عالم البنات النسائي كل ما يخص المرأة العربية من ازياء وجمال والحياة الزوجية والمطبخ
كيفكمـ ؟ وكيف الحمل معآآكمـ؟
مناسبة كتابتي لـــ هالموضوع اني تذكرت ولادتي ببكري
وتذكرت كيف كنت بريئة ولا ادري وش السالفة معرف شئ ومن خلال الولادة تعلمت اشياااااء كثيرة ماكنت اعرفها
تصدقون رحت اولد وانا مااعرف كيف اولد قصدي ع طريقة الدفع
ومتى يكون الدفع
بسم الله نبدأ
_ اهم شئ الدعـــــــاء وقراءة سورة مريم وسورة الزلزلة
وجهزي ورقة فيها بعض الادعية ومصحف وحطيها بشنطة المستشفى من الان
او حملي المصحف على جوالك مثل ماسويت واحفظي باقي الادعية والايات
بالملاحظات والله يابناااااات الدعاء شئ عجيييب
لا المستشفى الفلاني بييسر ولادتك ولا الدكتورة اللانية ولا امك ولا اي احد
خذي بالاسبااااااب والجأي لرب العبااااد وادعي من كل قلبك من الان ادعي
واستغلي اوقات الاستجابة .
_كيف تعرفين انك على وشك ولادة ؟!!
لان من الثامن ويمكن قبل تجيـــك تقلصات والام مثل الام الدورة ومغص
بس ما يطول وفجأة يختفي ويسمونه الطلق الكآآآذب
هذا سبحان الله يساعد على ليونة عنق الرحم ويهئ الحوض والرحم للولادة
الطلق يكون منتظم بالبداية يكون نص ساعة بعدين يصير كل ربع ساعة والام يشتد
اكثر بعدين كل عشـــر دقآآئق بعدين كل خمس دقاااائق وهنا تكووون ولادتك مرررررة قربت
وبعدها كل ثلاث دقائق او دقيقتين
وباقي الاشياء تختلف من وحدة للثانية مثل نزول العلامة اللي هي سدادة الرحم
ويكون معها خيوط دم ومثل المويآآ بعضهم تنزل من بداية الطلق
وبعضهم بعد مايشتد بعضهم لازم الدكتورة تفكها لها
انتي ركزي ع الطلق اذا صار كل ربع ساعة او عشر دقائق على طوووول روحي المستشفى
ومن اول مايبدأ معاك امشي واذا اشتدت عليك الطلقة وقفي شوي وكملي مشي
وكلي تمر او رطب واشربي ماء زمزم اذا متوفر او ماء تكونين قريتي عليه
ايات تسهيل الولادة واشربي منها وامسحي بطنك .
_نصيحتي لك اول ما تحسين انها ولادة ولسى فيك حيل ولك نفس تاكلين كلي
حتى لو تغصبين نفسك ادري الخوف ومشاعر مختلطة مابين فرحة و خوف وماتدرين وش تسوين
ونفسك طبيعي بتنسد عن الاكل لكن اغصبي نفسك ولاتأكلين اي شئ
كلي اشياء مفيدة وفيها سعرات حرارية عالية
سنكرز , كيندر , باونتي , مارس ’ تمر
عصيرااات
لو بس تشربين عصير عشان يعطيك طاقة تساعدك ع الولادة
ماتدرين يمكن تطولييين وتتعبين وماتقدرين تدفعين
فــ الاشياء الخفيفة هذي تعطيك طاقة تساعدك ع الولآدة بإذن الله
وخلي معاك مويآآ لان بعدين مع قوة الطلق كل شوي تبغين تشربين وشفايفك تجف مرررررة وبشنطتك حطي مرطب للشفايف لان بعد هالجفاف تحتاج ترطيب .
_اقولها لك بأأعلى صووووتي ( لا تصاااااااارخيييييين ):)
حاولي قد ماتقدرين واذا بتصرخين حطي اي شئ بين اسنانك واكبتيها وعضي
كلهم لما عرفوا اني بأولد يدقون علي ولا تصارخين وتحملي
تدرووووون ليش الصراااخ بيآخذ كل طاقتك يعني كل الطاقة اللي اخذتيها من الكيندر والمارس قولي لها باي باي بتستنفذ كلها في الصراااخ هذا اولا
ثاني شئ مع الصراااخ العضلات تنشد ويرتفع الجنين لفووووق
فـــ تتعسر الولادة وانتي تبغينها تتيسر وتكون سهلة 💡
والشئ الثالث اللي تصارخ تسبب رعب لباقي البنات اللي بكشك الولادة
والله يوم كنت بالكشك ويدخلون الحريم يصارخون اغمض واتمنى اني مااسمع شئ
خصوصا البكريات بيجيهم رعب مو طبيعي ويمكن هي بعد تصير تصارخ ههههه 😛
ورابع شئ الممرضات والدكاترة يطفششششون من اللي تصارخ
عكس اللي تتأوه وتون وتكتم المها وتدعي وتصبر تعاملهم معها بيكون عسسسسل .
_ لا تستسلميـــــن لليأس تحملي الطلق لا آخر لحظة لان بعضهم
ماتتحمل وتطلب عملية قيصرية
الا في حالة كان فيه خطر عليك وعلى الجنين .
_ طبعا راح تحسين بثقل بالاسفل وضغط على عنق الرحم
وتحسين غصب انك تبغين تدفعين وفيه شئ بينزل بس انتي لا تدفعين ابدا
الا اذا طلبوا منك وقالوا مفتوح عشرة سم ولادة
وتحت هالنقطة بأقول كم على شيئين :
الأول :
كيف ادفع ؟
تدفعين مثل الدفع وقت التبرز
عفوآ بس اكيد فيه بعض البنات ما يعرفون كيف
لاني رحت اولد وانا والله مااعرف كيف ادف احسب انه اذا انفتح الرحم
عشرة سم افتح رجولي والبيبي يطلع من حالة هههههههه 🙁
لا تشرهون علي كنت بكرية وامي بعيدة عني ولا عمره هالموضوع جاء فبالي
بس قبل اولد سمعت وحدة بالــ كشك تكلم وحدة جنبي بغرفة الانتظار
عن طريقة الدف جزاها الله خيييير
على طول حطيت كلامها فبالي .
الثاني :
متى ادفع ؟
الدفع يكون وقت الطلقة
يعني بعد مايقولون لك ولادة ويجهزون الغرفة وتنسدحين على سرير الولادة
مافيه الم بأسفل البطن او الظهر لا تدفعين اول ماتجي الطلقة ادفعي بكل قوتك .
_ من التاسع اطلبي يكتبون بملفك كمآآآم ومخدر موضعي وقت الشق والخياطة
لان بعض المستشفيات ما يعطوون الا اذا كان مكتوب بملفك وهنا اتكلم عن المستشفيات الحكومية
حتى الخاصة اطلبي الكمام والمخدر
انا ببكري ماعطوني كمام و لا طلبت راح عن بالي وفيه وحدة ولدت معآآي وكانت ثاني ولادة اعطوهآ كمآآآم
يقولون الكمام هذا مثل السحر يوديك عالم ثااااااني يخفف الالم
وتحسين كأنك بحلم سبحان الله .
_ وقت الطلق وانا بقمة الالم سألت وحدة قلت لها الحين اذا ولدت
وطلع البيبي الطلق هذا بيوقف والا بيستمر معي؟
ياعمري علي احزن ههههه بس والله وقتها خفت يستمر معي حتى بعد الولادة
قالت لي يروح بعد مايطلع البيبي بس انتي عليك بالتمر والرشاد عشان يشد ظهرك قلت لها طيب
ومن قبل كثييير قالوا لي بعد ماتولدين كل شئ يختفي بلحظة حتى البطن ينزل
فجأة وتشوفينه يوم يرجع يآآآ الله كيف كذآ ماني متخيلة وبيني وبين نفسي ماكنت اصدقهم
الا بعد ماجربت سبحان الله بعد ما يطلع الرأس يزحلق باقي الجسم وبلحظة برمشة عين بإذن الله تشوفينه قدام عيونك
ويخف الالم وبعدين يختفي وتحسيييين انك بعالم ثااااااني
وكل شئ يصير كأنه حلم احلى احساس لما تشوفين البيبي تنسين كل الالم والتعب
بعدها يطلعون المشيمة وينظفونك من البقايا
ويخيطون الشق من جوه لبرى
ولازم قبل تطلعين من الغرفـــة تدخلين الحمام
انا ولدت بالعسكري وبغرفة الولادة موجودة دورة مياة صغيرة لازم تدخلين تتبولين وانتي بكرامة
قبل مايطلعونك للتنويم عشان يتطمنون على المثانة وان كل شئ تمام
انا ماقدرت جتني دووووخة والنيرس الله يسعدها صبرت علي وتفهمت حالتي
وودتني لغرفة التنويم وهناك بعد ماخفت الدوخة شوي دخلت
وخلاص بعد كذا راحت .
_ فيه شئ ضرووووري بأقوله بخصوص وقت خروج الرأس
وقت خروج الرأس بيكون الرأس في المهبل والمهبل ضيق عليه وممكن ينقص عليييه الاكسجين
وهالشئ مو زين للبيبي يأثر على دماغه
اول مايقولون لك دفي وانهم يشوفون راسه اضغطي على نفسك عشان نونتك ودفي
عشان مايطول بالمهبل ومايوصله اكسجين
انا بأقولكم عني دفيت ودفيت ودفيت ولا طلعت بنتي
وتعبت مرررة عجزت ولافيني حيييل ادف قالت لي الدكتورة يالله دفي وتشجعني يالله
راس البيبي طلع يالله دفي عشان مايصير نقص اوكسجيـــن
وانا تجيني الهمة وادف بكل قوتي و ممرضتين جوا وضغطوا على بطني
عشان يساعدوني على الدفع وطلعت بنوتتي الحمد لله
فــ حطي هالنقطة فبالك اوكي ؟!!
_ خلاص ولدتي الحمد لله وانتي والبيبي بخييير
ارسلي لزوجك ومامتك مسجات تبشرينهم فيها
وانتي تشطفي ونظفي نفسك مشطي شعرك والبسي قميص دافئ وبنطلونك القطن والشرابات وغطي رآسك
واهتمي بفيسك شوي بعد هالتعب بيكون ذبلان وباين عليه التعب
واطلبي شئ دافئ وخذي لك غفوة اذا كان وقت راحة اما اذا كان وقت زيارة او
البيبي عندك وكان من اولها مزعج الله يعينك ههههه .
وبس
توتة توتة خلصت الحدوتة 😥
مع تمنياتي للجميع بولادة سهلة ميسرة واطفال سليمين معافين
والله يرزق كل محرومة بالحمل السليم المعافى
بنااات اللي تستفيد من موضوعي تدعي لي بولادة طبيعية سهلة ميسرة
وطفل سليم معافى
واللي مرة عجزانة ترد تدعي لي بينها وبين نفسها ولها المثل
واي استفسار انا حاضرة
واللي حابة تنقل الموضوع للفائدة تنقـــــله بس مع كتابة كلمة منقول وذكر المصدر
فمــــآآآآن الله
