حسبي الله ونعم الوكيل!! رغم اللي عرفته لكن ثقتي في الله زادت لأن ربي أكبر منهم جميعا

اشلونكم خواتي ..؟؟ ❗ شخباركم ؟؟

أنا هاليومين متفائله أكثر من الأيام السابقه والأمل ازداد عندي 😆 🙄

رغم اللي عرفته .. زاد الامل في ان الفرج قريب .. وان القادم أجمل مما اتخيله .. لأن الله بشر الصابرين ..

هاليومين أمي قالت لي شي كانت خاشته عني .. عرفته امي قبل مده .. وانا توني هاليومين عرفته!!!

دقت حرمه على أمي .. وقالت لها بالمختصر المفيد .. ان في حرمه تذم بنتج للناس !!!

تقول أمي سكت وسكرت السماعه ..ومالّقت للموضوع بال .. توقعته سوالف حريم ..

بعد فتره بسيطه..دقت حرمه ثانيه نعرفها ومالها شغل بالحرمه الأوليه وقالت نفس الجمله لأمي !! بأسلوب ثاني طبعا بس نفس المغزى !!

انا انصدمت أول ماقالت لي أمي .. خاصه اني والله والله حبوبه مع الناس وما عمري ضايقت أحد بكلمه!!

ولأني حلمت كذا حلم وكان تفسيره اني مظلومه من أحد بكلام جذب يقال عني !!

ولا حتى عمري تطفلت على أحد أو سويت شي يضايقه لأني باختصار اخاف الله وأدور رضاه سبحانه..

انا مستغربه من هالحرمه !! وكان ودي أمسكها واسألها هالأسئله ..

انا بالثلاثينيات !! شبقى بعد ؟؟!! لي متى تبين تشوفيني وحيده ؟؟

هل انتي فرحانه اني محرومه من الأطفال مثلا!! تبيني انحرم من كلمة يـمـه طول عمري ؟؟

هل انتي فرحانه وشمتانه ان الناس تقط علي كلمه منيه ومناك .. اشلون ما تخافين عقاب الله ..!!؟؟

شي غريب فعلا !!؟؟ الانسان يقعد في بيته كافي خيره شره .. والناس تاكل في لحمه وتفرح لآلامه ..

صعدت من أمي .. وتوضيت وصليت ودعيت .. و بعد الثناء على الله والصلاة الابراهيمية قلت يارب لا مانع لما اعطيت سبحانك ولا معطي لما منعت ..

وقضائي وقدري ونصيبي بيدك وحدك سبحانك … اكفني شر من اراد بي شرا ..وكملت ادعيتي المعتاده..

قمت من سجادتي يا بنات وانا حاسه برااااااحه مو طبيعيه…

تدرون ليش .. ماتأثرت .. لأني موووووقنه ان الله أكبر منها ومن كل من يقول في حقي كلام بااااطل …

لأني موووووقنه ان مصيري بيد الله وحده سبحانه ..

الله وحده …

مو بيد عباده .. لو كان بيد عباده .. كنت قلت على الدنيا السلام !!

وهذا انا عندي مناسبه في شهر 6 .. والعروس اصغر مني بواااااااايد والمعرس كذلك .. الله يوفقهم يااارب

ورغم اني مالي خلق للي بسمعه وبشوفه في عيونهم كالعاده ..لكن راح أروح ..ماراح احبس نفسي!!

وكاني في هاللحظه حاطه ماسك لشعري .. وبهتم بنفسي مثل اي بنت .. لأني ماراح اوقف حياتي لمجرد أني متأخره عن الزواج ..

آسفه طولت عليكم … لكن انتوا خواتي وانا كتبت هالموضوع .. مو لشكوى ..كتبته لاني ابي البنات اللي

يمرون بنفس حالتي ..يعرفون انهم مو بروحهم ..

وانهم لازم يستمرون في الدعاء والرقيه .. لازم يعرفون ان الله وعد الصابرين ..((وبشر الصابرين))

[ وَبَشِّرِ الصَّابِرِينَ * الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّا إِلَيْهِ رَاجِعونَ *أُولَئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَئِكَ هُمُ الْمُهْتَدُونَ ] البقرة/154-156

[ إنما يوفّى الصابرون أجرهم بغير حساب ]

[ ما يصيب المسلم من نصب ولا وصب ولا هم ولا حزن ولا أذى ولا غم حتى الشوكة يشاكها إلا كفر الله بها من خطاياه ] – البخاري.

[ إن عظم الجزاء مع عظم البلاء وإن الله إذا أحب قوما ابتلاهم فمن رضي فله الرضا ومن سخط فله السخط ]رواه الترمذي

[ وَاسْتَعينوا بِالصَّبْرِ وَالصَّلاةِ وإِنَّها لَكَبِيرَةٌ إِلاَّ عَلى الخاشِعينَ]

بعد هالآيات القرآنيه والأحاديث النبويه ..أقولكم .. استبشروا خير .. الفرج قريب

ياااااااااارب أسألك زوجا شابا أعزبا حسن الخَلق والخُلُق..صالحا طيب القلب.. حافظا لفرجه وغاضا لبصره .. حنونا علي ..يحبني ويرعاني .. و يكون حنونا على أبنائي ..

أدري يارب انك راح ترزقني بكل خير وتعوضني .. وانك ماراح تحرمني من طفل ويسمعني أجمل كلمه

تسمعها امرأه … (( ماما )) 😉

صباحكم ومسائكم طاعه لله و تفااااااااؤل بأيام أجمل

أستأذنكم .. بروح أغسل شعري عقب هالماسك

[ فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا *يُرْسِلِ السَّمَاء عَلَيْكُم مِّدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ]

أحبكم في الله