يوم زفافي

مساء الورد والسعادة لفراشاتي الغاليات وكل عام وانتو بخير وحب وسعادة ..

انا كان فرحي قبل أسبوعين الحمد لله، انا من بنات المدينة وفرحي كان في جدة لأنو اهل زوجي من جدة، ورحت لمشغل دلتني عليه صديقتي عشان اتحضر فيه ليوم زفافي وانا واثقة من رأي صديقتي 100٪ وقالت لي على اسم اللي تسوي الماكياج للعرايس ووحدة شاطرة للشعر، لما اتصلت على المشغل عشان أحجز عندهم قلت لهم مين حقت الشعر للعرايس اعطوني اسم غير اللي قاتلو صحبتي وانا قلت هما أدرى وأخذت اللي قالت عليها صحبة المشغل، المهم رحنا للمشغل وكان الماكياج من أحلى ما يكون ماشاء الله، لكن التسريحة مؤ اللي كانت في بالي بالرغم انو ما كان في بالي شي بالتحديد فقلت اخلي الكوافيرة تسويلي براحتها اللهم قلتلها الطرحة قدميها، المهم أتأخرنا شوية الين 10،30 وشفت التسريحة ما احسها مرة اللي في بالي بس عجبتني .. لما أعطتني المصورة عشان اختار صور البومي اكتشفت انو التسريحة ما كانت محبوكة ومزبرطة بشكل متقن بالرغم من انو الكل وما في احد شافني ما قال واو وطالعة روعة وخيال .. بس انا اطل في الصور وما أشوف الا عيب التسريحة، والآن مر على زواجي أسبوعين وانا مقهوووووررررة بشكل كبير ومتضايقة وأحس بمرارة في قلبي عشان ما اخترت حقت الشعر اللي قالت عليها صديقتي لأنو حقت الماكياج كانت مبدعة زي ماقالت .. والوم وأكل في نفسي ليش ما سمعت كلامها وليش صدقت اللي قالت لي حقت المشغل؟ ولا اقلها كان أخذت صورة تسريحة سوت لي هي .. وانا على هدا الحال مرة قرفانة ومو عارفة أشيل القصة من راسي وكل ما أحاول اشيلها يجي في بالي انو هدا الالبوم والصور طول حياتي وكدا .. مع انها مؤ سيئة ماشي حالها والطرحة كانت تمام ، وفي نظر الكل كل شي كان مرة واو .. فساعدوني بأفكاركم ياغاليات عشان اخرج هدا الشعور والإحساس البشع والسيء من بالي؟ لأنو مرة تاعبني ومو مخليني انبسط بس في بالي الصالون والتسريحة وصور الالبوم …