اللحمة الباردة + الكبسة على طريقتي وصوص الثومية (بالصور)/مشارك في المسابقة/

اللحمة الباردة + الكبسة + صوص ثومية

اللحمة الباردة
المكونات:
عِرق بيانكوا (من عند الجزار) + جزرة + فلفل أخضر رومي + ثوم مفروم + ملعقتين خل + ملح وبهارات على ذوقك + بصلة مفرومة أو مقطعة+ 4 ملاعق زيت + خيط دوبارة
الطريقة:
هاتجيبي اللحمة وبفتحها بالسكينة من النص بالطول وادخل في الفتحة دي التتبيلة اللي هي الفلفل والثوم والملح والبهارات والخل واجيب الجزرة وادخلها في الفتحة لحد ما توصل الناحية التانية بس تكون جزرة طويلة شوية اما لو مفيش جزرة طويلة هاتي جزرتين دخلي واحدة من فتحة والتانية من الناحية التانية
والجزرة وانتي بتدخليها هاتدخل معاها التتبيله كويس لجوا اللحمة
وبقيت التتبيله تبلي بيها اللحمة من بره كويس
بعد كده هاتجيبي خيط دوبارة (يعني خيط من نوع سميك شوية) وتلفي اللحمة وتشدي بيه كويس عشان عرق اللحمة يبقى ماسك نفسه كده معاكي
(اسفة طبعاً إني مصورتش المرحلة دي عشان مكنش لييا مزاج ولا في دماغي اني هانزلها بس لما لاقيت شكلها حلو طلعت في دماغي) اوعدكوا اصورها المرة الجاية
هانجيب البصلة ونحطها في الزيت اول ما تصفر هانحط اللحمة فيها ونشوحها كويس من جميع الجهات ونضيف كمية من الماء بس قليلة وكل ماتنقص نزود تاني لحد ما تستوي ونضيف عودين قرفة معاها وحبهان وملعقة كركم وقرنفل
وده هايبقى شكلها

هنا بعد ما طلعتها

أنا كنت عاملة اتنين بس منهم واحد كان كبير قسمته اتنين عشان اعرف اتحكم فيه وعشان المساحة في الحلة كمان

ملحوظة: يابنات ممكن تلفوها بورق فويل وتدخلوها الفرن تستوي وممكن كمان تسلقوها اللي يعجبكوا
وده بقى الصوص المتبقي اللي استوت فيه اللحمة وهانشيله وهاقولك ليه عشان هانستخدمه

نسيب اللحمة لما تبرد خااااااااالص عشان متتهريش واحنا بنقطعها (أوعي تنسي تشيلي الخيط) 😳

وده شكلها النهائي يارب تعجبكوا

الكبسة 😉

فاكرين الصوص بتاع اللحمة اللي شيلناه انا عملت بيه الكبسة
بصوا بقى
جبت جزر مبشور

حطيته مع الصوص

وبعدت ضفت الميه حسب كمية الرز المناسبة اللي هاتستخدميها كوب من الرز قصاده كوب ونص من الماء

وده شكله النهائي

صوص الثومية

بتبقى خطيرررررة وطعمها تحفة مع الكبسة
هاتجيبي طماطم + فلفل رومي + فلفل حامي (ممكن تستغني عنه) + ثوم + 4 ملاعق خل + ملح وبهارات
وتفرميهم فرم خشن مش ناعم

وده شكله النهائي