ولادتي والإنهيار العصبــي / شجعتوني احط قصتي

جيتكم بقصتي في بنوتي الله يحفظها لي وهي الحين عمرها سنه 😆 idea:

هذي صورتها قولوا ماشاءالله عروسه فديتها

ادري تأخرت عليكم بالقصه
بس انتوا حمستوني احطهاا

بداية الأكشن/

رحت اكشف عادي لهم وانا داخله ع العاشر ليـ 10 أيام
وماتوقعت تقول لازم تولدين ومن هالكلام .. رحت انا وزوجي الله يحفظه لي وع طول قالت تروحين قسم الولاده وما اقدر أتحمل مسؤوليتك وهيك حكي
انا كنت محضره كل شي شنطتي بما اني بجيب بنوته لونها فوشيا
وللعلم ماكنت ادري ايش هي الولاده ماعندي احد كبير شفته
واقرا قصص البنات إنهم اذا خذوا إبرة الظهر خلاص مايحسوا بشي

أمي كأنها حاسة كانت حالمه فيني حلم مو زين كلمتني وقالت: انتي وين ومن هالكلام قلت لها اللي صار
قلت: ماابي اليوم ماتجهزت قالت: ماتطلعين الحين انا بجي
جاتني وانا كنت حاجزه سويت دخلوني فيه وحطوا لي الشريط
اللي عليه اسمي ع اليد
وجابوا سرير بيبي بإسمي علشان يكون لبنتي اذا ولدت السويت كان مره حلو انا مو حول الولاده قعدت أتفرج وكذا
قلت: لزوجي بطلع قال ايش فيك الله يهديك قلت: بروح أجيب اغراضي انا كأني بزر ابي أتعذر بأي شي
جات أمي قالت: توكلي ع الله قلت لها ونعم بالله بس أبي أروح الكوافير 😆 🙄
والله ما أولد إلا لما أروح
حاولواا مافي فايده قالت: لزوجي خلاص انت جيب اغراضها اللي هي شنطتي والشكولا اللي انا طالبتها من برا لازم اجيبها قبل الولادة و فاتحه كل مكيفات البيت لاتخرب كانت كثيرة ومفرش سريري وكل شي
احس إني اتعبت زوجي مسكين المهم ’قالت له
وانا بوديها الكوافير طبعا انا حطوا علي الشريط يعني ممنوع اطلع
كلم زوجي الدكتورة قال لها:اني ابي اطلع هي مصريه عصبت قالت: ايه وعصبت
وقالت :عطني اياها وهي مقهوووره علي حاولت بس انا مارضيت
قالت خلاص وقع ع ورقه انه هي تحت مسؤوليتك وكذا
بنات لاتلوموني ماادري ايش الولادة و نفس الوقت فجأه قالت ماتطلعين البيبي مافي شي بس طولتي وأخاف ياكل شي او شي…
وانا ماتهيأت نفسيا ابي اهرب
ورحت مع ماما الكوافير نزلتني وبعدين راحت هي فديتها تجيب اغراض من بيت اهلي
نزلت وسويت بدكير واستشورت كوافيرتي سعوديه تظحك علي تقول: من جدك طالعه وع ايدك الستكر علشان الكوافير وراك ولادة تراا قلت: ايه انا قريت بالنت من بنات المنتدى انه إذا اخذت الإبرا ما احس بشي
رجعت وبدء الجد
ع الساعه 1 جات تكشف وانتوا ادرا بالألم وبعدين قالت مو مفتوح وبعدين جلست بالسويت كان كبير جات أختي هي كانت ولادتها بعدي بشهر ونص
جايبه عشاء ونسولف انا وياها ونظحك ونقول ايش راح نحط ترتيبات وايش بتطلب بكرا
يعني بعالم اخر احنا
ولا يابنات المضحك اني رحت شريت لي بجامات برمودا قلت بكشخ بالليل قدام زوجي اللي توب وبرومود والروب حقها بينك من( ousho و la senza )
وفوشيا يعني قدام زوجي كل شي بينك قلت اذا طلعوا الناس وكذا اللبسها
يعني اقولكم انا واختي عالم اخر وكل ما ماما قالت لنا شي نقول لا نبي نكون انيقات وكذا
راحت وجات الممرضة وقالت الرحم مو راضي يفتح عطوني تحميله ع الساعه 1
زوجي نام بالصاله وماما جنبي ع الكنب فديتهم

غفيت شوي مره وطبعا التخطيط ع بطني صوته وضلام ووضع ماادري ايش بيصير وكيف البيبي يطلع مني
صحيت 5 زوجي مو موجود راح يجيب لي من بيتي فرنس فطور انا احبه
قبل لايجي بخمس دقايق جاني الم غريب وراح
يجي ويروح قالي كلي علشان خاطري ماحبيت اكسر بخاطره كلت شوي الا يجيني الم فضيع كل 5 ثواني مايمديني اخذ نفس و رجعت اللي اعطاني إياه وانتوا بكرامه وصرت اتألم مره وبشكل مجنون وأقول الله يسامحكم يابنات كيف تقولوا مثل الم الدوره
أمي ماسكه ايدي من جهة وزوجي من جهه انا بصراحه كنت أبي أمي
تعرفون باللحظه هذي ماما غيرر ولايهون هو بس الأم انتوا تعرفون ايش تعني

واستمرالم فضيع كل 5 ثواني الم وانتي بكرامه ترجيع والم
ودوني غرفة الولاده كانت ع 7 الصبح
طبعا ماقدرت امشي ارتجف والم ع الكرسي رحت وحسيت بجد انه بني ادم ضعيف
رحت والا فيه امريكيه زنجيه طويله مره يمكن مترين
ماسا عدتني ولاشي انا حقدت وانا بطبيعتي لساني طويل بصراحه بس مااقدر أقولها شي أخاف تتسلط علي وغير كذا تصيرين طيبه ماتبين تهاوشين احد ههههههاي من قوة الألم
بكيت وطلبت ابرة الظهر
جاء الدكتور تبع الإبرا وقالي انحني كل مانحني يجين طلق
ويقولي اجتك طلقه طيب ارتاحي شوي
ويبي يشرح لي كيف الابرا وماادري كيف قلت له خلاص عطني اياها وبس
عطوني اياها خف الألم شوي
جات الساعة 11 الممرضه عاجبها زوجي لاحظت وهو لاحظ تبي تسولف معه وهو مايعطيها وجه ومو حولها خايف علي
مايرد ويطلع يصلي ويرجع
تجي تقولي يور هازبن هنسم ههههههههاي
وانه مثل اشكال الأمريكاان وانا اقول في نفسي فكيني واسكتي
وبعدين جات دكتورتي قالت لي ليه تاخذين ابرة الظهر مابتساعديني بالولاده وبدون ماادري طلبت يخففونها بدت معاناتي كل 5 ساعات يفتح 1 سم جلست يومين وانا بغرفة الولاده
تعبت صرت اتشهد وتحت عيوني كأني حاطه كحل
امي وزوجي و اختي اللي لسى ماجربت الولاده وباقي دورها وانا ماابيها تشوفني وتخاف بس هي اللي جات
استمر العذااااب والتخطيط يومين صوته بإذني تعبت
مره خلاص مافيني حيل أي شي
ولا اقدر انام
واشوف عيون امي حمراء واضح انها تبكي برا وتجي المهم جاء وقت الولاده وكنت اسمع اختي تقول لأمي تعبت مره خلاص مفروض يولدوها تحت عيونها اسووود مره
وزوجي يقول لدكتوره خلاص ماابي شي مولازم بيبي اهم شي هي ترتاح خلاص ماابي شي انا ماادري انه بيصير فيها كذا وعيونه ع كلام ماما فيها دموع انا مو حول احد
دخلت وشالوا نص السرير وسو لي البزشن تبع الولاده هو كان يصلي كلمته امي قالت تعال خلاص بتولد جااء طاير يقول لي وين الكاميرا فاااضي وانا ماارد الا الأخ يبي هو يقص الحبل السري اللي بيني وبين البيبي
احنا ماكنا ندري انه والولاده كذا وكنا متفقين انه يدخل وانه يصور وكذا
يوم شفت وضع السرير وانتوا ادرا قلت ماابيه يدخل وهو يقول احنا اتفقنا وانا اتألم قلت لدكتوره خليه يطلع خلاص
وياخذ ع خاطره هو واسمعه يقول لأختي هي طلعتني وكنا متفقين اني اكون معها
جابته اختي وانا بذبحهم ابيهم يخلصوني
قال خلاص بجلس ع كرسي يعني مقابلك عند راسك ووجهي ع الجدار بس بمسك ايدك قلت طيب خلاص
قدامي كان فيه دولاب قزاز يعكس مااشوف الا هو يناظر وهو طويل يعني يمديه يشوف بالراحه
قلت براااااااااااااا ماابيه
ههههههههههاي طلعت امي تطلعه قلت لدكتوره ولا احد قفلي الباب
انا بموت وهو يتعازمون
بدء الإجرام لاحظوا قدامي دولاب قزاز اشوف
شقوا بس هي اجرمت فيني
الشق بدون بنج واصيح اقولها عطيني شي وقالت ادفعي ماادري كيف
مااعرف سويت حركات اذكر ع ماكانت تقول كم مره ومافي فايده قالت ساعدينا البنت بدت تتعب هي يومين بالطلق وانا اقول بنفسي دامك تدرين ليه تعذبيني يومين
قالت البنت بدت تتعب قلت كيفها انا بموت لاتلوموني بموت خلاص كنت اقول هذا عذاب الدنيا كيف عذاب الأخره
الحلوه الدكتوره تسولف مع دكتور ثاني يعني مين سمح لك تدخلينه علي ماعندها لاذمه ولا ضمير ازيك يامحمد
ازيك يادكتوره اميمه
وطبعا الشي هذا ماقلته لزوجي كان انهبل
المهم
شوي شوي طلعت نور الدنيا لدنيا
حطوها ع بطني وقعدوا يقصون الحبل السري
هي مابكت تناظرني عيونها حلوه وانا مستغربه وخايفه ايش هذا
اللي طلع مالمستها
اكيد الممرضات استغربوا بس تخيلوا يومين بدون شي وانا بكريه وبعدين شق وخياطه بدون أي مهدء
والخياطه بدون شي
وابكي حتى بنتي يوم شفتها قلت وخروها وخلصوني من الم الخياطه
حتى كمامه مافي تعاند ليه اخذ ابرة ظهر
وبعدين طبعا ماشفت الا امي دخلت مو ع غرفتي لا ع الممر اللي بين غرفة الولاده ادخلت
وهي خايفه توقعت انه بنتي بسم الله عليها فيها شي لانها مابكت
من كثر ماتعبت بالطلق مابكت فديتها والمكان هذا ممنوع تدخله
طمنوها وبعدين طلعوها لهم

وانا باقي بغرفة الولادة رجعت ومعدتي اصلا مافيها شي مويه من المغذي
واول ماقمت ابي اروح دورة المياة وانتم بكرامه نزيف مثل الحنفيه وماقدرت اجلس حتى وانا واقفه دخت وجات اختي حسيت حراراه بإذني ودخت
خلوني بغرفة الإفاقه وبعدين طلعوني ودوني غرفتي وانا تعبانه
جاني كره لكل شي لبنتي وللدنيا وابكي
رحت الغرفه وماما وزوجي معاي
قال زوجي بنام عندها قلت لا خلي ماما روح انت تعبت
انا مااقدر اقوم الخياطه كانت 16 غرزه والمستشفى يسون تجميلي داخلي وخارجي
وانا نزيف مو طبيعي
سكرت ماما النور والا اسمع اشياء اسمع صوت المكيف نبض بنتي والألم احس انه الدكاتره يكشفون ع من تحت
واسمع ناس تقولي بوش بوش
وانا مو نايمه مغمضه عيوني
وصوت المكيف يزيد كأنه نبض التخطيط
واصرخ
ماما افتحت النور
وانا مااقدر اتحرك من الخياطه وهم اصلا سحبوها بشفاط
يعني الشفاط يألم من تحت
قمت وابكي قلت لماما مابي شي ولا شي
ليه كذا ليه الدنيا كذا واقول كلام ماتذكره امي تقولي عليه
امي تهديني وتقولي بنتك جات علشانها تحملي
قلت مااحبها مااحس بأي شعور بس تكسر خاطري
طلبتها امي لي وشفتها كسرت خاطري بس مااحبها حب اللي يقولون عليه كسرت خاطري لأنه راسها مجرح كثيرر من الشفاط
نادت امي دكتور واعطاني ابرا مهدئه وقالها انها من كثر التعب انهارت وكذا
الغريب يابنات اني كنت اموت فيها وهي في بطني
واشتري لها وارتب كل شي لهاا يعني مافي محل مادخلته بس
من الإنهيار كرهت كل شي استمريت ع مهدء لين طلعت الصدمه الثانيه
اني يوم طلعت رجعت ثاني مره بعد 4 ايام من اولاده قالوا لي انه فيها صفار شديد وممكن يأثر بسم الله عليها ع المخ وكذا لازم تنويم
ياربي شسوي دخلونا تنويم وانا ماارضعها اشفط بالشفاط لها وماجبت حليبها جابوا لي
حليب بارد اللي بالمستشفيات اتوقع سميلاك جيت اشربها قامت ترجع ماتقبلته انا هنا قمت اصيح شسوي وزوجي يسوي الإجراءات
انا لو حدي كلمت امي كان اخوي تعبان جاتني وقالت لاتخافي وبجيب كل الأغراض انا مااعرف اسوي شي مااعرف امهدها
النيرس توريني المهم قالهم زوجي حطوها بالحضانه قالوا لا طالما انها طلعت ماينفع ترجع وماما ماتقدر تنام وانا
يا بنات ماعرف
لها لوحدي ونفس الوقت بموت من الجرح مو قادره اجلس الم فضيع
جات امي واختي وجابوا الأغراض
وبنتي كسرت خاطري فصخوها ملابسها كان باقي البامبرز بس
وكل شوي يجون بمشرط يشقون من اصبع رجلها وياخذون تحليل وانا ابكي لانها تبكي بديت احن عليها

المهم طول اليوم مانمت اخاف اللي مغطين عليها عيونها القطنه تنزل ع نفسها وتكتمها وبعد قالوا لي لو ناظرت اللمبه اللي بالجهاز لاقدر الله تنعمي مو زين طول اليوم مانمت قالوا لي افتحي التكيف كان حر مره بس رحمتها هي مو لابسه
وخليته مطفي تخيلوا عاد حر وجرح ايش بيصير تحملت علشانها جاتني اختي الحامل كسرت خاطري هي بعد تعبانه ونامت عندي
المصيبه اني مااعرف اغير لبنتي ماعمري غيرت بامبرز وابي ماما تساعدني كنت انادي النيرس تغير لها مااعرف اسوي شي ومااقدرامشي معانااااة بمعني الكلمه
قعدت
3 ايام وطلعت اوه تعبت كثير كثير

وشوي شوي تعودت ع كل شي وراح اثر الصدمه ممن قوة الألم وحبيتها اكثر من روحي فديتهااا

كانت الولادة في/مستشفى المانع بالخبر
الدكتوره/ اميمه
التاريخ/19_5_2009
اليوم/ الثلاثاء
الساعه/9 ونص ليلا

ملاحظاتي :
المستشفى راقيه وحلوه بس الدكتورة من النوع اللي حسي بكل شي وهذي الأمومة ومن هالحكي
يعني ماتبي أي نوع من انواع المسكن .يمكن في بعض البنات كذا انا وجهت نظري انه الله لايكلف نفسا إلا وسعها