عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
والصلاه والسلام على اشرف الانبياء والمرسلين ..
كيف حالكم ياحريم وكيف حال الحمل معااكم
انا من سكان الرياض طبعا وسويت سونار ولأول مره بمستشفى جديد ماافيه احد ولا فيه زحمه
طبعا اسمه (عيادات المئويه ) شمال الرياض
وزوجي مرره فرحان متوقع 90 % انهم يقولون له مبروك ولد وللمعلوميه انا احساسي انه ولد لدرجه اني ماكنت محتاجه اسوي سونار بس زوجي يبي يفرح ورحت معااه عشان يستانس ويفكني
ويوم رحناا للدكتوره اسمها ( د. روعه) وقلنالها انناا نبي الترا ساوند فقط وجلست تناظر بالشاشه وتسالني اساله ع طول زوجي قالها وشو الجنس دكتوره
قالت دئيئه بدي شوف اول كل شي كويس بالرحم ولا لاا وتناظر وتدور بعدين انا سالتها عن حجم الجنين
وسالتها اذا كان واضح بالشاشه انه سليم او لاا من غير تشوهاات وكذاا
وقالت ايه الحمدالله كويس وسليم وقلت الوزن قالت وزنه حلوو كونك بالشهر السادس
قال زوجي مره ثانيه وشو يادكتوره الجنس !!؟
قامت تدقق وقالت بيظهر قدامي انو الجنس انثى والله اعلم وهنااا طارت عيون زوجي :0107:
انا انصدمت انه طلع عكس الشي الي متوقعته وحااسته بس الحمدالله كنت فرحاانه انه سليم ووزنه كويس
ابد ماهمني انه طلع بنت او ولد لكن ناظرت زوجي ياقلبي حسيته متحطم لانه يبي ولد :062:
المهم قالت تعالي نشوف وزنك وضغطك يوم قاست وزني لقته 50 قالت كم كان وزنك قبل الحمل
قلت انا وزني كان 47 قالت يوووه المفروض الحامل تزود 15 كيلوا ع الاقل :0144:
عااد انا قلت بقلبي وشتبي هذه توي بالساادس وبعدين ماعمري شفت حامل زايده الوزن ذا كله من حوامل عايلتنا ؟؟؟
وخلاص صرفتلي حبوب ورحناا قال زوجي شكلها كويسه الدكتوره صح قلت انا مادري ماعجبتني :404:
قال زوجي ليييييه لانها قالت ان الجنس انثى وانتي متوقعه ولد قلت مدري يمكن
اناا رجعت البيت وصرت افكر ليه ماطلعتلي اعراض بنت اذا كان بنت واستغربت مدري اصدقها ولاا لاا
بعدين اتذكرت انناا دخلنا المستوصف جديد مافي احد غيرنا قلت بقلبي معقوله موفاهمه الدكتوره
وقلت معقووله يغلط السونار بالشهر السادس ؟؟!
انا الحمدالله ماهمني ولد ولا بنت انا رجعت من المستشفى والله سجدت شكر ان الجنين طلع سليم
لاني كنت اصبغ واشقر بشهوري الاولى واستخدم فكس وكليت فوليك ع الشهر الثاني
وواحد من عيال اختي كان يركض وضرب بطني ومررررررره شايله هم الشي ذاا ان وليدي يكون فيه شي
واكبر فررحه يوم تشوفين جنينك صراحه بالسونار فرحه لاتوصف :402:
بس الحين المشكله بين احساسي والسونار وزوجي :د0:
زوجي صار مو متحمس مرره مثل اول بس الحمدالله اول ماطلعنا قال الحمدالله انه سليم ..
وثاني شي مدري اقولكم احساسي ولا احلامي ولا شكل بطني
اول ماتحرك الجنين تحرك ببدايه الشهر الرابع وكانت الحركه زي النبض باليمين يوم علمت امي قالت تراه ولد الي فيك وكل احلامي تفسيرها ان فيني ولد وللمعلوميه انا اعرف افسر يعني لحد يقولي تفسير العيال بنت وتفسير البنات ولد والعكس ومدري ايش
والثقل عندي ع اليمين وبطني كل من شافه قال شكله دائري شكله ولد وخفييفه اروح واجي واسوي الي ابيه ماحس اني ثقيله .. والحركه فيها دفااشه بالحيل رفس وتنطيح احسه يلعب كوره ببطني :057:
والحين انا جالسه افكر وش اسميها وافكر وش اشتري صراحه مو داخل مزاجي ابد ان السونار صادق
ولا قادره اصدق اني حامل ببنت وشكلي كذاا بنتظر لين التاسع عندي احساس كبير ان فيه خطا والله اعلم
عاد ماقلت لزوجي ان احساسي انه ولد عشان مايتامل من اول وجديد خليته
وفكرت اسوي سونار عند خاص ثاني وقلت وشوله يمكن يقولولي نفس الكلام ويتحطم زوجي زياده ههههههههههههههههه مصيري بعرف لاولدت
عاد الحين يابنات ودي وحده تعلمني اذا صار معها كذاا وتعلموني الي غلط معها السونار وقالولهاا شي وطلع العكس والله ودي افرح زوجي ولا انا هين فرحاانه الحمدالله والشكر
وعطووني افكار اسويها اذا طلعت بنت صدق وش اسوي مع زوجي وشلون افرحه واخليه يفرح معي
والله خرب علي فرحتي يعني لو يكذب معي السونار ماراح اصدقه ابد بحياتي :404:
في ملاحظه : انا اذكر وحده بالقسم قالت انهم قالولها ولد لحد التاسع وهي ماصدقتهم وراحت جهزت جهاز بنت وطلع احساسهاا صادق .. مشاركتها ماني ناسيتها العضوه هذه شكلي بسوي زيها
ومشكورات يابنات ياليت القى مشاركات حلوه وتجارب من الحوامل مع السونار
