عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمه الله وبركاته
بعد معاناة تسعه اشهر من الحمل وكانت هذي اول ولاده لي في مدينه الرياض
كثير ناس انصحوني اني ماروح لمستشفى اليمامه لانه مو زين وبعد اراء عده وكثيره قالو لي انو مستشفى الايمان ممتاز
اول ماجاني الطلق رحت على طول للايمان
كان زحمه وكنت خايفه اكثر من اني اتالم وساعه على بال مااعطوني ورقه الكشف وساعه على بال مادخلت
قلت بنفسي هذي اولها الله يعين من تاليها
كنت اقراء القران بين نفسي
دخلت على الدكتوره كانت مصريه ونفسيتها مررررررررررره زفت مادري وش عليه
كشفت علي وهي تصارخ وتنفخ كني اصغر عيالها
وبعدها ودوني لفوق علشان الرحم مفتوح اربعه سانتي ولازم ولاده
رقوني فوق وكان المستشفى كله هنديات وبنقاليات دخلوني غرفه الولاده على طول وكشفت الدكتوره علي ودخلت فيني شي مثل العصى علشان تفتح كيس المويه
وبعدها عطوني طلق وخلوني اصارخ واتالم لمده ساعتين محد شافني ولا دخل علي مع انو كان الباب مفتوح وكل واحد يمر من العاملات والسسترات تشوفني
قسم بالله تمنيت اموت ولا يكون حالي كذا
وبعدها جتني الممرضه هنديه وكشفت علي وكنت احسبها بتنادي الدكتوره الا وهي تقول خلاص البيبي بيطلع ولاده وولدتني الممرضه وبعد ماطلع البيبي راحت وخلتني على حالي لمده نصف ساعه
ناديتهم قلت خلاص قالت لا المشيمه ماطلعت
يالله عذااااااااااااااااب
وبعدها جت تحاول تطلعها وطلع نصفها لان المشيمه تقطعت في رحمي
نادو الدكتوره المستهتره ونضفتني ولا خاطوني وقالو خلاص وراحو
وبعد ساعه ودوني للغرفه وكنت تعبانه مره
قلت بطلع للبيت على مسؤليتي وتخيلو طلعوني كانت نفسيتي زفت وحالتي حاله
وبعد مارحت للبيت دخلت دوره المياه وانتو بكرامه علشان اخذ دش والا الفاجعه
دخيلو قطع المشيمه طاحت مني بعد المويه الدافيه
والله حالتي حاله
جلست ادعي ربي على سلامتي وسلامه بنتي وتحسبت عليهم كثير
ونصيحه اللي عنده فلوس لايروح الا لخااااااااااااص وبس
والله يهون على كل حامل ويساعدها
