يهددني بنشر صوري

بسم الله الرحمن الرحيم
اللهم صلي وسلم على عبدك ورسولك محمد واله الطيبين ..
بنات بفتح لكم قلبي لاني مالقيت احد يوقف معاي بعد الله غيركم ..

انا بنت عمري 22 سنه عانييت مع اهلي 7سنين من العذاب بسبب سحر سوته لنا عمتي وبنتها جواهر واخت زوج بنت عمتي جواهر..
وما تتصورون شلون كنا عايشين انا ترتبي الثالث في العائله قلبي اخ كبير عمرة 28 وبعده اختي عمرها 26 وبعدها انا وبعدي اخوي عمرة 20 ..
اختي واخوي متزوجين
وماباقي الا انا واخوي في البيت ..
البيت صاير جحيم لا يطاق كل يوم امي وابوي هواش بسبب السحر الكل صاير في حالة حرب الكراسي تنرمي في كل مكان الطاولات الاواني وكل شي
امي تتهيأ اشياء .. ابوي نفس الشي ..
حاولنا كم مرة نفك السحر ينفك شوي وبعدها يرجع اقوى واقوى
الين ماجلست احاول في امي
وجلسنا نقرا سورة البقرة لمدة 3 ايام في نفس اليوم
يعني كل يوم اساعه 1 الليل هي تجلس في المطبخ بروحها وانا بروحي في الصاله او غرفتي نقرا سورة البقرة سوا ..
كل يوم لمدة 3 ايام
المهم في اليوم الثالث في نص قراءة سورة البقرة كنا انا وامي نقرا في المطبخ والله العظيم يابنات ماكذبت عليكم .. وربي يشهد علي
ماسمعنا الا اشايء تتكسر وشي قوي طاح

انا وامي خفنا مرة واستقوينا وحطينا الرحمن في صدورنا كملنا قرءان وتوكلنا على الله ونمنا
صحينا يوم ثاني وكان يوم الجمعه ..
جت لي امي تركض .. وقات تعالي بسرعه
رحت المطبخ فتحت لي الدولاب الي سمعنا ان شي طاح فيه لقينا كيس فيه قطعه لحم متعفنه مشكله على هيئة انسان وفيه معها ورقه مكتوب فيها كتابات غير معروفه اكتشفنا انها سحر ..
وبعد محاولات من الشيوخ الحمدلله ماشاء الله تبارك الرحمن هدت الاوضاع شوي .. في البيت

نجي لمشكلتي
خلال ه الوقت كنت ضايعه مرة .. كنت فاقدة حنان
ابي اسوي اي شي يعوضني عن حنان اهلي
ف كنت اكلم شباب في المسنجر وكذا ..
والحمدلله تبت ولا تطور الوضع اني اوصل لمرحله الجوال بفضل الله تعالى..
توكلت على الله وتبت وابتعدت عن الشباب ..
ايش الي صار لي ..
سافرت مع بيت اخوي المتزوج لدبي قبل ثمانيه شهور ..
وفجأه هنان انسرق جوالي
انا بكيت لانه في ارقام وصور اهلي وصوري ..
المهم بعد فتره ظل يدق علي رقم من الامارات .. انا عندي جوالين ..
وكنت مخزنه ارقامي اثنينهم في جوالي الي انسرق ..
يعني الولد عرف ان هذا رقمي الثاني لاني مسجله الرقم الي عنده مع رقم ثاني بنفس الاسم ..

صار يهدنني يابنات انه ينشر صوري..
تخيلو يا بنات انا ما ارد عليه ولا شي ..
صار يرسل لي مسجات .. يهددني وكذا

تخيلو درجة الوقاحه انه ركب صوري على صور مخلة ب الاداب انتو تعرفون الفوتوشوب ..
مايحتاج اقولكم عنه سوى صوري كأنني انا في وضع مخل ماهوب تركيب..
انا انصدمت وقمت ابكي ..
مااعرف ايش اسوي ..
اقول لمين ..
ارسلته ليش تبي تفضحني انا ماسويت شي خاف ربك مثل ماتفضحني ربي بيفضحك وبيفضح خواتك واهلك

كتب لي خواتي اشرف منك يا ***************************
ويا *************
وبنات السعوديه *********
وانتو *********

وربي كلمات وقحة ووسخة لابعد حد

بنات انا داخله على الله وعليكم طالبتكم انكم تحلون مشكلتي وتساعدوني
انا مقدر اقول لاهلي لاني عارفه ان اهلي وهم بالوضع هذا بيصدقون الكلام الي يطلع علي..
اخاف اقول لاخواني ويذبحوني لان الشي الي صار مو سهل ..
بنات الي تعرف احد ممكن يساعدني اي احد شيخ هيئة شي .. يساعدني
لانه يقول لي كلميني ابي اتفاهم معك ولا انشر صورك في كل السعوديه وكل العالم

ربي يستر ويوفق ويعتق كل وحده تدخل وتدعي لي ربي يفرج همي
بنات استرو علي من ستر مؤمنا في الدنيا سترة الله يوم القيامة
بنات انا ماعندي احد غيركم وربي ماعندي احد غيركم ..
والله مستحيل اقول لاهلي ..
بنات انصحوني ايش اسوي ..
اتصل على احد الشيوخ واعطيهم رقمه او ايش اسوي ..
تكفون ربي يوفقكم ساعدوني 🙁