عالم البنات النسائي كل ما يخص المرأة العربية من ازياء وجمال والحياة الزوجية والمطبخ
ازيكم يا فراشااااااااااااااااااااات وحشتوني وحشتوني وحشتوني
طبعا بما إني بشتغل ومعنديش أجازة الا الجمعة لأني للأسف مش زي البني آدمين اللي بياخدوا السبت مع الجمعه 😛 اهئ اهئ اهئ شيلتكم همي حقكوا علييا يلا ما علينا
يوم الجمعة ده بقى بعيش حياتي مع حبيبي وعشقى الأول والأخير …… المطببببببببببخ 
انتوا عارفين يا فراشات جاتلي فترة والله زيادة عن سنة ونص مش طايقاه ولا بدخله تقريبا كنت اتحسدت انا والمطبخ ولا ايه كان لييا جارة كده عنيها حلوة اوي يلا اهي راحت لحالها
عملت مكرونة بالباشميل بس بطريقة مختلفة لاننا بنعملها بالصلصة بيبقى طعمها احلى من العادية بكتييييييييييييييييييييير وصينية فراخ في الفرن انما ايه
يااااااااارب تعجبكوا لأني بصراحة مجيش فيكوا حاجة والواحد بيتكسف والله ➡
يلا بينا
المكرونة بالباشميل الحمرا ههههههه (New Name) 
طبعا سلقنا المكرونة وعصجنا اللحمة المفرومة بالطريقة العادية جداااااااااا بس بعد ما اللحمة تتعصج بضرب طماطم في الخلاط مع معلقتين صلصة واحطهم عليها واسيبها تغلي غلوة محترمة كده
ودي صورتها
بعد كده باخد منها كام معلقة على حسب مانتي عايزة واضيفهم على المكرونة المسلوقة بالشكل ده
واقلبهم كويس
بعد كده باخد جزء من الباشميل (هانيجي لطريقته بعد شوية) واقلبه مع المكرونة بالشكل ده
بجهز الصينية اللي هاعمل فيها وانا عن نفسي بدهنها بالباشميل زي الصورة دي كده
وبعدين اقسم المكرونة واحط نصفها في الصينية واغطيها باللحمة المفرومة بالصلصة
بعدين احط بقيت المكرونة
واغطيها بالباشميل وببشر جبنة رومي على وشها (على فكرة الجبنة الرومي بتبقى أحلى من الموتزريلا بكتيييير)
وبعدين بدخلها الفرن ودي صورتها بعد ما خرجت 
ودي حتة منها للفراشات عشان تتذوقوها وتقولوا رأيكوا 
دي بقى طريقة الباشميل هي طبعا اكيد زي اللي انتوا بتعملوها بالظبط بس انا بحط جبنة رومي في قلبها
الأول بحط كمية من الزيت وفيها معلقة سمنة أو زبد للريحة بس أو الطعم عشان تبقى خفيفة بالزيت متبقاش تقيلة وبيبقى طعمها حلو والله وبروح حاطة الدقيق ومقبلباه تقليبتين لحد ما يصفر
بضيف اللبن أنا بعملها بلبن بس واقلب لحد ماتتخن وتختاري السمك اللي انتي عايزاه انا بعملها كريمي كده
وبحط هنا البيض واقلب بسرعه جدا عشان البيض مايستويش يا اما تكوني عاملاه من بدري وسيبتيه يبرد قل ما تحطي البيض ( أنا استخدمت بيض بلدي عشان بيدي لون أصفر أوووووي)
وهنا حطيت الجبنة الرومي في قلبها وقلبت وطبعا شوية ملح وعن نفسي حطيت رشه خفيفة بهارات
دي بقى مكرونة عملتها في طاجن أخذت شوية من المكرونة اللي فوق المتقلبه بالعصاج وحطيت على وشها سوية لحمة مفرومة برضه من اللي أنا عملاها وحطيت عليها شرائح طماطم وفلفل وبشرت عليها جبنة رومي (أصل أختي مبتحبش الباشميل) وعشان عملت حسابها أحسن تعمل مناحة سبحان الله كلت من اللي بالباشميل وعجبتها 
نيجي بقى لصينية الفراخ
بصراحة كنت كسلانة أعملها أووووي رحت حاطة في الخلاط البصل والثوم والخل وليمونة وملعقة كركم وملعقة كاري والملح كله مع بعضه بالشكل ده
وتبلت بيه الفراخ كده
وبعدين غطتها بورق الفويل كده
وكده بعد ماطلعت وشيلتها عنها الورق واتأكدت انها استوت
وبعدين ولعت عليها شواية الفرن وبقت بالشكل ده في الآخر
وده بقى الشكل النهائي للأكل
معلش بقى رغاية أنا النهارده (حسيت كده) بس ده عشان بحبكوا 
مستنية اراءكم 
