صاحب الظل الطويل عن ( جودي ابوت )

قصة صاحب الظل الطويل …

القصة عن البنت اليتيمة جودي آبوت … اللي تركوها عند باب أحد الملاجيء في نيويورك .. بدون أي معلومة تدل على هويتها الحقيقية … تربت جودي في الملجأ … حتى اسمها ( جودي آبوت ) مو اسمها الحقيقي .. هذا الاسم اختارته لها .. مديرة المدرسة السيدة ليزا .. عموماً .. تتربى جودي في الملجأ … ونشوف في بداية الحلقات إنه جودي محبوبة وايد من كل الياهال ( الأيتام ) لأنها حنونة وحبوبة .. فالكل يحبها .. وجودي دايماً تلعب مع الياهال ^_^ .. مو بس جذي بعد ترسم على الطوف ^__+يعني حدها مرحة وحيوية ونشيطة ( على الرغم من إنه داخلها حزن كبير بسبب حياتها الصعبة لكن جودي من النوع الحالم والمتفائل لأبعد الحدود ^_^ ) … يوجد في الملجأ ولدين وبنت بنفس عمر جودي تقريباً لكن مختلفين عنها تماماً لأن كل واحد فيهم يبي أحد يتبناه علشان يترك الملجأ ويبدأ حياة يديدة وحلوة … ماعدا جودي اللي ما كانت تحلم بهالشي مولية .. المهم في يوم …السيدة ليزا … نادت جودي وربعها ^_^ (Eric, Sadie and Tommy … مو متأكدة من الأسامي ^_+ .. سوري) … وقالت لهم إن المحافظ وعدد من الشخصيات الراقية راح يزورون الملجأ … وقالت لهم إنهم لازم يحسنون التصرف لأن ممكن إن أي واحد فيهم يتم تبينه من قبل الأشخاص اللي راح يحضرون ويكون له أسرة ^_^ … طبعاً الكل تحمس وقرر يسوي أحسن شي عنده ماعدا جودي اللي ما اهتمت للموضوع ,وصل اليوم المنتظر … والكل كان يشارك في الاستعداد … بدأ التنظيم والتنظيف .. وبدت مواقف جودي العبيطة ^_+
وصلوا الزوار … والكل كان يبذل أقصى اللي يقدر عليه وجودي حاولت لكن ؟؟؟ شوفوه أحسن ^_^
عموما ً… ^^
في يوم نادت السيدة ليزا جودي وقالت لها إنه في أحد تكفل بدارستها في أحد أرقى المدارس .. وهي مدرسة لينكولن .. وهذا الشخص اسمه جون سميث .. جودي كانت طايرة من الفرحة … وحبت تشكر هذا الشخص اللي كان على وشك إنه يطلع من الملجأ لكن ما لحقت عليه … بس شافت ظله وكل ظله طويل، بس ما شافت الشخص ولا تعرفت عليه أكثر، صور للمشهد اللي ألحقت فيه جودي السيد جون سميث علشان تشكره .. لكن ما قدرت تشوفه .. بس شافت ظله ^_+
1
2
3
4
5
6
7
8
9
10
جودي في البداية كانت متضايقة لأنها راح تترك الملجأ اللي تربت فيه … واللي كان مضيق خلقها أكثر هو إنها راح تترك أصدقاءها اللي تحبهم …. وبعد بسببSadie ( هذي صورتها… أم خشم ^_+ )… هذي البنت كانت تتمنى أحد يتبناها .. وكانت دايماً جدية وصارمة … علشان جذي انصدمت لأنه جودي حصلت على منحة للدراسة في أرقى المدارس الخاصة … واهي لأ .. وكانت تعامل جودي جنها السبب في اللي اهي فيه … باختصار حست جودي بالذنب والضيق …….. في الأخير يا اليوم اللي بتروح فيه جودي للمدرسة … وجودي خذت معاها جنطة ( شنطة ) كل اللي فيها من أغراض بالي وقديم … ولما كانت في القطار كانت حزينة وايد ومتضايقة لأنها تركت أصدقائها وما ودعتهم حتى … لكن المفاجأة .. كانت إنه كل أصدقائها يايين يودعونها حتى أم خشم .. وكانت أم خشم لابسة الجوتي ( الحذاء ) اللي شرته لها جودي ^_+ قبل ما تسافر ( يوم عطتها جودي الجوتي عصبت ورفضت تاخذه ) ..أي الفلوس كانت لجودي علشان أجهز نفسها .. لكن اهي شرت بالفلوس هدايا لأصدقائها ^_^
راحت جودي المدرسة .. وتعرفت على عدد من الصديقات لكن أهمهم .. صديقات السكن .. جوليا بندلتون وسالي ماك برايت .. من هني تبدأ حياة جودي اليديدة .. مع مغامرات مختلفة كل يوم .. وجودي تكتب رسائل لصاحب الظل الطويل حسب طلبه وتذكر فيها كل شي يصير لها ( اهي أطلقت عليه لقب صاحب الظل الطويل بعد ما شافت ظله الطويل ^_+ ) … في أحداث وايد حلوة لكن أهم شي منو هذا صاحب الظل الطويل أو جون سميث وليش يساعد جودي ؟؟؟
جودي ما قالت لأحد إنها كانت في ميتم .. وإنها ما تعرف أمها وأبوها ولا حتى أي شي يدل على هويتها …. ^_^هل راح تقدر جودي تخش هالشي على طول ولا في أحد راح يكشفها ؟؟؟؟ .. خصوصاً إنها عفوية وما تقدر تخفي مشاعرها وانفعالاتها على أي أحد … ^_^

هذي القصة باختصار .. أتمنى إني قدرت أوضحها ^_______^