عالم البنات النسائي كل ما يخص المرأة العربية من ازياء وجمال والحياة الزوجية والمطبخ
” ساميه ” كانت زميلة دراسه في الجامعه وبعد التخرج تفرقنا وكل واحد راح بطريقه وانقطعت اخبارنا عن بعض. قبل اسبوعين قابلت ساميه بالصدفه في أحد المطاعم بشارع الخليج العربي وكانت فرحتنا ببعض كبيره ، قمنا نتامل بعض وندور اذا كان في اي تغيير بعد فراق دام أكثر من 5 سنوات بس ما لقينا في تغيير الا اللهم تغيير في تخطيط وهدف حياة كل وحده فينا. قمنا نسولف عن بعض وعن الشغل ومشاكل الشغل والدراسه وايام الدراسه الى أن وصلنا الى مواضيع الحب والزواج… سألتني ساميه ” رهام تزوجتي ؟؟” قلت لا والله بعد ما تزوجت ، بعد ما وصل الفارس اللي على حصانه وانشالله ما يوصل الا عقب ما اخلص الماجستير 😀 ” فضحكت ساميه .. قلت لها وانتي ؟ ما تزوجتي ؟ ردت بكل أسى لأ لكن قلبي مشغول !! قلت لها شلون .. تحبين ؟ قالت اي أحب والمشكله ان اللي أحبه متزوج وعنده عيال !!!
بصراحه كلامها كان مثل الصاعقه بالنسبه لي .. لو تشوفون ساميه تقولون هذي وين وسوالف الحب وين لكن شاءت الأقدار والصدف انها تحب واحد متزوج.
المهم ما اطول عليكم .. سألتها هو يحبك ؟ قالت اي يحبني وكل تصرفاته تقول جذي. وهو يكبرني ب 14 سنه
( عمر سامية 31 سنه ) .. ما سألتها وين تلاقوا او شلون لكن قلت لها ما لقيتي غير المتزوج .. قالت ما تدرين شلون الموضوع هذا مسبب لي تعب نفسي داخلي شلون اني احب واحد متزوج وشلون راح آخذه من زوجته وعياله
تقول ساميه .. حاولت كم مره اني ابتعد عنه واقطع علاقتي فيه … لدرجه اني دايما ادعي بصلاتي ان ربي يبعده عني اذا كان بعلاقتنا شر لي او له له ولبيته … لكن للأسف كل يوم نتعلق ببعضنا أكثر وأكثر … أحبه حيل يا رهام
هذا ما قالته ساميه وهي الدموع بعيونها وتحاول تغطي وجهها حتى لا يشوفونها الناس اللي حوالينا.
قلت لها متى تعرفتوا على بعض ؟؟ وهل في نية زواج ؟
قالت عمر علاقتنا تقريبا 5 شهور .. ومن أول يوم عرفته فتح لي قلبه وكشف لي عن كل أسراره من غير ما يعرف انا منو .. كان يقول انتي ( عن ساميه) عوضتيني عن شغلات وايد انا كنت فاقدها بحياتي .
أما عن الزواج .. تقول ساميه ان في اتفاق مبدئي على الزواج لكن ظروف عمله الحاليه ما تسمح لان عنده عدة مشاريع خارج الكويت وصار له أكثر من شهرين خارج الكويت والحين هو بالكويت وراح يرجع يسافر مره ثانيه
والمشاريع هذي يبي منه انه يحسن ظروفه المعيشيه لان تعرض لمشاكل ماديه في السنوات السابقه ويحاول انه يعدل وضعه .. وبمجرد ماراح تتحسن ظروفه راح نتزوج.
كملت ساميه تقول ” تصوري يا رهام عمر علاقتنا أكثر من 5 شهور ويوميا نكلم بعض ما يقل عن مرتين حتى واهو مسافر مع ان قيمة الدقيقة أكثر من نص دينار الا انه كان يكلمني .. أحيانا أقول احنا ما نحب بعض .. لكن احيانا تصير مواقف وأقول احنا نموت ببعض ”
حاااااااااااايره شلون راح اتزوج واحد عنده بيت وعيال … شلون راح آخذ واحد من زوجته .. صحيح اني لا أول وحده ولا آخر وحده تتزوج واحد متزوج لكن ضميري يأنبني صراحه …. احيانا انسى التفكير بموضوع الزواج وأقول اخليها على الله ونشوف شنو الله يكتبه ويقسمه لنا … وقامت تمسح دموعها المسكينه.
قلت لها بصراحه عورتي قلبي … انا ما سفتك من زمان ويوم شفتك لقيتك مهمومه .. عسى الله يعينك ويكتب لك اللي فيه الخير انشالله. واللي الله كاتبه راح يصير سواء تزوجتوا او لا.
وهذي قصة صديقتي سامية المسكينه 😡
أدري الحين المتزجات رااااح يعصبون والآنسات راح يتعاطفون .. صدقوني البنت بحيره ما بعدها حيره
.
