شوفتي وصفه ونفسك تسويها بس مكلفه؟تعالي يمكن أفيدك..

السلام عليكم ورحمة الله وبركاته

اليوم جايبتلكم كم شغله إستفدت منها وحبيت أفيدكم
صارتلي حكايه قبل كم يوم وهيا إني شفت وصفه للأخت الأفعى الحنونه أسكنها الله فسيح جناته
وأثقل ميزانها ويسر الله حسابها ويمن كتابها وجعل قبرها روضه من رياض الجنه<< قولوا آمين جزاكم الله خير فهيا أحوج ماتكون للدعاء بارك الله فيكم۔

عموما شوفت الوصفه وقررت أسويها و إن شاء الله راح أحطلكم تجربتي بعد ما أخلص الوصفه كامله
فلما كنت أبغى أشتري أشياء الخلطه إحتجت الصيدليه والعطار
طبعا كلنا إذا نبغي نشتري شي من الصيدليه نجري على النهدي وإذا خوفنا يكون غالي نشوف إذا متوفر عند العطار زي الزيوت تتوفر في الصيدليه وعند العطار
فيه شي مو كلكم تعرفوه هوا إنه فيه صيدليه معروفه و لها فروع كتيره سعرها منافس للنهدي أرخص منها بكم ريال<<كنت أقول مو ذاك الفرق ريالين ثلاثه عادي<<بس أسمعوا إيش صار

كنت أبغى أشتري زيت جنين القمح من وادي النحل لقيته في النهدي ب58 ريال
رحت عطار إبن سينا وميجان لقيته عندهم ب60 ريال
رحت صيدليه (غايه و إسمها التاني رام) ولقيته ب40ريال
شايفين فرق السعر 20 ريال
حتى زيت اللوز الحلو وزيت الورد عموما كلها فرق في السعر
فلما تشتري طلبات الوصفه وما تهتمي بفرق الريالين والثلاثه نكون خسرنا ما يقارب 30-40 ريال
على الفاضي
حتى صبغات الشعر والشاور جل والكريمات فرق في السعر كمان
أما بالنسبه للعطار
إحتجت سدر مطحون لوصفة الشعر إللي حاطتها في مواضيعي
أخذته من كذا عطار كنت أخذ على كميات قليله ب30 ريال ومافوق
بس لما رحت لعطار (صبغه) أخذت منه كيلو سدر مطحون ب40 ريال أو أقل والله مو متذكره للأن الكيس عندي مليان ماشاء الله وأستخدمه لشعري وجسمي ولساته باقي الله يبارك فيه

حتى المحلب أخدت كيلو ليا ولاخواتي ب60 ريال

بالمختصر صيدلية غايه إللي إسمها التاني رام أرخص من النهدي و أرخص من أي صيدليه ثانيه والصيدلي يتحداكي تلاقيه بسعر أقل
وعطار صبغه و الأفغاني في مكه أرخص من باقي العطارين وإللي تاخديه من أي عطار تاخدي ضعفه من صبغه وبنفس السعر إذا مو أقل۔

وسلالالالالامتكم يارب حبيتلكم الخير قلت أقولكم يا حبيبات قلبي…..

أصحاكم تطلع منكم وحده تقولي تسوي دعايه راح أزعل و ماراح أنزل لكم مواضيع تاني 😐 .