانا كان عمري 4 سنوات . يعني لو اقول (أ) والا اهايط قدامها تعرف كل شي كافشتنا كافشتنا عارفه اللهجه السعوديه البحته ..

المهم عشنا معها امتع الاوقاات ( دعاية فمتو ) 😥

وسوينا مغامرات واكشن يوم كبرنا طبعا هي تسافر وترجع
وكل مارجعت جابت لنا العاب اتذكر لعبة ام مروحه يازين زمان اول ماقد شفت زيها في السعوديه 😐

وتذهب السنون تلو السنون ونكبر ونصير انا وياها صديقات ووقسم اني ما اكذب عليكم 👿

مره ماتتخيلون ونشتري افلام رعب سوا ونناظر سوا هههههههههههههههههه كل ماقلت لها شيء قالت يالله خل نسويه وبالنهايه انا ابلع العافيه اخاف من المغامرات .. وتجلس تقولي وشذي دبه ماتعرف تسوي شي مالت عليتس والله لهجتها تضحك
وحتى لما اروح العزيمه تجي تترزز جنبي واسلم على الشغالات والله تضحكون ههههههههههههههه مابقي شغاله ماتميلحت عندي
وشغالتنا تروح معي تميلح تسلم على الناس وحتى الرجاجيل بحكم حياتها عندنا واقاربي لما يجون يسلمون عليها خلاص صارت عجيّز
المهم في يوم ثاني العيد والناس فرحانه واحنا في عزا ➡

مات زوج شغالتنا واقعدي صيحي ونيحي 😛 .. وعزا وحالتها حاله الا بسافر بسافر
يوم جت بتسافر خلاص ماراح ترجع سوينا فلم هندي يحبه قلبكم اول ماصحينا الصباح انا اول وحده والاهي مجهزه شنطتها وشكل وجهها مافيه ملامح من الصياح .. ويخطر على بالي مقطع (ودي اعرف شلون تقدر على بعدي خلك معاي خلك معاي مقدر اعيش وحدي 😥 )
… وتجي طايره لمي وتتعلق بخشتي مع السلامه لحظه سامحيني سامحيني وانواع الصياح واصيح انا عليها وانا اقولها
تكفين ارجعي ماقدر اعيش انا

..بروح معك . وحاولت في اهلي ووافقوا من زود الثقه فتره بسيطه وارجع ورحت معها
وجلست عندهم متغطيه طول الوقت وحياة صعبه….
ودبرت عمري واستاجرت الدور الفوقي من بيتهـا ..ومره طقوا الباب علي ناس على بالي هي وافتح الباب واناظر ماحولي احد ..ويطق الباب واناظر ماحولي احد . واعصب واخاف.. ويوم طقوا الباب ثالثه فتحت وانا مغمضه… شوي الا يجيني بقس على خشتي ويربطوني واصيح ماحولي احد سائدوني سائدوني ( بالاندونيسي بس ماحولك احد )

واقولهم اصبروا مااتغطيت وين نقابي ( الحين الناس بها المواقف تطقها ام الركب وانا ادورنقابي) ➡
واجلس اتذكر بيتر وينك بس يابيترررر 🙂 ( الدحمي )
واصيح وذولي يطلبون فلوس مامعي شي طيب يالتسلاب 😉
ويودوني بالسياره وانا اقول الله جعلك تقشع بالصبه 👿

ووصلنا لبيتهم
ويقومون يلبسوني اشار ومريلة طبخ ام مربعات ويعطوني سفنيك

وتجي ريحتي شينه تروع كني مغطسه بمجاري 🙁 وتحوم تسبدي ويخلوني اشتغل

وانا حالتي يرثى لها ومره جاهم ضيف سعودي الا وانا اطير من الفرحه قلت خلني اسوي نفسي بصلح لهم شاهي وفرصتي عاد ادخل واطلق العنان للساني ليحتسي اللغه العربيه
وادخل والشاهي معي وامشي واحط الشاهي بدون مارفع خشتي ويوم رفعتها واحط عيني في عين السعودي
والا الخشه موب غريبتن علي بيتر الا هو بيتر 😈 وهو يتمقل فيني يتمقـّل .. ويقول يخلق من الشبه اربعين تشبهين صقيقتي .. 😉
وهو (داقن اللطمه ابن اللذينا وجاين اندونيسيا ماعلمني يقول عنده بعثه الله من النصب متزوج مسيار 😆 idea:)
واعلمه سالفتي وكل ابو شيء

فاصل اعلاني
اهداء لبيتـر
سواها قلبي ياحبيبي وحبك ماطاعني وانا عن الحب ناهيه الظاهر انه مايبي غير قربك عاف الجميع واول الناس راعية ❗ 💡
___
باك ..
وارجع لبلدي ويازين السعوديه بس زينـاه لاتقولون وبس غير بلدكم مافيه مالت عليكم .. ❗
قال ايش اندونيسيا قال
شوي ويمعط احد شعري معطه
وخري عن رقبتي بسافر خلاص لابو من تعلق بخشتس ماتنعطين حنان 😛 😐 قصدي وجه << اثرني جالسه اتخيل اني سافرت معها 😥 ههههههه

المهم خلاص رحت مع شغالتنا ووصلناها للمطار توها بتنزل الا وتخمخم اخواني الصغار وصياح ووكل اللي في بيتنا صاحوا منظر يقطع القلب ( هل ياترى حان الوداع … فترقرقت منا الدموع ) … وودعناها وكل الناس تناظر هالمشهد مرتاعين وصاحوا معنا وعطونا ورد << بدت تنصب 😈

هذا انا جبت الصوره لكم