عالم البنات النسائي كل ما يخص المرأة العربية من ازياء وجمال والحياة الزوجية والمطبخ
شوفوا الطريقة
المقادير
ديك رومى (5 كيلو) يكفى 8 افراد
بصل مقطع شرائح رفيعه او مفروم
– عصير 6 ليمونات
– 4 فصوص مستكه
– 4 ورقات لاورى
– 6 فصوص حبهان
-ملح – فلفل اسود
– شرائح جزر
الطريقه
التتبيلة تكون قبل الطبخ بيوم
نغسل الديك الرومى جيدا ونسيبه يتصفى
ندعك البصل مع الملح والفلفل جيدا ونضيف عصير الليمون
ناخد الديك ونتبله من كل الجهات وبين الجلد واللحم فى الصدر ومن قلبه نضع داخله ورقتين لاورى وفصين مستكه و4 فصوص حبهان
نضعه فى وعاء عميق مقلوب على وجهه يعنى الصدر
ثانى يوم نشيل الديك من التتبيله ونصفيه من السوائل ونشيل كل البصل اللى على جلدة من برة وبعدين نجيب صينيه واسعه نسخن فيها سمنة و فص مستكه لتشويح الديك
نبدا نشوح الديك فى السمن من كل الجهات ومن عند الرقبه
نحضر الصينيه اللى هانسوى فيها الديك تكون صينيه حجمها مناسب وعاليه الحواف نبطنها بالفويل نضع فيها فصين مستكه وفصين حبهان وورقتين لاورو وبصل مقطع شرائح ومدعوك بالملح والفلفل وعصير ليمون (وممكن نحط كوسة وجزر وطماطم)
نضع فوقها الديك بعد ما شوحناه ونضع على صدر الديك على العظمه المرتفعه منه 3 شرائح جزر وذلك حتى لا يلتصق جلد الديك بالفويل
نضع نصف كوباية ماء فى الصينيه ونغطى الصينيه بالكامل بالفويل
ندخلها الفرن على حرارة 220 مئويه اسفل الفرن
كل كيلو جرام من الديك محتاج نصف ساعه سوا فى الفرن
كل نصف ساعه نفتح على الديك ونشربه من السوائل اللى بتنزل منه
بعد مرور ساعتين
نكشف الفويل من على الديك
نتركه يكمل نضجه فى النصف ساعه الاخيرة وهو مكشوف
بعد نهايه النضج ممكن تفتحى له الشوايه على خفيف لزيادة تحمير الوجه
طلعيه من الفرن
انقليه بحرص على صينيه تانيه
غطيه بالفويل و ثقبى الفويل ثقوب كتير بالسكين علشان البخار يطلع وسيبيه يهدا من حرارة الفرن
ننتظر لما يبرد بقا ويتقطع او يتقطع على السفرة
الارز بالخلطة:
المقادير:
(3 اكواب رز بسمتى يكفى 6 اشخاص)
كبد وقوانص متقطعة قطع صغيرة (الكمية حسب ما تحبوا)
مكسرات (صنوبر _ لوز شرايح مقشر – زبيب )
نصف كوب سكر
بصلة كبيرة مفرومة
ملح وفلفل
الطريقة :
نشوح نصف كمية البصلة فى ملعقة سمن و نحط عليها الكبد والقوانص نشوحهم شوية و نحط عليهم شوية ماية بعدين نوطى النار و نغطيها ونسيبها تستوى
بعد كدة نشوح الباقى من البصلة و نحط عليها الرز البسمتى و نحط على كل كوب رز بسمتى كوب ونصف ماية يعنى 3 اكواب رز هنحطلهم 4 كوبايات ونص ماية
فى نفس الوقت نكون حطينا السكر على النار بدون اى اضافات ونهدى النار شوية ونسيبة لحد ما يذوب ياخد اللون الاصفر خلى بالك ميتحرقش عشان ميكتلش فى الارز
اول ما ياخد اللون الذهبى نشيله من على النار ونحطه على الرز ونقلبهم فى بعض
وبعدين نحمر اللوز والصنوبر والزبيب ونخليهم لونهم ذهبى ونحطهم على الرز و نقلبهم فى بعض هتكون الماية نشفت من الارز نوطى النار ونسيبه ستوى عادى
وبعدين نحط عليهم الكبد والقوانص و نقلبهم سوا ويكون مستوين طبعا
ملحوظة اللى مش بيحب المكسرات ممكن منحطهاش على الارز سيبيها فى لوحدها فى طبق عشان اللى عاوز يحط براحته اثناء الاكل
وبعد ما الارز يستوى هنحط الديك الرومى فى طبق كبير مدور او مستطيل . نحطه فى وسط الطبق و نحط الارز من حواليه عشان يبقى شكله حلو او نحط حواليه شيبسى والرز فى طبق لوحده
ويقدم وبالهنا والشفا
ودى صورة الاكل بعد ما خلص
ودى صورته على السفرة وكنت قلبته على ضهره .. معلش ملحقتش اصور باقى الاكل عشان الناس كانوا جم ههههههه
